ش.ايمانوۆ اتىنداعى «قازاقفيلم» اق جارىققا شىعارعان «قۇنانباي» جانە «جاڭعاق تال» فيلمدەرى قىتايدىڭ استاناسىندا وسى جىلى 19-21 ءساۋىر ارالىعىندا وتەتىن حالىقارالىق بەيجىڭ كينوفەستيۆالىنىڭ (Beijing International Film Festival) «پانوراما» باعدارلاماسىندا كورسەتىلەتىن بولادى.
«فيلم كوپتەگەن فەستيۆالدەرگە قاتىسىپ, تانىلىپ جاتقانىنا وتە قۋانىشتىمىن. كارتينانىڭ جەلىسى مەيىرىمگە تولى, سوندىقتان دا قىتايلىق كورەرمەندەردىڭ كوڭىلىنەن شىعاتىنىنا سەنىمدىمىن», - دەدى «جاڭعاق تال» ءفيلمىنىڭ رەجيسسەرى ەرلان نۇرماعامبەتوۆ.
ەستەرىڭىزگە سالا كەتسەك, «جاڭعاق تال» ءفيلمى وڭتۇستىك كورەياداعى پۋسان فەستيۆالىندە الەمدىك پرەمەراسىن وتكىزىپ, وندا New Currents («جاڭا اعىم») سەكتسياسى اياسىندا باس جۇلدەنى يەمدەنگەن بولاتىن. سونىمەن قاتار, اتالمىش كارتينا ۆەزۋلدەگى ازيا كينولارى 22-ءى حالىقارالىق كينوفەستيۆالىنىڭ نەگىزگى بايقاۋىندا كورسەتىلىپ (فرانتسيا, 2016 ج.), ەكى بىردەي جۇلدەگە – حالىقارالىق قازىلاردىڭ ارناۋلى جۇلدەسىنە جانە كينو سىنشىلارىنىڭ ارناۋلى جۇلدەسىنە يە بولدى.
«وسىدان بىرنەشە جىل بۇرىن مارقۇم تالاسبەك اسەمقۇلوۆ ەكەۋىمىز «ءبىرجان سال» فيلمىمەن قىتايعا ارنايى بارىپ ەدىك. كورسەتىلىمگە 500-گە جۋىق حالىق قاتىستى, ولاردىڭ اراسىندا قازاقتار دا بولدى. ءفيلمدى وتە كەرەمەت قابىلدادى. تاريحتان سىر شەرتەتىن ءفيلمىمىز قىتايلىق كورەرمەندەرگە ۇنايدى دەگەن ويدامىن», - دەدى «قۇنانباي» ءفيلمىنىڭ رەجيسسەرى دوسحان جولجاقسىنوۆ.
ۇلى ويشىل ابايدىڭ اكەسى – قۇنانباي وسكەنباي ۇلىنىڭ ءومىرى جايلى باياندايتىن تاريحي تۋىندى ەلىمىز بويىنشا پروكاتقا 2015 جىلى شىعىپ, كورەرمەننىڭ كوزايىمىنا اينالعان بولاتىن. اتالمىش فيلم قر پرەزيدەنتى ن.ءا.نازارباەۆتىڭ جانە مەملەكەت تاراپىنان دا جوعارى باعاسىن الدى. ەلباسى قر تاۋەلسىزدىك كۇنىن تويلاۋ قارساڭىندا 2016 جىلدىڭ ادەبيەت پەن ونەر سالاسى بويىنشا مەملەكەتتىك سىيلىقتى ءفيلمنىڭ ءتۇسىرۋ توبىنا ۇلەستىردى. جارلىققا سايكەس پرەميا رەجيسسەر – دوسحان جولجاقسىنوۆقا, قويۋشى سۋرەتشى – رۋستام وديناەۆقا, سونىمەن قاتار اكتەرلەر – نۋرسيفات سالىقوۆاعا جانە ايدوس بەكتەمىرگە بەرىلدى.
سونىمەن قاتار, العاشقى ۇلتتىق «تۇلپار» كينوپرەمياسىندا ءفيلمنىڭ اۆتورلارى ۇزدىك اتانىپ, «ۇزدىك ەر ادام ءرولى», «ۇزدىك قويۋشى سۋرەتشى», «ۇزدىك كومپوزيتور», «ۇزدىك ستسەناري» اتالىمدار بويىنشا ءتورت بىردەي جۇلدەگە قول جەتكىزدى. ودان بولەك, ۋفادا وتكەن III حالىقارالىق ۇلتتىق جانە ەتنيكالىق كينو «كۇمىس اقبوزات» فەستيۆالىندە ء امىر ابدىرازاقوۆ اتىنداعى «ۇلتتىق رۋح» جۇلدەسىن يەلەنگەن.
بەيجىڭ حالىقارالىق كينوفەستيۆالى قىتايدىڭ بايلانىس, راديو, كينەماتوگرافيا جانە تەلەارنالار باس باسقارماسى جانە بەيجىڭنىڭ مۋنيتسيپاليتەت حالىق ۇكىمەتى, سونداي-اق قىتايدىڭ كينو جونىندەگى باسقارماسىنىڭ ۇيىمداستىرۋىمەن وتكىزىلەدى. بايقاۋ ۇيىمداستىرۋشىلارىنىڭ ايتۋىنا قاراعاندا, بەيجىڭ فەستيۆالى جىلدان جىلعا دامىپ, بۇگىندە ازيادا ءوتىپ جاتقان كينوفەستيۆالدەردىڭ الدىندا تۇر.
بيىل بايقاۋعا 90 ەلدەن 1000-عا جۋىق كينوتۋىندىلار قاتىسىپ وتىر. ولاردىڭ ىشىنەن نەگىزگى باعدارلاماعا 15 فيلم ىرىكتەلىپ الىنعان. كونكۋرستىق بايقاۋعا ۇسىنىلعان فيلمدەردىڭ ۇزدىگىن بەلگىلى دات رەجيسسەرى بيلل اۆگۋستتىڭ باسشىلىعىمەن حالىقارالىق قازىلار القاسى انىقتايتىن بولادى.
