جيىندى «استانا» حالىقارالىق قارجىلىق ورتالىعىنىڭ اتقارۋشى ديرەكتورى ساياسات نۇربەك اشىپ, جۇرگىزىپ وتىردى.
كەزدەسۋگە قاتىسقان قسزي ديرەكتورى زارەما شاۋكەنوۆا ءوزىنىڭ سوزىندە پرەزيدەنت نۇرسۇلتان نازارباەۆ قول قويىپ, 10 ناۋرىزدا كۇشىنە ەنگەن كونستيتۋتسيالىق رەفورمالاردى شارتتى تۇردە ءۇش كاتەگورياعا ءبولۋ كەرەكتىگىن اتاپ ءوتتى. ولار: پارلامەنت وكىلەتتىگىنىڭ ارتۋى; ۇكىمەتتىڭ جاۋاپكەرشىلىگى مەن وكىلەتتىگىنىڭ ءوسۋى; جانە ازاماتتار قۇقىقتارىنىڭ كەڭەيۋى; وسى ءۇش كاتەگوريانىڭ ارقايسىسى دا ەلدىڭ دەموكراتيالىق دامۋىنا جول اشاتىندىعىمەن ماڭىزدى ەكەندىگىن شەشەن ءوزىنىڭ سوزىندە دالەلدەپ بەرۋگە تىرىستى.
ساراپتامالىق كەزدەسۋگە قاتىسقان عىلىمي-زەرتتەۋ ينستيتۋتتارىنىڭ باسشىلارى, بەلگىلى قوعام جانە عىلىم قايراتكەرلەرى, ساراپشىلار كونستيتۋتسيالىق رەفورمانىڭ ماڭىزى مەن ءتيىمدىلىگىنە توقتالىپ, ءوز ويلارىن ورتاعا سالدى. سونىڭ ىشىندە ۇكىمەت پەن پارلامەنتتىڭ وكىلەتتىكتەرىنىڭ ارتقاندىعى ەلىمىزدە دامىپ كەلە جاتقان دەموكراتيالىق ۇدەرىستەرگە ساي ەكەندىگى اتالىنىپ ءوتتى. ەندىگى مىندەت كونستيتۋتسيالىق رەفورمانى ءتيىمدىلىكپەن ىسكە اسىرىپ, ونى قوعام دامۋىنا قىزمەت ەتكىزۋگە اتسالىسۋ ەكەندىگى جەتكىزىلدى.
«استانا» حالىقارالىق قارجى ورتالىعىنىڭ (احقو) جۇمىسى تۋرالى دا كەڭ كولەمدەگى اقپاراتتار ايتىلدى. بۇل ينستيتۋت مەملەكەت باسشىسىنىڭ باستاماسىمەن ەركىن قارجىلىق ايماق قۇرۋ ماقساتىمەن قۇرىلعانى ءسوز بولىپ, ەندى ونى كونستيتۋتسيالىق جاڭعىرۋعا سايكەس زاڭدىلىق تۇرعىدان جەتىلدىرۋ ماسەلەسى الدا تۇرعانى اتاپ ءوتىلدى. ول شەتەلدىك ينۆەستيتسيالاردى تارتۋ ماقساتىمەن قۇرىلعان. ءوزىنىڭ سوزىندە ساياسات نۇربەك حالىقارالىق قارجىلىق ورتالىقتار سانىنىڭ بۇگىنگى تاڭدا ارتىپ وتىرعانىن اتاي كەلىپ, ولاردىڭ اراسىنداعى باسەكەلەستىك تە ءوسىپ وتىرعانىن ءسوز ەتتى. بارلىق ەلدەردە شەتەلدىك ينۆەستورلار وزدەرىنىڭ ينۆەستيتسيالارىنىڭ قۇقىقتىق تۇرعىدان قورعالىپ, ساياسي تۇرعىدان كەپىلدىكتەر بەرىلۋىن قالايدى. ءبىزدىڭ ورتالىق وسى تالاپتىڭ ۇدەسىنەن شىعا ءبىلسە عانا باسەكەلەستىككە توتەپ بەرە الادى. سوندىقتان, احقو-نىڭ نەگىزگى مىندەتى حالىقارالىق قۇقىق شەڭبەرىندە ينۆەستيتسيالاردى قورعاۋدىڭ حالىقارالىق ستاندارتتارىن قامتاماسىز ەتۋ. ونىڭ بۇل مارتەبەسى كونستيتۋتسيانىڭ ارنايى نورماسىمەن بەكىتىلگەن, دەدى ول.
جاقسىباي سامرات,
«ەگەمەن قازاقستان»
