قازاقستاننىڭ بۇل ەلمەن اراداعى ديپلوماتيالىق قارىم-قاتىناسىنىڭ نەگىزى 1992 جىلدىڭ 28 قاڭتارىندا قالانعان. 1993 جىلى كورەيا رەسپۋبليكاسىنىڭ قازاقستانداعى, ال 1996 جىلى قازاقستاننىڭ كورەيا رەسپۋبليكاسىنداعى ەلشىلىكتەرى اشىلدى. سول ۋاقىتتان بەرى ەكى ەلدىڭ ءارىپتەستىك الەۋەتىن ارتتىراتىن تەتىكتەر نىعايا ءتۇستى. وعان مەملەكەتتەر باسشىلارىنىڭ جوعارى دەڭگەيدەگى كەزدەسۋلەرى دە ىقپال ەتكەنى انىق.
قوس تاراپ اراسىنداعى بايلانىستىڭ بەكۋىنە ساۋدا-ەكونوميكالىق ىقپالداستىقتىڭ قوسقان ۇلەسى زور. ماسەلەن, 2016 جىلى قازاقستان مەن وڭتۇستىك كورەيا اراسىنداعى تاۋار اينالىمى 676,7 ميلليون اقش دوللارىن قۇراعان ەكەن. ونىڭ 223,5 ميلليون اقش دوللارى – ەكسپورتتىڭ, 453,1 ميلليون اقش دوللارى يمپورتتىڭ ەنشىسىندە. وتكەن جىلدىڭ قاراشا ايىندا قازاقستان پرەزيدەنتى نۇرسۇلتان نازارباەۆتىڭ وڭتۇستىك كورەياعا مەملەكەتتىك ساپارى اياسىندا بولاشاقتا دا ساۋدا سالاسىنا ايرىقشا كوڭىل بولىنەتىنى, سايكەسىنشە, تاۋار اينالىمىنىڭ كولەمى دە ارتاتىندىعى, بۇل رەتتە, قوس مەملەكەت اراسىندا ناقتى جوبالاردىڭ قولعا الىنعانى ايتىلعان بولاتىن. بريفينگتە سويلەگەن ءسوزىندە دۋلات باقىشەۆ تە ساۋدا-ەكونوميكالىق جانە باسقا دا سالالار بويىنشا ىنتىماقتاستىقتى دامىتۋعا ۇلكەن مۇمكىندىك بار ەكەنىن اتاپ ءوتتى.
«جالپى, 2017 جىل – ەكىجاقتى قارىم-قاتىناستىڭ ورىستەۋى ءۇشىن وتە ماڭىزدى جىل. سەبەبى, بيىل ديپلوماتيالىق بايلانىستىڭ ورناعانىنا 25 جىل تولىپ وتىر. وسى ۋاقىت ء ىشىندە اۋقىمدى جۇمىستار اتقارىلدى. تاراپتار اراسىنداعى بايلانىستىڭ نىعايۋىنا ەلىمىزدەگى كورەي دياسپوراسى دا ۇلەس قوسۋدا. بۇلاردىڭ بارلىعى ءبىزدىڭ دامۋدىڭ كەلەسى, جاڭا كەزەڭىنە اياق باسقانىمىزدى بىلدىرەدى. قازىر ەكونوميكالىق بايلانىستار بەلسەندى تۇردە دامىپ كەلەدى. بۇل باعىتتا ەكىجاقتى جوبالار بار. مادەني-گۋمانيتارلىق سالاداعى ارىپتەستىكتە دە وڭ ديناميكا بايقالادى. وسى تۇرعىدان كەلگەندە, ءبىزدى ەكى ەل پرەزيدەنتتەرىنىڭ, ۇكىمەت باسشىلارىنىڭ كەلىسسوزدەرى اياسىندا قابىلدانعان قۇجاتتاردى ىسكە اسىرۋ بويىنشا اۋقىمدى جۇمىستار كۇتىپ تۇر», – دەدى د. باقىشەۆ.
ەلشى سەۋلدىڭ استانادا وتەتىن ەكسپو-2017 حالىقارالىق كورمەسىنە دە ايرىقشا قىزىعۋشىلىق تانىتىپ وتىرعانىن جەتكىزدى. «سەۋل بۇل كورمەگە بەلسەندى تۇردە قاتىسىپ, بالامالى ەنەرگەتيكا سالاسىنداعى ءوزىنىڭ جەتىستىكتەرىن جان-جاقتى كورسەتەدى دەپ ويلايمىز», – دەدى ول.
نەگىزىنەن, كورەيا رەسپۋبليكاسىنا شىعارىلاتىن قازاقستاندىق ەكسپورتتىڭ باستى تاۋارلارى – ۋران, تازا بولات, تەمىر, التىن, مىس بولسا, ال بىزگە ول ەلدەن كەلەتىن يمپورتتىق ونىمدەر – ەلەكترونيكا, كولىكتەردىڭ قۇرال-جابدىقتارى. قازاقستاندا وڭتۇستىك كورەيا كاپيتالىنىڭ قاتىسۋىمەن 900-دەن استام ءبىرلەسكەن كاسىپورىن تىركەلگەن. ماسەلەن, بۇگىندە ەلىمىزدە «Samsung C&T», «LG Electronics», «LG Chem», «SK Corporation», «Hyundai», «POSCO» سەكىلدى كاسىپورىندار مەن «Dong Il Highville», «Urim», «كىكدونگ كونسول» سياقتى قۇرىلىس فيرمالارى جۇمىس ىستەيدى.
ءلايلا ەدىلقىزى,
«ەگەمەن قازاقستان»
