جيىندا وقو تج دەپارتامەنتىنىڭ باستىعى نۇربولات دەربىسوۆ وبلىس كولەمىندە سۋ تاسقىندارىنىڭ الدىن الۋ ماقساتىندا اتقارىلىپ جاتقان جۇمىستار مەن قالىپتاسىپ وتىرعان جاعدايلار جونىندە باياندادى. ونىڭ ايتۋىنشا, بۇگىنگى تاڭدا وبلىس كولەمىندەگى 43 سۋ قويماسىنىڭ توعىزى 100 پايىزعا تولىپ, ترانزيتتىك رەجيمگە كوشىرىلگەن. سۋ تاسقىنىنىڭ الدىن الۋ جانە ونىڭ سالدارىن جويۋ ءۇشىن ءتيىستى جۇمىستار باستالىپ, جۇيەلى جۇرگىزىلىپ جاتقانىن جەتكىزگەن نۇربولات بەكبولات ۇلى سۋ قويمالاردا قاۋىپسىز رەجيمدى ساقتاۋ بارىنشا كۇشەيتىلگەنىن العا تارتتى.
«ماسەلەن, جامبىل وبلىسىندا جاۋعان قاتتى جاۋىن-شاشىن مەن تاۋداعى قاردىڭ ەرۋى سالدارىنان 30 ناۋرىزدا جۋالى اۋدانىنان باستاۋ الاتىن بورالداي وزەنىنىڭ سۋى 375 سم-گە كوتەرىلىپ, بورالداي ەلدى مەكەنىنىڭ تۇسىندا اعىسى سەكۋندىنا 250 تەكشە مەتردى قۇراعان. جەرگىلىكتى اكىمدىك پەن پوليتسيا, ءورت ءسوندىرۋ بولىمدەرىنىڭ قىزمەتكەرلەرى تۇرعىندارمەن بىرىگىپ قورعانىس دامبالارىنىڭ وسال جەرلەرىن كوتەرىپ, نىعايتىپ, تاۋلىك بويى قاۋىپتى جەرلەرگە كەزەكشىلىك ۇيىمداستىردى. سونىڭ ارقاسىندا ءبىز ۇلكەن تاسقىن سۋدى وتكىزىپ, تۇلكىباس اۋدانىنداعى بىرنەشە ەلدى مەكەندەردى سۋ باسۋدان قورعادىق», – دەدى ن.دەربىسوۆ.
بورالداي وزەنىنىڭ تاسقىن سۋى 31 ناۋرىز كۇنى ارىس وزەنىنە قوسىلىپ, سۋدىڭ اعىسى سەكۋندىنا 243 تەكشە مەترگە جەتكەن. ونىڭ سالدارىنان ورداباسى اۋدانى اۋماعىندا «باتىس ەۆروپا – باتىس قىتاي» تاس جولىنىڭ 2226 شاقىرىمىنداعى ارىس وزەنىنىڭ قاشىرتقى كانالىنىڭ كوپىرى وپىرىلىپ قۇلاعان. توتەنشە جاعدايلاردىڭ الدىن الۋ ماقساتىندا وبلىستىق تجب قىزمەتكەرلەرى جولعا ۋاقىتشا شەكتەۋ قويىپ, قاتىناس ورداباسى اۋدانىنىڭ تەمىرلان ەلدى مەكەنىندەگى جول ارقىلى جۇرگىزىلگەن. وسىعان بايلانىستى وزەن ارنالارىندا قاجەتتى شارالار اتقارىلۋدا, بارلىق وزەن سۋلارى مەن سۋ قويمالارىندا مونيتورينگ جۇرگىزىلۋدە.
جيىن بارىسىندا جاعدايلاردىڭ جاي جاپسارىن مۇحيات تىڭداعان وبلىس اكىمىنىڭ ورىنباسارى وڭىردە بولۋى مۇمكىن تاسقىن سۋدىڭ الدىن الۋ بويىنشا شارالاردى تىڭعىلىقتى ورىنداۋدى جۇكتەدى.
«وڭىردەگى كوكتەمگى سۋ تاسقىنىنىڭ ەرەكشەلىكتەرىن ەسكەرە وتىرىپ, وعان جان-جاقتى دايىندالماسا بولمايدى. قالا جانە اۋدانعا قاراستى اۋماقتاردا سۋ باسۋ قاۋپتى جوعارى جەرلەردە ۇنەمى ۆيزۋالدى زەرتتەۋ جۇمىستارىن جۇرگىزۋ كەرەك. سۋ قاشىرتقى كانالدار مەن ارىقتاردى قوقىستاردان تازالاپ, سۋ وتكىزۋ قابىلەتىن جوعارىلاتۋدى جانە سۋ قويمالارىندا قاۋىپسىز رەجيمدى ساقتاۋدى باستى نەگىزگە الۋ شارت», – دەدى ايماق باسشىسىنىڭ ورىنباسارى.
جيىندى قورىتىندىلاعان ول ءتيىستى مەكەمە باسشىلارىنا, سونداي-اق اۋدان اكىمدەرىنە كوكتەمگى سۋ تاسقىنىنا بايلانىستى جاعدايدى كۇنبە-كۇن باقىلاپ, مونيتورينگ جاساپ, بارلىق قاجەتتى شارالاردى قولعا الۋدى تاپسىردى.
