جارمەڭكەدەگى ۇلتتىق ناقىشتاعى بۇيىمداردا كورىنىس تاپقان ويۋ-ورنەكتەر مازمۇندىق ەرەكشەلىكتەرى جاعىنان سان الۋان. قىز-كەلىنشەكتەرگە ارنالعان ساندىك, زەرگەرلىك بۇيىمدار – مونشاق, سىرعا, ساقينا, بىلەزىك, شولپى, القا جانە تاعى باسقا زاتتار قاز-قاتار ءتىزىلىپ, كوزدىڭ جاۋىن الادى.
شارانى ۇيىمداستىرۋشى «پانا ب» قايىرىمدىلىق قورىنىڭ مۇنداي ءىس-شارالاردى اتقارۋدا تاجىريبەسى بار.
بيبىگۇل لاۋبايقىزى, قور ءتورايىمى:
«مۇمكىندىگى شەكتەۋلى ادامداردى تەگىن ورنالاستىرىپ جاتىرمىز. استاناعا كەلۋگە بارلىعىنىڭ جاعدايى كەلە بەرمەيدى. ولارعا قالانىڭ كورىكتى جەرلەرىن ارالاتىپ, ەلوردامەن تانىستىردىق. ماقساتىم قولونەرشىلەردىڭ بۇيىمدارىن ەلگە تانىستىرۋ, ءوزارا مادەني قارىم-قاتىناسىن دامىتۋ. شاراعا دەمەۋشىلىك ەتكەن «اۋىل» پارتياسىنا العىس ايتامىن».
جارمەڭكەگە «ءۇمىت ءۇيى» ماڭعىستاۋ وبلىستىق داعدارىس ورتالىعى دا قاتىسىپ جاتىر. ورتالىقتاعى ارت-تەراپيا بۇرىشىنا كەلىپ, الەۋمەتتىك, پسيحولوگيالىق قولداۋعا جۇگىنىپ جۇرگەن ايەلدەردىڭ ارقايسىسى ەرەكشە جاندار. مىسالى, 55 جاستاعى تاتيانا مۋراشكونىڭ قولىنان شىققان قۋىرشاقتاردىڭ ءاربىر دەتالى وزىندىك ماعىناعا يە. باعالارى 5 مىڭ تەڭگەدەن 10 مىڭ تەڭگە ارالىعىندا قۇبىلادى.
«2013 جىلى اشىلعان ورتالىققا وتباسىندا زورلىق-زومبىلىق كورگەن ايەلدەر كەلىپ جۇگىنىپ جاتادى. ولارعا پسيحولوگيالىق قولداۋدان بولەك, زاڭگەرلىك كومەك كورسەتىلەدى. ءارى وسىنداي قولونەرلىك تەراپيا كۋرسى دا بار. مىسالى, تاتيانا كۇيەۋىمەن اجىراسقان سوڭ, ىشىمدىككە سالىنىپ كەتكەن ەدى. دەگەنمەن ءبىزدىڭ ورتالىقتاعى مامانداردىڭ ۇجىمدىق كومەگى مەن ەرىك-جىگەرىنىڭ ارقاسىندا ءوز-ءوزىن تاپتى دەپ ايتۋعا بولادى. ويتكەنى ول جاساعان قۋىرشاقتار وتە ەرەكشە. مىنا تۇرعان قۋىرشاقتى قوي دەپ ويلاساڭىز قاتەلەسەسىز. بۇل تاتيانانىڭ فانتازياسىندا قارداي اپپاق البينوس-مايمىل», دەيدى ورتالىقتىڭ پسيحولوگى يۋليا گادجيمۋرادوۆا.
كورمە-جارمەڭكەدە بەرەكەت بولات ۇلى ىلمەك بىزبەن توقىعان كارتينالارىمەن كوزگە ءتۇستى. 1987 جىلى تۋعان ول – اتىراۋ وبلىسى, قۇلسارى قالاسىنىڭ تۇرعىنى. 2011 جىلى مۇناي زاۋىتىندا جۇمىس ىستەپ جۇرگەن كەزىندە, ۇستىنە بورەنە قۇلاپ كەتىپ, جاراقات العان. قازىر I توپ مۇگەدەگى. كەستە ونەرىنە قىزىعۋشىلىعى پەكيندە وڭالتۋ ورتالىعىندا ەم الىپ جۇرگەن كەزدە باستالعانىن ايتىپ, ەسكە الدى:
«پەكين ەمحانالارىندا ادام كوپ بولعاندىقتان ەرلەر مەن ايەلدەر ارالاسىپ, ءبىر پالاتادا جاتا بەرەدى. ماعان قاراما-قارسى توسەكتە ورنالاسقان توقىماشى ايەل كۇندىز-ءتۇنى كەستە تىگىپ جاتاتىن. ءبىر كۇنى قىزىعىپ كەتىپ, قاسىنا بارىپ, قالاي تىگىپ جاتقانىن تاماشالاپ تۇردىم. بىراق مەنى دارىگەر ەم الۋعا شاقىرىپ, الىپ كەتتى. قايتىپ كەلسەم, سول ايەلدىڭ قىزى ماعان ءبىز بەن كەستە ءجىبىن سىيعا تارتۋ ەتتى. سودان بەرى وسى ءىستى جانىما سەرىك ەتتىم», دەيدى بەرەكەت.
ونىڭ توقىما كارتينالارىنىڭ باعاسى 40 مىڭ تەڭگەدەن باستالىپ, 150 مىڭ تەڭگەگە دەيىن بارادى. جاس جىگىتتىڭ ەندىگى ماقساتى – اياعىنان تىك تۇرۋ:
«قولونەردەن باسقا, تاماق پىسىرۋگە, اسپازدىققا ءبىر تابان جاقىنمىن. كەلەشەكتە, بالكىم, ءبىر جوباعا اينالدىرا جاتارمىن. ەكى اياقتان تىك تۇرىپ جاتسام, ەڭ الدىمەن ماعان كومەك كورسەتكەن جاندارعا ءوز اياعىممەن ءجۇرىپ بارىپ, راحمەت ايتقىم كەلەدى».
بۇگىنگى شارادان تۇسكەن قارجى مۇمكىندىگى شەكتەۋلى بالالار مەن از قامتىلعان وتباسىلارعا كومەك رەتىندە بەرىلمەك. «حان شاتىر» ساۋدا ورتالىعىندا ءوتىپ جاتقان كورمە ءۇش كۇنگە جالعاسادى.
ايا ءومىرتاي
«ەگەمەن قازاقستان»
