دەمەۋشىلەردىڭ قاراجاتى ەسەبىنەن سالىنعان جاڭا كەشەن 550 ورىنعا ارنالعان. 9333 شارشى مەتردى قۇرايتىن الاڭدا فۋتبول, باسكەتبول, ۆولەيبول زالدارى, سونداي-اق, جەكپە-جەك پەن جەڭىل اتلەتيكاعا ارنالعان زالدار بار.
بۇگىندە ماڭعىستاۋ وبلىسىنىڭ 25% حالقى, ياعني 158 250 ادام دەنە شىنىقتىرۋمەن جانە سپورتپەن اينالىسادى. 12 مىڭ بالا 18 بالالار مەن جاسوسپىرىمدەر سپورت مەكتەبىنە تەگىن قاتىسادى. 569 سپورت عيماراتىنىڭ 260-ى اۋىلدىق جەرلەردە ورنالاسقان.
2016 جىلى 14 جاڭا نىسان ىسكە قوسىلدى. وسى جىلى «ماڭعىستاۋ-ارەنا» سپورت سارايى مەن اقتاۋ قالاسىنداعى «باتىر» سپورت كەشەنىنىڭ قۇرىلىسى اياقتالدى. الداعى ۋاقىتتا تاعى دا بەس نىساننىڭ قۇرىلىسى باستالادى. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ماڭعىستاۋ وبلىسىنىڭ جاستارىمەن جانە سپورتشىلارىمەن كەزدەسىپ, ولاردىڭ وقۋلارىنا ساتتىلىك تىلەدى, دەلىنگەن حابارلامادا.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى
