ءبىزدىڭ بۇل ماسەلەنى قوزعاۋىمىزعا وڭىرلەردە بولىپ, سايلاۋشىلارمەن كەزدەسۋلەر ءوتكىزگەن كەزدە ولاردىڭ ەلىمىزدىڭ تاريحىنىڭ ماڭىزدى ماسەلەلەرىن كوتەرگەندىگى سەبەپ بولدى. ادامداردى قازىر تەك ەكونوميكانىڭ جاعدايى عانا قىزىقتىرمايدى, سونىمەن بىرگە, ولار تاريحي مۇرانى ساقتاۋعا دا مۇددەلىلىك تانىتىپ وتىر. وتكەن عاسىردىڭ وتىزىنشى جىلدارىنداعى جاپپاي ساياسي قۋعىن-سۇرگىننىڭ سالدارىنان ۇلتىمىزدىڭ كوپتەگەن ساياسي قايراتكەرلەرى مەن زيالى قاۋىمنىڭ تاڭداۋلى وكىلدەرى «حالىق جاۋى» دەگەن جالامەن اتىلىپ كەتتى جانە ۇزاق مەرزىمگە باس بوستاندىقتارىنان ايىرىلدى.
مىنە, وسىنداي قيلى زاماندا قازاق حالقى تاعدىر ءتالكەگىمەن قازاقستانعا كەلىپ باس ساۋعالاعان باسقا ەتنوس وكىلدەرىنە شىنايى قايىرىمدىلىق كورسەتىپ, ولاردىڭ ۇلتتىق مادەنيەتىنە, سالت-ءداستۇرىنە تولەرانتتىلىقپەن قاراپ, ءوز بويىنداعى عاجاپ گۋمانيستىك قاسيەتتەردى ايقىن تانىتتى. ەندەشە, وسى ايتىلعان جايلاردىڭ نەگىزىندە, «ماڭگىلىك ەل» پاتريوتتىق اكتىسىنە سايكەس جالپىۇلتتىق بىرلىكتى نىعايتۋ, قازاقستاندىق پاتريوتيزمدى قالىپتاستىرۋ جانە ورتاق تاريحي مۇرامىزدى ناسيحاتتاۋ ماقساتىندا ءمادەنيەت جانە سپورت, ءدىن ىستەرى جانە ازاماتتىق قوعام, ءبىلىم جانە عىلىم, اقپارات جانە كوممۋنيكاتسيالار مينيسترلىكتەرىنە, استانا جانە الماتى قالالارى مەن وبلىستاردىڭ اكىمدىكتەرىنە تومەندەگىدەي قوعامدىق-ساياسي شارالاردى وتكىزۋ تۋرالى تاپسىرما بەرىلۋىن ۇسىنامىز:
– ۇستىمىزدەگى جىلى حح عاسىردىڭ 30-40-جىلدارىنداعى جاپپاي ساياسي قۋعىن-سۇرگىننىڭ باستالعانىنا 80 جىل تولۋىنا ارنالعان عىلىمي-پراكتيكالىق كونفەرەنتسيالار ۇيىمداستىرۋ;
– ءبىلىم بەرۋ مەكەمەلەرىندە اشارشىلىق جانە جاپپاي ساياسي قۋعىن-ءسۇرگىننەن زارداپ شەككەن ادامدارمەن كەزدەسۋلەر جانە اشىق ساباقتار وتكىزۋ;
– جاپپاي ساياسي قۋعىن-ءسۇرگىن قۇرباندارىنىڭ ەسىمدەرىن ماڭگى ەستە قالدىرۋعا بايلانىستى ونوماستيكالىق جۇمىستى جانداندىرۋ جانە ولارعا ارنالعان مەموريالدار مەن ەسكەرتكىشتەر ورناتۋ جۇمىستارىن جالعاستىرۋ;
– كىتاپحانالاردا جاپپاي ساياسي قۋعىن-سۇرگىننەن زارداپ شەككەن ادامداردىڭ قاتىسۋىمەن وقىرماندار كونفەرەنتسيالارىن, اتالعان تاقىرىپ بويىنشا مۋزەيلەردە كورمەلەر ۇيىمداستىرۋ, كينوتەاترلاردا كوركەم جانە دەرەكتى فيلمدەردى كورسەتۋ, تەاترلاردا پەسالاردى ساحنالاۋ;
– وقۋشى جانە ستۋدەنت جاستاردىڭ «الجير» ساياسي قۋعىن-سۇرگىن جانە توتاليتاريزم قۇرباندارىنا ارنالعان مۋزەي-مەموريالدىق كەشەنىنە جانە باسقا مۋزەيلەرگە, سونداي-اق, جاپپاي ساياسي قۋعىن-ءسۇرگىنگە قاتىستى تاريحي ورىندارعا ەكسكۋرسيالارىن ۇيىمداستىرۋ;
– مەملەكەتتىك تاپسىرىستى ورىندايتىن بۇقارالىق اقپارات قۇرالدارىندا جاپپاي ساياسي قۋعىن-ءسۇرگىن جانە ودان قۇربان بولعاندار مەن زارداپ شەككەندەر تۋرالى تەلەراديوحابارلار مەن جاريالانىمدار دايىنداۋ كەرەك.
كارىباي مۇسىرمان,
ءماجىلىس دەپۋتاتى
