ەلباسى ءوز جولداۋىندا «سىبايلاس جەمقورلىقتىڭ سەبەپتەرى مەن العىشارتتارىن انىقتاپ, ولاردى جويۋ جۇمىسىن كۇشەيتۋ قاجەت», دەپ تاپسىردى. ال كەمەل كەلەشەك پەن باياندى بولاشاق ادال ەڭبەكتىڭ عانا اياسىندا سالتانات قۇرادى. ۇلتىن سۇيەتىن ۇرپاق قالىپتاستىرۋ دا ۇلى مىندەت.
سىبايلاس جەمقورلىقتىڭ كەز كەلگەن كورىنىسىنە توزبەۋشىلىكتى قالىپتاستىرۋ ماقساتىندا جامبىل وبلىسىندا «پاراسىز بولاشاققا. بىرگە!» ۇرانىمەن ءموبيلدى توپ قۇرىلدى. تاراز قالاسىنداعى قازاقستان رەسپۋبليكاسىنىڭ تۇڭعىش پرەزيدەنتى ساياباعىندا وتكەن جيىندا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ وبلىس بويىنشا دەپارتامەنتىنىڭ باسشىسى ماقسۇت نالىباەۆ, «نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى مۇراتحان شۇكەەۆ, مەملەكەتتىك سىيلىقتىڭ لاۋرەاتى, مادەنيەت قايراتكەرى نۇرسيفات سالىقوۆا جانە باسقا دا ازاماتتار ءسوز الىپ, جەمقورلىقتىڭ قوعامداعى كەلەڭسىز ارەكەت ەكەنىنە توقتالدى. سونداي-اق جاستاردى سىبايلاستىقپەن كۇرەسكە شاقىردى.
ال ءموبيلدى توپتىڭ نەگىزگى ماقساتى – وبلىس اۋماعىندا ورنالاسقان بارلىق مەكەمەلەردىڭ ەڭبەك ۇجىمدارىنا اقپاراتتىق-ءتۇسىندىرۋ جۇمىستارىن جۇرگىزۋ جانە مەملەكەتتىك قىزمەت كورسەتۋ بارىسىندا تۋىندايتىن اكىمشىلىك كەدەرگىلەردى بارىنشا ازايتۋ. سونىمەن قاتار, ازاماتتاردى جەكە قابىلداۋدى جۇزەگە اسىرۋ دا باستى نازاردا. باستالعان ءموبيلدى توپ جۇمىسى جىل سوڭىنا دەيىن جۇرگىزىلەدى.
ءموبيلدى توپ قۇرامىنا «نۇر وتان» پارتياسى وبلىستىق فيليالىنىڭ قىزمەتكەرلەرى, «جاڭارۋ» سىبايلاس جەمقورلىققا قارسى جالپىۇلتتىق قوزعالىسى رەسپۋبليكالىق قوعامدىق بىرلەستىگىنىڭ وكىلدەرى, وبلىستىق كاسىپوداق ۇيىمدارىنىڭ جەتەكشىلەرى, وبلىستىق قوعامدىق كەڭەس مۇشەلەرى, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى مەن ۇلتتىق بيۋروسىنىڭ جامبىل وبلىسى بويىنشا دەپارتامەنتىنىڭ باسشىلىعى ەنگىزىلگەن. ءموبيلدى توپ قۇرامىنا ەنگەن بارلىعى 15 ازامات ەندى وبلىستىڭ ون اۋدانىندا جانە بارلىق ەلدى مەكەندەرىندە بولىپ, حالىقپەن كەزدەسۋ وتكىزۋ ءۇشىن جولعا شىقتى.
حاميت ەسامان,
«ەگەمەن قازاقستان»
جامبىل وبلىسى
