باسقوسۋعا ءماجىلىس دەپۋتاتتارى, تانىمال ساياساتتانۋشىلار, ازاماتتىق سەكتور وكىلدەرى, الەۋمەتتىك جەلىلەردى بەلسەندى پايدالانۋشىلار قاتىستى. شارانى ۇيىمداستىرۋشىلاردىڭ ايتۋىنشا, كاسىپوداقتار فەدەراتسياسى ورتالىقتا جانە جەرگىلىكتى جەرلەردە ازاماتتىق سەكتور, الەۋمەتتىك جەلىلەر, قوعامدىق پىكىردىڭ بەلسەندى كوشباسشىلارىن تارتۋ ارقىلى «مەدياتورلار پۋلىن» قۇرىپ, الەۋمەتتىك مەدياتسيا جۇمىستارىنىڭ ماڭىزدىلىعىن ارتتىرۋدى جوسپارلاۋدا.
جيىندى اشىپ, ءسوز سويلەگەن فەدەراتسيا توراعاسى ابىلعازى قۇسايىنوۆ مەملەكەت باسشىسى نۇرسۇلتان نازارباەۆتىڭ قازاقستان حالقىنا ارناعان جولداۋىندا ادامي كاپيتالدى دامىتۋ نەگىزگى باسىمدىقتاردىڭ ءبىرى رەتىندە اتاعاندىعىن ەسكە سالىپ ءوتتى. «بۇل پروتسەستە الەۋمەتتىك مەدياتسيا تەتىكتەرىن ەنگىزۋ قادامدارى ماڭىزدى ءرول اتقارادى. مەنىڭ ويىمشا, اتالعان ماسەلەنى قوعام اراسىندا سالماعى بار, ءوز ويىن اشىق ايتا الاتىن ازاماتتارمەن كەلىسە وتىرىپ شەشكەن وڭتايلى بولادى», دەدى ول.
شاراعا قاتىسۋشىلار ەلدەگى ادامي كاپيتالدى دامىتۋ مەن الەۋمەتتىك تۇراقتىلىقتى ساقتاۋ باعىتىندا ءبىرقاتار ناقتى شارالاردى ۇسىندى.
جاڭا قۇرىلعان كەڭەستىڭ باسشىلىعىنا بەلگىلى ساياساتتانۋشى ەرلان سايروۆ سايلاندى.
اسحات رايقۇل,
«ەگەمەن قازاقستان»
