قازاقستان باسشىسى نۇرسۇلتان نازارباەۆتىڭ ازەربايجانعا رەسمي ساپارى تۋرالى ەكى ەلدىڭ بۇقارالىق اقپارات قۇرالدارى جان-جاقتى اقپارات بەردى. سونىڭ ىشىندە ازەربايجان ازەرتادج اقپارات اگەنتتىگى بۇل كەزدەسۋلەر تۋرالى جەتى تىلدە 50-دەن اسا اقپارات تاراتتى. مەملەكەت باسشىلارى دەڭگەيىندەگى كەزدەسۋدە ازەربايجان پرەزيدەنتى يلحام اليەۆ «قازاقستان الەمدەگى قۋاتتى مەملەكەتتەردىڭ بىرىنە اينالدى», دەدى.
قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە كىرگەنىن ازەربايجان باسشىسى جوعارى باعالادى. قازاقستان رەسپۋبليكاسىنىڭ تەك وڭىرلىك ەمەس, الەمدىك دەڭگەيدەگى ماسەلەلەردى شەشۋدەگى ارااعايىندىق باستامالارىنىڭ ءوز جەمىسىن بەرە باستاعانىنا توقتالدى. قازاقستان باسشىسى ەكى ەل اراسىندا ەشبىر ءتۇيىندى ماسەلە جوق ەكەنىن ايتتى. «قازاقستاندا ءومىر ءسۇرىپ جاتقان 130 مىڭ ازەربايجان ەتنوسى ەكى ەل اراسىنداعى ساۋدا قاتىناستارىنىڭ دامۋىنا ۇلەس قوسىپ جاتىر», دەدى نۇرسۇلتان نازارباەۆ.
ال ەلدىڭ باس گازەتى «ازەربايجان» باسىلىمى قازاقستان پرەزيدەنتى نۇرسۇلتان نازارباەۆتىڭ گەيدار اليەۆ وردەنىمەن ماراپاتتالعانىن حابارلادى. جانە بۇل وردەننىڭ ازەربايجانعا ەڭ جاقىن مەملەكەتتەر باسشىلارىنا عانا بەرىلەتىنىن جازدى. ماراپاتتاۋ راسىمىندە نۇرسۇلتان نازارباەۆ: «1979 جىلدان بەرى گەيدار اليەۆپەن وتە جاقىن بايلانىستا بولدىق. كەڭەس وكىمەتى كەزىندە ءۇلكەن ساياساتتا بولعان تۇلعاعا دەگەن سەنىمىم زور ەدى. ونىڭ قولداۋىن دا سەزىنەتىنمىن. بيىل قوس مەملەكەتتىڭ ديپلوماتيالىق قاتىناسىنىڭ 25 جىلدىعىن اتاپ ءوتىپ جاتىرمىز. مەن قازىر گەيدار اليەۆپەن ءوزارا جاساسقان كەلىسىمدى ىسكە اسىرۋ ۇستىندەمىن, – دەدى.
ازەربايجاننىڭ تاعى ءبىر بەدەلدى باسىلىمى «مۋساۆات» گازەتى «نازارباەۆتىڭ باكۋ ساپارىنىڭ تۇپكى ءمانى» اتتى ماقالا جاريالادى. «تاۋەلسىزدىك العاننان كەيىن تۇركى مەملەكەتتەرى اراسىندا ازەربايجانمەن تىعىز قارىم-قاتىناس ورناتقان جالعىز مەملەكەت بولسا, ول – قازاقستان. قازىرگى تاڭدا قوس مەملەكەت بارلىق سالاداعى قارىم-قاتىناستى جوعارى دەڭگەيگە جەتكىزدى. بۇعان نۇرسۇلتان نازارباەۆ پەن مارقۇم گەيدار اليەۆتىڭ اراسىنداعى دوستىق, ديپلوماتيالىق قارىم-قاتىناس نەگىز بولدى. وسى ۋاقىت ارالىعىندا قازاقستان ءار سالادا ازەربايجانعا ۇلكەن قولداۋ كورسەتىپ كەلەدى. سونىڭ ءبىرى – نۇرسۇلتان نازارباەۆتىڭ تۇركى مەملەكەتتەرى اراسىندا ورتاق نارىق قۇرۋ تۋرالى باستاماسى. ازەربايجاننىڭ مەملەكەتتىك شەكاراسىن مىقتاۋىنا دا قازاقستان پرەزيدەنتىنىڭ قوسقان ۇلەسى زور. سونىمەن قاتار, ساۋدا-ەكونوميكالىق سالالاردا دا نۇرسۇلتان نازارباەۆ قوس مەملەكەتتىڭ قاتىناسىنا باسىمدىق بەرىپ كەلەدى. بۇل تۇرعىدا قازاقستاننان الارىمىز مول. ەكونوميكالىق قاتىناستار ۋاقىت وتكەن سايىن جاڭا دەڭگەيگە كوتەرىلە بەرمەك», دەپ جازادى باسىلىم.
ال Publika.az سايتى نۇرسۇلتان نازارباەۆتىڭ باكۋ ساپارىنا ەرەكشە نازار اۋدارعان. ونداعى ماقالادا ۇجىمدىق قاۋىپسىزدىك كەلىسىمى مەن ەۋرازيالىق ەكونوميكالىق وداقتا ماڭىزدى ورىنعا يە رەسمي استانانىڭ قولداۋىن ازەربايجاننىڭ ەرەكشە سەزىنىپ وتىرعانى ايتىلادى. ازەربايجاننىڭ مەملەكەتتىك اقپارات قۇرالدارىنان بولەك Sputnik, «ازاتتىق راديوسى», BBC Azeri, «امەريكا داۋىسى» سەكىلدى شەتەلدىك باسىلىمدار دا قوس مەملەكەت اراسىنداعى بايلانىستى جوعارى باعالاپ, نۇرسۇلتان نازارباەۆتىڭ رەسمي ساپارىنا ەرەكشە كوڭىل اۋداردى. سونىڭ ىشىندە ەلباسىنىڭ باۋىرلاس مەملەكەتتەر تاۋەلسىزدىگىن نىعايتۋ جولىنداعى ەڭبەگى ەرەكشە اتالعان. جالپى, قازاقستان پرەزيدەنتىنىڭ ءتۇبى ءبىر تۇركى مەملەكەتتەرىنىڭ بىرلىگىنە ولشەۋسىز ۇلەس قوسىپ كەلە جاتقانى ءسوز بولعان.
فيزۋلي مەدجيدلي,
ارنايى «ەگەمەن قازاقستان» ءۇشىن
