نۇرسۇلتان نازارباەۆ كەزدەسۋگە قاتىسۋشىلاردى قۇتتىقتاپ, بۇل ءىس-شارانىڭ بيىل ماۋسىمدا استانادا بولاتىن شانحاي ىنتىماقتاستىق ۇيىمىنىڭ ءسامميتى قارساڭىندا ءوتۋىنىڭ ماڭىزدىلىعىنا توقتالدى.
– ءبىز سانكت-پەتەربۋرگتەگى وقيعاعا بايلانىستى بۇكىل رەسەي حالقىنا كوڭىل ايتامىز. بۇل تەرروريزم مەن ەكسترەميزمنىڭ شەكارا دەگەندى بىلمەيتىنىن كورسەتەدى, سىن-قاتەر مەن قاۋىپ ازايماي تۇر. وسىعان بايلانىستى مەملەكەتتەر باسشىلارى قاۋىپسىزدىك كەڭەستەرى حاتشىلارىنىڭ قىزمەتىنە ەرەكشە ءمان بەرىپ وتىر, – دەدى مەملەكەت باسشىسى.
قازاقستان پرەزيدەنتى شانحاي ىنتىماقتاستىق ۇيىمىنىڭ قازىرگى ىنتىماقتاستىق تەتىكتەرى مەن نورماتيۆتىك قۇقىقتىق بازاسىن نىعايتۋ ءىسىنىڭ ماڭىزدىلىعىنا قاتىسۋشىلار نازارىن اۋداردى.
سونداي-اق, نۇرسۇلتان نازارباەۆ شانحاي ىنتىماقتاستىق ۇيىمىنا قاتىسۋشى ەلدەردىڭ ەكونوميكالىق جانە ساياسي بايلانىستاردى نىعايتۋ جولىندا اتقارعان جۇمىستارىنا وڭ باعا بەردى.
بۇدان بولەك, مەملەكەت باسشىسى ۇيىم الدىندا تۇرعان مىندەتتەرگە ەرەكشە توقتالدى.
– بۇل – قاتىسۋشى ەلدەردىڭ بارلىق باعىت بويىنشا كەلىسىلگەن ءىس-قيمىلى. قازىرگى ۋاقىتتا شانحاي ىنتىماقتاستىق ۇيىمىنىڭ ەكسترەميزمگە قارسى ارەكەت ەتۋ جونىندەگى كونۆەنتسيا مەن شانحاي ىنتىماقتاستىق ۇيىمىنىڭ حالىقارالىق تەرروريزمگە قارسى بىرلەسكەن ءىس-قيمىل جونىندەگى مالىمدەمەسى قارالۋدا. بۇل قۇجاتتاردى قىسقا مەرزىم ىشىندە ماقۇلداۋ قاجەت, – دەدى قازاقستان پرەزيدەنتى.
نۇرسۇلتان نازارباەۆ شانحاي ىنتىماقتاستىق ۇيىمىنىڭ استاناداعى سامميتىندە ءۇندىستان مەن پاكىستاندى ۇيىمنىڭ تولىققاندى مۇشەسى رەتىندە قابىلداۋ جوسپارلانىپ وتىرعانىن جانە ونىڭ ازياداعى ىنتىماقتاستىقتى نىعايتۋعا قوسىمشا تىڭ سەرپىن بەرەتىنىن ايتتى.
– شانحاي ىنتىماقتاستىق ۇيىمىنىڭ بىرىككەن ۇلتتار ۇيىمى, ۇجىمدىق قاۋىپسىزدىك تۋرالى شارت ۇيىمى, ازياداعى ءوزارا ءىس-قيمىل جانە سەنىم شارالارى جونىندەگى كەڭەس سياقتى حالىقارالىق جانە وڭىرلىك قۇرىلىمدارمەن ىنتىماقتاستىعى اياسىن كەڭەيتۋ قاجەت. بۇل وسى ۇيىمدى ودان ءارى دامىتۋعا ىقپال ەتەدى دەپ ويلايمىز, – دەدى قازاقستان پرەزيدەنتى.
مەملەكەت باسشىسى قازاقستاننىڭ 2017-2018 جىلدار كەزەڭىندەگى بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە حالىقارالىق بەيبىتشىلىك پەن قاۋىپسىزدىكتى نىعايتۋعا ەلەۋلى ۇلەس قوسىپ وتىرعانىن ايتتى. ماسەلەن, سيرياداعى داعدارىستى ساياسي رەتتەۋ ىسىنە كۇش-جىگەر جۇمسالىپ جاتقانى ايتىلۋدا.
كەزدەسۋگە قازاقستاننىڭ, قىرعىزستاننىڭ, رەسەيدىڭ, تاجىكستاننىڭ قاۋىپسىزدىك كەڭەستەرىنىڭ حاتشىلارى – ۆ.جۇماقانوۆ, ت.دجۋماكادىروۆ, ن.پاترۋشەۆ, ا.كاحاروۆ, قىتاي حالىق رەسپۋبليكاسىنىڭ قوعامدىق قاۋىپسىزدىك ءمينيسترى – مەملەكەتتىك كەڭەس مۇشەسى گو شەنكۋن, شانحاي ىنتىماقتاستىق ۇيىمىنىڭ باس حاتشىسى ر.اليموۆ, شانحاي ىنتىماقتاستىق ۇيىمى وڭىرلىك انتيتەررورلىق قۇرىلىمىنىڭ اتقارۋشى كوميتەتىنىڭ ديرەكتورى ە.سىسوەۆ قاتىستى.
قاۋىپسىزدىك كەڭەستەرىنىڭ استاناداعى ءىس-شاراسى قازاقستاننىڭ شانحاي ىنتىماقتاستىق ۇيىمىنا توراعالىعى اياسىندا وتكىزىلۋدە. ول شانحاي ىنتىماقتاستىق ۇيىمىنا مۇشە مەملەكەتتەر باسشىلارىنىڭ بيىلعى ماۋسىمعا جوسپارلانعان كەڭەسىنە دايىندىقتىڭ ماڭىزدى كەزەڭى بولىپ سانالادى.
