ساراپشىلاردىڭ ايتۋىنشا, شابۋىلدىڭ نەگىزگى ماقساتى ليۆيا كوسەمى مۋاممار كاددافيدىڭ كوزىن قۇرتۋ بولعان. ليۆيالىق وپپوزيتسيا بەيبىت كەلىسىمنىڭ باستالۋىن كاددافيدىڭ ءۇزىلدى-كەسىلدى كەتۋىمەن بايلانىستىرىپ وتىرعاندىقتان, ونى جويۋ جانجالدى بەيبىت شەشۋ جولىنداعى كەدەرگىلەردى الىپ تاستار ەدى. زىمىراندىق-بومبالىق سوققىنىڭ ۇكىمەت عيماراتتارى ورنالاسقان اۋدانعا باعىتتالعانىنا قاراماستان كاددافي ودان زارداپ شەكپەگەن كورىنەدى.
ريم پاپاسى بەيبىتشىلىككە شاقىردى
كاتوليكتەر مەن پراۆوسلاۆيەلىكتەر بيىل ءبىر كۇندە اتاپ ءوتىپ وتىرعان يسانىڭ جارقىن جەكسەنبىسى كۇنىندە ريم پاپاسى بەنەديكت حVI ونداعان مىڭ دىندارلارعا ارناپ ءسوز سويلەدى. كوكتىڭ ءجۇزى بەيبىتشىلىك پەن قۋانىشقا بولەنۋدە, بىراق كەدەيشىلىك, اۋرۋ مەن اشارشىلىق جايلاعان جەرگە قاتىستى ونى ولاي ايتا المايسىڭ, دەپ اتاپ ءوتتى بەنەديكت حVI. ول سولتۇستىك افريكا مەن تاياۋ شىعىس ەلدەرىندەگى, ونىڭ ىشىندە ليۆياداعى بۇگىندە ورىن العان جاعدايعا باسا نازار اۋداردى. پونتيفيك ليۆياداعى ديپلوماتيا مەن ۇنقاتىسۋدىڭ قارۋلى قاقتىعىستاردى الماستىراتىنىنا ءوز سەنىمىن ءبىلدىردى. ول سول سياقتى تۋعان جەرلەرىن تاستاپ كەتۋگە ءماجبۇر بولعان بوسقىندارمەن جانە ەميگرانتتارمەن ءوزىنىڭ ىنتىماقتاس ەكەنىن جەتكىزدى.
وباماعا ەكى جاق تا رەنجۋلى
اقش پرەزيدەنتى باراك وباما ءوزى بيلىككە كەلگەن كەزدەن باستاپ ءۇشىنشى رەت وتكەن عاسىردىڭ باسىندا قىرعىنعا ۇشىراعان ارميان قۇرباندارىن ەسكە الۋ كۇنىنە وراي اقش-تاعى ارميان قاۋىمداستىعىنا ءداستۇرلى جولداۋىن ارنادى. ءوزىنىڭ جازباشا جولداۋىندا اقش پرەزيدەنتى وسماندىق تۇركيانىڭ 1,5 ميلليون ارمياندى قىرۋىن «حح عاسىرداعى ەڭ ۇلكەن قىلمىستاردىڭ ءبىرى» دەپ اتادى. سول سياقتى ول تاريحتىڭ داۋلى بەتتەرىنىڭ تۇراقسىزدىق تۋىنداتىپ, ءوز ومىرلەرىن قيعاندار ارۋاعىنا كولەڭكە تۇسىرەتىنىن اتاپ ءوتتى. بىراق وبامانىڭ ءسوزى ارمياندار جاعىنىڭ دا, سول سياقتى تۇرىكتەر تاراپىنىڭ دا كوڭىلىنەن شىققان جوق. ارمياندار گەنوتسيد فاكتىسىن مويىندامادى دەپ كىنالاسا, تۇرىكتەر اقش پرەزيدەنتىنىڭ سوزىنەن تاعى دا تاريحقا دەگەن سىڭارجاق كوزقاراس بايقالادى دەپ ايىپتادى.
تۇتقىندار تۇرمەدەن قاشتى
اۋعانستاننىڭ وڭتۇستىگىندە ورنالاسقان قانداعار تۇرمەسىنەن كوپتەگەن تۇتقىن قاشىپ كەتكەن. ولاردىڭ جۇزدەن استامى تەررورلىق اكتىلەر مەن قارۋلى شابۋىلدار جاساعانى ءۇشىن سوتتالعان «تاليبان» قوزعالىسىنىڭ دالا كومانديرلەرى. قانداعار پروۆينتسياسى قاۋىپسىزدىك باسقارماسى باستىعىنىڭ ورىنباسارى ناسرۋللا يۋسۋفزايدىڭ ايتۋىنشا, تۇتقىندار تۇرمەنىڭ قابىرعاسىنىڭ استىن قازىپ, الەكساندر ماكەدونسكي كەزىندە سالىنعان جەراستى كوممۋنيكاتسيالارى ارقىلى بوستاندىققا شىققان. تۇتقىنداردىڭ قاشۋىنا كۇزەتشىلەردىڭ نازارىن باسقا جاققا اۋدارۋ ارقىلى «تاليبان» قوزعالىسى قولداۋ كورسەتكەن كورىنەدى.
قاقتىعىس باسەڭسىمەي تۇر
تايلاند پەن كامبودجا اۋماقتىق جانجالعا بايلانىستى ءتورت كۇننەن بەرى قارۋلى قاقتىعىستار ءجۇرىپ جاتقان شەكارالىق اۋدانعا قوسىمشا اسكەرلەر تارتۋدا. كەشە بروندى تەحنيكالى جانە اۋىر قارۋلانعان قوسىمشا اسكەري بولىمدەر شوعىرلاندىرىلعان كورىنەدى. جانجال باستالعان ۋاقىتتان بەرى 12 ادام قازا تاۋىپ, 40-قا تارتا ادام زارداپ شەككەن. ەكى جاقتان دا بىرنەشە مىڭداعان تۇرعىن شەكارا بويىنداعى دەرەۆنيالاردان باسقا جاقتارعا كوشىرىلگەن. رەسمي مالىمەت بويىنشا تايلاند پەن كامبودجا ءحىى عاسىردا سالىنعان ەكى كونە حرامنىڭ قاي ەلگە جاتاتىنىن شەشە الماي كەلەدى.
ەرەۋىلشىلەرگە وق اتىلدى
دۇيسەنبى كۇنى سيريانىڭ داراا قالاسىنا كىرگەن اسكەر كۇشى ەرەۋىلشىلەرگە قارسى وق اتقان. قالادا جارىق پەن تەلەفون بايلانىسى وشىرىلگەن. كۋاگەرلەردىڭ ايتۋىنشا, داراا قالاسىنا بارلىعى 3 مىڭداي اسكەري ەنگىزىلگەن كورىنەدى. سول سياقتى اسكەريلەردىڭ قالا ورتالىعىنا قويىلعان بروندالعان اۋىر تەحنيكانى قولدانعاندىعى تۋرالى دا مالىمەتتەر بار. ازىرگە قازا تاپقاندار مەن جارالى بولعانداردىڭ سانى تۋرالى ناقتى مالىمەتتەر جوق.
بەيباستاق پاستورعا تىيىم سالىندى
امەريكالىق پاستور تەرري دجونسقا قۇراندى ورتەۋگە جانە اقش-تاعى ەڭ ءىرى سانالاتىن ميچيگانداعى مەشىتكە جاقىنداۋعا تىيىم سالىندى. دجونس «تۇرعىندار تىنىشتىعىنا قاتەر توندىرگەنى ءۇشىن» 1 دوللار مولشەرىندە ايىپ تولەۋدەن باس تارتقان كەزدە ونى تۇرمەگە قاماپ, بىراق ءبىر ساعاتتان كەيىن قايتادان بوساتىپ جىبەرگەن بولاتىن. فلوريدا شتاتىنىڭ بەيباستاق پاستورى وتكەن جۇمادا اقش-تاعى ەڭ ءىرى مەشىتتە يسلامعا قارسى اكتسيا وتكىزۋدى جوسپارلاعان ەدى. بىراق قۇراندى تاعى دا ورتەمەك بولعان پاستور سوتتىڭ الدىنان ءبىر-اق شىقتى.
ينتەرنەت ماتەريالدارى نەگىزىندە ازىرلەندى.
