«وزدەرىڭىزگە بەلگىلى جەر سالاسىندا تۋىنداعان سۇراقتار بويىنشا ارنايى كوميسسيا جۇمىس جاساعان بولاتىن. قوعامدىق پىكىرلەردى سارالاي كەلە جەر رەفورماسى بويىنشا كوميسسيانىڭ جەر زاڭناماسىن جەتىلدىرۋ جونىندەگى دايىندالعان ۇسىنىستارىنا ءسايكەس, جەر كودەكسىنە كەلەسى وزگەرىستەر مەن تولىقتىرۋلار ەنگىزۋ قاراستىرىلادى. ولار – قازاقستاندىقتارعا اۋىلشارۋاشىلىق جەرلەرىن جالعا بەرۋ ينستيتۋتىن ساقتاۋ جانە جەتىلدىرۋ. قازاقستاندىقتارعا جالعا بەرىلەتىن اۋىلشارۋاشىلىق جەرلەرىنىڭ شەكتى (ەڭ جوعارى) مولشەرىن بەلگىلەۋ. ەستەرىڭىزدە بولسا, ءبىزدە اۋىلشارۋاشىلىق جەرلەرىن جالعا بەرۋدە شەكتەۋ بولماعان. قازىرگى تاڭدا بۇل كوتەرىلىپ وتىرعان اسا ماڭىزدى ماسەلەلەردىڭ ءبىرى بولىپ تابىلادى. سونىمەن قاتار, شەكارا ماڭىنداعى ايماقتاردا اۋىلشارۋاشىلىق جەرلەرىن بەرۋدىڭ تالاپتارىن قاتاڭداتۋ. جانە دە, حالىقتىڭ قاجەتتىلىكتەرىن قاناعاتتاندىرۋ ءۇشىن ەلدى مەكەندەر ماڭىنداعى جايىلىم الاڭدارىن انىقتاۋ. اتالعان ۇسىنىستاردى ەسكەرە كەلە اۋىل شارۋاشىلىعى مينيسترلىگى زاڭ جوباسىن ازىرلەپ, ءماجىلىسكە ۇسىنعان بولاتىن. ول قازىر جان-جاقتى تالقىلانۋدا.
سونىمەن قاتار ول, جەر كودەكسىندەگى تارتىپكە سايكەس اۋىل شارۋاشىلىعىنداعى جەرلەردى بەرۋ كونكۋرستىق نەگىزدە جۇزەگە اسىرىلاتىنىن تىلگە تيەك ەتتى.
«كونكۋرستى وتكىزۋ تۋرالى حابارلامانى بۇقارالىق اقپارات قۇرالدارىندا, اكىمدىكتەردىڭ جانە اۋىل شارۋاشىلىعى مينيسترلىگىنىڭ رەسمي ينتەرنەت-رەسۋرستارىندا جاريالايتىن بولامىز. ول ءۇشىن ەڭ ءبىرىنشى جەر ۋچاسكەلەرىن انىقتاپ الىپ, كونكۋرسقا قويۋدىڭ الدىندا, قوعامدىق كەڭەستىڭ كەلىسىمىنە جىبەرەدى. ولار جەرلەردىڭ قايسىسى كونكۋرسقا شىعارىلاتىنىن, قايسىسى حالىققا قاجەت ەكەنىن انىقتايدى. ونىڭ سحەماسىن جەرگىلىكتى اتقارۋشى ورگاندار جاسايتىن بولادى. جوعارىدا اتاپ ءوتكەن كونكۋرستىڭ كوميسسيا قۇرامىنىڭ 50 پايىزدان استامىن قوعامدىق كەڭەستىڭ مۇشەلەرى قۇرايتىن بولادى. ولار جىل سايىن جاڭارىپ وتىرادى. جانە دە, بەرىلەتىن جەرلەردىڭ ۇتىمدى پايدالانىلۋىن تەكسەرۋ ماقساتىندا, زاڭ جوباسىمەن تۇراقتى مونيتورينگ جۇرگىزۋ قاراستىرىلىپ وتىر. جالعا الۋدىڭ العاشقى 5 جىلىندا – جىل سايىن, كەلەسى كەزەڭدەردە سۋارمالى جەرلەرگە ءاربىر 3 جىلدا, ەگىستىك جەرلەرگە ءار 5 جىلدا ءبىر رەت مونيتورينگ جۇرگىزىلەدى», دەدى ول.
راۋان قايدار,
«ەگەمەن قازاقستان»
