ەلباسىنىڭ قازاقستان حالقىنا «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋى اياسىندا دەنساۋلىق ساقتاۋ سالاسىنداعى نەگىزگى يننوۆاتسيالاردى, وتاندىق مەديتسينانى جاڭعىرتۋدىڭ باعىتتارىن ءتۇسىندىردى. جۇمىس ساپارى بارىسىندا مينيستر وبلىستىڭ مەديتسينالىق اكتيۆىمەن, مەديتسينالىق قىزمەت كورسەتۋ سالاسىنداعى كاسىپكەرلەرمەن كەزدەسىپ, رەسپۋبليكاداعى مىندەتتى الەۋمەتتىك مەديتسينالىق ساقتاندىرۋدى ەنگىزۋ شارالارى تۋرالى ءتۇسىندىردى.
ە. ءبىرتانوۆ جۇمىس ساپارىن قىزىلوردا وبلىسىنىڭ احۋالدىق ورتالىعى جاعدايىمەن تانىسۋدان باستادى. اتالعان ورتالىق ءوڭىردىڭ قوعامدىق-ساياسي احۋالىنىڭ ماكروەكونوميكالىق كورسەتكىشتەرىن بولجاۋمەن, الەۋمەتتىك-ەكونوميكالىق دامۋ مونيتورينگىن تالداۋمەن اينالىسادى. ە. ءبىرتانوۆ ورتالىقتىڭ جۇمىسىمەن تانىسۋمەن قاتار, «دەنساۋلىق ساقتاۋ» جۇيەسىنىڭ تارماقتارىنا نازار اۋداردى.
«جۇيەنىڭ اتالمىش تارماعى اۋرۋ مەن ءولىم-ءجىتىمنىڭ جالپى كورسەتكىشتەرىن ايماقتار بويىنشا باقىلاۋ جانە سالىستىرمالى تالداۋلار جاساپ, انا مەن بالا ءولىمىنىڭ سەبەپتەرىن, الەۋمەتتىك ماڭىزى بار اۋرۋلار, ەپيدەميولوگيالىق جاعداي مەن الدىن الۋ شارالارىن جەدەل باقىلايدى جانە ءوڭىردىڭ مەديتسينالىق مەكەمەلەرىنىڭ احۋالىن قاداعالاۋدى قامتاماسىز ەتەدى», - دەپ حابارلادى ورتالىق باسشىسى ينديرا اقجىگىتوۆا.
سونداي-اق, ە. ءبىرتانوۆ ايماقتىڭ مەديتسينا قىزمەتكەرلەرىمەن كەزدەسىپ, ەلباسى جولداۋىندا دەنساۋلىق ساقتاۋ سالاسى بويىنشا بەرىلگەن تاپسىمالاردى ورىنداۋ بارىسى تۋرالى جانە مىندەتتى الەۋمەتتىك مەديتسينالىق ساقتاندىرۋ جۇيەسى تۋرالى كەڭىنەن ءتۇسىندىرۋ جۇمىستارىن جۇرگىزۋ جونىندە ءسوز قوزعادى.
«2016 جىلى مەدتسينا سالاسىنىڭ قىزمەتكەرلەرىنە, جەرگىلىكتى تۇرعىندار مەن جۇمىس بەرۋشىلەرگە ەنگىزىلگەن وزگەرىستەردى ءتۇسىندىرۋ جۇمىستارى جۇرگىزىلدى. ارنايى شتابتار قۇرىلىپ, باق ارقىلى اقپاراتتاندىرۋ شارالارى بەلسەندى تۇردە جۇزەگە اسىرىلدى», -دەدى وبلىس اكىمى ق. كوشەرباەۆ جينالىستاعى كىرىسپە سوزىندە.
قر دەنساۋلىق ساقتاۋ ءمينيسترى شەكتەۋلى مەرزىم ارالىعىندا ءمامس جۇيەسىن ەنگىزۋ جونىندەگى اقپاراتتاندىرۋ-ناسيحاتتاۋ جۇمىستارىن كۇشەيتۋ قاجەت ەكەندىگىن ايتا كەلىپ, 5 ءساۋىر مەن 31 ماۋسىم ارالىعىندا ەلىمىزدە جاپپاي ەمحاناعا تىركەلۋ ناۋقانى جۇزەگە اسىرىلاتىنىن اتاپ ايتتى.
سونداي-اق, قر ازاماتتارى قوسىمشا مەديتسينا قىزمەتتەرى نەمەسە اقىلى مەديتسينا قىزمەت تۇرلەرىن (اقىلى پالاتا, قىمبات دارىلەردى بىرلەسە وتىرىپ ساتىپ الۋ, ناۋقاستىڭ قالاۋى بويىنشا تەكسەرىلۋ جانە ت.ب.), ەرىكتى مەديتسينالىق ساقتاندىرۋ (ەمس) نەمەسە تەگىن مەديتسينا قىزمەت تۇرلەرىن قابىلداۋعا قۇقىلى.
«قر زاڭىنا سايكەس, مەديتسينالىق ساقتاندىرۋ جۇيەسى قر تۇرعىلىقتى ازاماتتارى مەن قازاقستاندا تۇراتىن, جۇمىس ىستەيتىن شەتەل ازاماتتارىنا دا مىندەتتى بولىپ تابىلاتىنىنا نازارلارىڭىزدى اۋدارعىم كەلەدى. بۇل - قازاقستاندا تۇراتىن ءار ادامعا, شەتەلدە تۇراتىن ءار قازاقستاندىققا مەملەكەتتەن نەمەسە جۇمىس بەرۋشىدەن, ازاماتتىڭ ءوز قارجىسىنان ءامس قورىنا جارنا نەمەسە تولەم اۋدارىلۋى ءتيىس دەگەندى بىلدىرەدى», - دەدى ۆەدوموستۆو باسشىسى.
ءارى قاراي ە. ءبىرتانوۆ №2 قالالىق ەمحانانىڭ جوباسى بويىنشا دەنساۋلىق ساقتاۋ باسقارماسى مەن «قىزىلوردا شيپاجايى» جشس اراسىنداعى مەملەكەتتىك-جەكەمەنشىك ارىپتەستىك نەگىزىندە ءوزارا كەلىسىمشارتقا قول قويۋ شاراسىنا قاتىستى. وبلىستا مەملەكەتتىك-جەكەمەنشىك سەرىكتەستىك اياسىندا دەنساۋلىق ساقتاۋ بويىنشا 6 جوبا ماقۇلداندى, ونىڭ ىشىندە №2,4 ەمحانالار جانە 4 دارىگەرلىك امبۋلاتوريالار جۇمىس اتقارۋدا.
