ءماجىلىس توراعاسىنىڭ ورىنباسارى دەلەگاتسيا مۇشەلەرىن كەلە جاتقان مەرەكەمەن قۇتتىقتاي وتىرىپ, ۆەتنام حالقىنا جاڭا تابىستار مەن يگىلىك تىلەدى. ءماجىلىس توراعاسى ورىنباسارىنىڭ ايتۋىنشا, قازاقستان اتالعان ەلدى وڭتۇستىك-شىعىس ازياداعى ماڭىزدى ارىپتەسى دەپ سانايدى. ۆيتسە-سپيكەر اتاپ وتكەندەي, ديپلوماتيالىق قارىم-قاتىناس ورناعان 25 جىل ىشىندە قوس ەل اراسىنداعى ىنتىماقتاستىق بارلىق سالادا, اسىرەسە, ساياسي, ساۋدا-ەكونوميكالىق باعىتتا قارقىندى دامىپ كەلەدى.
ءوز كەزەگىندە حوانگ بين كۋان قازاقستان مەن ۆەتنامنىڭ ەكىجاقتى قارىم-قاتىناسىنىڭ جاڭا دەڭگەيگە كوتەرىلگەنىنە سەنىم ءبىلدىردى.
تاراپتار ەكى مەملەكەت اراسىنداعى ءوزارا ءىس-قيمىلدىڭ الەۋەتى زور ەكەندىگىنە نازار اۋدارىپ, وسى رەتتە ەۋرازيالىق ەكونوميكالىق وداق ەلدەرى اراسىنداعى جانە ۆەتناممەن ەركىن ساۋدا ايماعى تۋرالى كەلىسىمنىڭ ءمۇمكىندىگىنە توقتالدى. باسىم باعىتتار قاتارىندا اۋىل شارۋاشىلىعى, تۋريزم, سونداي-اق, مۇناي-گاز سالالارىن اتاپ وتۋگە بولادى. ءماجىلىس ۆيتسە-سپيكەرى, سونىمەن بىرگە, پارلامەنتارالىق قاتىناستاردى تەرەڭدەتۋدىڭ ماڭىزدىلىعىنا توقتالدى. بۇل جولدا ىنتىماقتاستىق جونىندەگى توپتاردىڭ ءوزارا ءىس-قيمىلىنىڭ, زاڭ شىعارۋ قىزمەتىندەگى تاجىريبە الماسۋلاردىڭ مۇمكىندىگى زور.
كەزدەسۋ بارىسىندا گ.يسىمباەۆا مەيمانداردى ەلىمىزدە جۇرگىزىلگەن كونستيتۋتسيالىق رەفورما جايىندا تولىققاندى حاباردار ەتتى.
جۇزدەسۋگە, سونداي-اق, ءماجىلىس دەپۋتاتتارى, «قازاقستان-ۆەتنام» ىنتىماقتاستىق جونىندەگى توپتىڭ مۇشەلەرى مۇحتار ەرمان مەن يرينا ۋنجاكوۆا قاتىستى.
