فورۋمعا تايلاندتىق 300-دەن استام كاسىپكەر قاتىستى. ولاردىڭ اراسىندا اۋىل شارۋاشىلىعى, ەنەرگەتيكا, حيميا ونەركاسىبى, تۋريزم, كولىك-لوگيستيكا, ماشينا جاساۋ جانە ونلاين-ساۋدا سالالارىنداعى تايلاندتىق جەتەكشى كومپانيالاردىڭ باسشىلارى بولدى.
جيىنعا قاتىسۋشىلار قازاقستان مەن تايلاند اراسىنداعى ساۋدا جانە ينۆەستيتسيالىق ىنتىماقتاستىقتىڭ نەگىزگى ۆەكتورلارىن, شىعىس پەن باتىس, سولتۇستىك پەن وڭتۇستىكتىڭ اراسىنداعى ترانزيتتىك حاب رەتىندەگى قازاقستاننىڭ كولىك-لوگيستيكالىق مۇمكىندىكتەرىن, سونداي-اق, استانادا وتەتىن ەكسپو-2017 حالىقارالىق مامانداندىرىلعان كورمەسىنە تايلاند تاراپىنىڭ قاتىسۋىن تالقىلادى.
فورۋم بارىسىندا تايلاندتىق رەسمي تۇلعالار مەن كاسىپكەرلەر قازاقستان پرەزيدەنتى نۇرسۇلتان نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا قامتىلعان باسىم باعىتتار جونىندە پىكىر الماستى.
قازاقستاننىڭ تايلاندتاعى توتەنشە جانە وكىلەتتى ەلشىسى مارات ەسەنباەۆ ەلىمىزدىڭ الەمنىڭ باسەكەگە قابىلەتتى 50 ەلىنىڭ قاتارىنا قوسىلعانىن اتاپ ءوتتى. «ەلىمىزدىڭ دامىعان 50 ەلدىڭ قاتارىنان كورىنۋى مەملەكەت باسشىسى نۇرسۇلتان نازارباەۆتىڭ ساليقالى ساياساتىنىڭ ارقاسىندا جۇزەگە استى. مەملەكەت باسشىسىنىڭ ءۇشىنشى جاڭعىرۋ جونىندەگى جولداۋى قازاقستاننىڭ وزىق 30 ەلدىڭ قاتارىنا قوسىلۋىنا كەڭىنەن جول اشادى», – دەگەن ەلشى تايلاندتىق ىسكەر توپ وكىلدەرىن قازاقستاننىڭ جاڭا ەكونوميكالىق مودەلىن جۇزەگە اسىرۋعا بەلسەندى قاتىسۋعا شاقىردى.
تايلاندتىڭ حالىقارالىق ساۋدانى دامىتۋ دەپارتامەنتى ديرەكتورىنىڭ ورىنباسارى سومدەت سۋسومبوون فورۋمدا قازاقستان مەن تايلاند كورولدىگى ءوزارا ىنتىماقتاستىقتىڭ جوعارى الەۋەتىنە يە ەكەنىن, سوندىقتان, ەكى ەلدىڭ كومپانيالارى بارلىق مۇمكىندىكتەردى ءتيىمدى پايدالانا وتىرىپ, ەكونوميكالىق قاتىناستاردى نىعايتۋى قاجەتتىگىن ءسوز ەتتى. «قازاقستانداعى ساياسي تۇراقتىلىق پەن ەل ۇكىمەتىنىڭ بيزنەس-كليماتتى جاقسارتۋ باعىتىنداعى شارالارى تايلاندتىق كاسىپكەرلەردىڭ قىزىعۋشىلىعىن وياتۋدا», – دەدى س.سۋسومبوون.
سونداي-اق, تايلاندتىڭ حالىقارالىق ساۋدانى دامىتۋ دەپارتامەنتى ديرەكتورىنىڭ ورىنباسارى ۇستىمىزدەگى جىلدىڭ ماۋسىم-ءشىلدە ايلارىندا ءوز ەلىنىڭ ساۋدا ءمينيسترى مەن ەنەرگەتيكا ءمينيسترى قازاقستانعا ساپارمەن باراتىنى جوسپارلانىپ وتىرعانىن جەتكىزدى.
جيىن بارىسىندا ەلىمىزدىڭ كولىك-لوگيستيكا سالاسىنداعى مۇمكىندىكتەرى جانە ترانزيتتىك الەۋەتى كەڭىنەن تانىستىرىلدى. وندا «KTZ Express» اق-تىڭ اتقارۋشى ديرەكتورى سەرگەي اناشكين مەن «ەير استانا» اۋە كومپانياسىنىڭ وكىلى مانشۇك قۋاتبايقىزى ءسوز سويلەدى.
فورۋم اياسىندا پانەلدىك وتىرىستار ۇيىمداستىرىلدى. وعان تايلاند ونەركاسىپشىلەرى فەدەراتسياسى باس حاتشىسىنىڭ ورىنباسارى اشوك ۋپاتا, تايلاندتىڭ شاعىن جانە ورتا بينەستى دامىتۋ ءوفيسى باس ديرەكتورىنىڭ ورىنباسارى اككارابحونگ سريسۋپانديت, تايلاندتىڭ تۋريزم باسقارماسىنىڭ ديرەكتورى يۋمپورن دجيراگالۆيسۋل جانە «Index Creative Village» كومپانياسىنىڭ اتقارۋشى ديرەكتورى كريەنگكرا كانچاناپوكين قاتىستى.
بيزنەس-فورۋم قورىتىندىسى بويىنشا, بيىلعى جازدا ساۋدا-ينۆەستيتسيا سالاسىنا قاتىستى تايلاندتىق 6 ميسسيانىڭ (150-دەن استام كومپانيا) قازاقستانعا ساپارىن جۇزەگە اسىرۋعا قاتىستى ۋاعدالاستىققا قول جەتكىزىلدى.
ايتا كەتەيىك, تايلاندتىق كومپانيالار قازاقستاندىق بيزنەس-قاۋىمداستىقپەن تىعىز بايلانىس ورناتۋعا مۇددەلى ەكەندەرىن بىلدىرۋدە. اسىرەسە, ولاردى قازاقستان ەكونوميكاسىنا ينۆەستيتسيا سالۋ جانە ەلىمىزگە كەلىپ بيزنەسپەن شۇعىلدانۋ ماسەلەلەرى قىزىقتىرۋدا.
