ايدىن يەلەرى «ءا» دەگەننەن العا ۇمتىلىپ, نەبارى 30 سەكۋندتىڭ ىشىندە ەسەپ اشىپ ۇلگەردى. تالعات جايلاۋوۆ پەن ماكسيم بەلياەۆ جەتكىزگەن شايبانى يۆان يۆانوۆ قاقپاعا ءدال باعىتتادى. شىعىسقازاقستاندىقتاردىڭ تەگەۋرىندى شابۋىلىنان ابدىراپ قالعان قوناقتار وسىدان كەيىن بارىنشا ساق ويناۋعا تىرىسىپ باقتى. ناتيجەسىندە, «رۋبين» ساپىنان دميتري كلوپوۆ 14-مينۋتتا تارازى باسىن تەڭەستىرىپ كەتتى. بۇل تۇستا ولاردىڭ ءبىر حوككەيشىسى ارتىق بولعانىن ايتا كەتكەن ءجون. دەگەنمەن, ارادا بىرەر مينۋت وتەر-وتپەستە وسكەمەندىكتەر تاعى دا العا شىقتى. كەزدەسۋدىڭ 16-مينۋتىندا ەۆگەني بەلۋحين مەرگەندىگىمەن كوزگە ءتۇستى.
ەكىنشى كەزەڭنىڭ باستاپقى مينۋتتارى دا وسى باعىتتا وربىگەن ەدى. جەرلەستەرىمىز باسىمدىقتى ارتتىرۋ ءۇشىن قارسىلاستارىن قىسپاققا الۋمەن بولدى. بىراق, 29-مينۋتتان باستاپ ايدىنداعى جاعداي كۇرت وزگەرىپ سالدى. قوناقتار ساپىنان ۆيتالي كامەنوۆ ەسەپتى 2:2-گە جەتكىزدى. ايدارىنان جەل ەسكەن رەسەيلىكتەر ەكىنشى كەزەڭنىڭ سوڭىنا دەيىن «تورپەدونى» ەكى رەت قاپى قالدىردى. ماتچتىڭ 31-مينۋتىندا الەكساندر اكمالدينوۆ قاقپا ارتىنداعى شامدى تاعى ءبىر مارتە جارق ەتكىزسە, 38-مينۋتتا دميتري كلوپوۆ دۋبل يەسى اتانىپ, ويىنداعى سوڭعى نۇكتەنى قويدى.
كەزدەسۋدىڭ سوڭعى بولىگىندە جەرلەستەرىمىز جاعدايدى تۇزەۋ ءۇشىن ايانىپ قالمادى. يۆان يۆانوۆ, مايك دالحيۋزەن سىندى حوككەيشىلەردىڭ گول سالاتىن مۇمكىندىكتەرى بولعان ەدى. بىراق ولار كوزدەگەن ماقساتتارىنا جەتە المادى. ءسويتىپ, ماتچ 4:2 ەسەبىمەن «ءرۋبيننىڭ» پايداسىنا شەشىلدى.
سونىمەن, سەرياداعى جالپى ەسەپ 3:2 – «تورپەدو» الدا. قوس كوماندا اراسىنداعى التىنشى كەزدەسۋ ەرتەڭ تۇمەندە وتەدى. ەگەر, جەرلەستەرىمىز جەڭىسكە جەتەر بولسا, براتينا كۋبوگىنىڭ فينالىنا شىعادى. ال جەڭىلىپ قالعان جاعدايدا شەشۋشى ماتچ ءوسكەمەندە وتەدى.
ايان ءابدۋالي,
«ەگەمەن قازاقستان»
