ا.گريننىڭ «القىزىل جەلكەن» پوۆەسىن زامانعا لايىقتاپ, جاڭاشىل كەيىپكەرلەر الەمىمەن توعىستىرعان دراماتۋرگ – پاۆەل موروزوۆ. بۇگىندە پەسا شەشەن, بالقار, قازاق, ۋكراين تىلدەرىنە اۋدارىلعان.
«اسسول» – جۇرەگىن قولىنا ۇستاپ جۇگىرىپ جۇرگەن ارمانشىل بويجەتكەن تۋرالى ءبىر ۇزىك سىر. اسسول جۇرگەن جەردە دالا ءان سالادى, جال-جال تەڭىز تولقىندارى قاناتىن سەرمەي بيلەي ءجونەلەدى, اينالا شۋاققا بولەنەدى. وزگەلەرگە ۇقسامايتىندىعى ءۇشىن-اق جازىقتى بولعان جاس قىزدى تەڭىز جاعاسىنداعى كاپەرن اۋىلىنداعىلار جىندىعا بالاپ, شەتقاقپايلاپ, قيت ەتسە «باقىت سەنىڭ نە تەڭىڭ» دەپ كۇلەتىن ەدى. كۇندەردىڭ ءبىر كۇنىندە تەڭىزدىڭ ارعى بەتىنەن القىزىل جەلكەنى جەلبىرەپ جەتكەن كاپيتان گرەي سىپسىڭ ءسوز جايلاعان اۋىلداعى سول ءبىر ارۋدى ىزدەپ كەلگەندە, تۇرعىنداردىڭ كوزى تاس توبەسىنە شىقتى. باقىتسىزدار ەنتەلەگەن قوعامدا باقىتتى بولۋ مۇمكىن بە؟ ءسۇيىسپەنشىلىكتەن جۇرداي وتباسىندا ءسۇيكىمدى بالا وسە مە؟ سپەكتاكل ءمىنە وسىنداي سۇراقتارعا جاۋاپ ىزدەيدى. قويىلىم – رومانتيكالىق, ليريكالىق سيپاتىمەن جانە كەيىپكەرلەر اراسىنداعى قاراما-قايشىلىققا تولى كورىنىستەرمەن ەرەكشەلەنەدى.
سپەكتاكل دەكوراتسياسى باستان-اياق وزگەرىسسىز قالىپ, وقيعا وتەتىن ورىن اۋىساردا از-ماز بۋتافوريالىق دەتالدارمەن تولىقتىرىلادى. كورەرمەن نازارىنا ۇسىنىلعان ليريكالىق ديالوگتار مەن مۋزىكالىق تراكتوۆكاسى قويىلىمنان الاتىن ەستەتيكالىق جاعىمدى اسەردى ەسەلەي تۇسكەندەي. ۇتىمدى ميزانستسەنالار كەش بويى ءۇش-اق ورىندىق پەن جارىق قۇرالدارىنىڭ كومەگى ارقىلى اسەرلى ءارى كورنەكى جاسالعان.
«مۇنداي تاجىريبەلىك سپەكتاكل قازاقستاندا العاش رەت بولىپ وتىر. تەاتر ۇجىمىمەن بىرلەسىپ جۇمىس ىستەۋ قيىنعا سوققان جوق. بۇعان دەيىن مۇنداي تاجىريبەلىك قويىلىمداردى رەسەيدە 3-4 كۇندە جاساپ شىققانبىز», دەيدى رەجيسسەر س. پوتاپوۆ.
باس پارتيا ءاسسولدى ماريا باندىشەۆا سومداسا, ءاسسولدىڭ اكەسى لونگرەن ءرولىن تالانتتى اكتەر دەنيس اننيكوۆ الىپ شىقتى. سيقىرشى ەگل ءرولىندە يۆان انوپچەنكو, جاس كاپيتان گرەيدىڭ ءرولىندە دانيلا حومكو وينادى.
ايا ءومىرتاي,
«ەگەمەن قازاقستان»
