كەزدەسۋ بارىسىندا مەملەكەتتەر باسشىلارى ەكىجاقتى ىنتىماقتاستىقتىڭ كەڭ اۋقىمدى ماسەلەلەرىن, سونىڭ ىشىندە ساياسي ءوزارا ءىس-قيمىل ورناتۋ, ساۋدا-ەكونوميكالىق جانە مادەني-گۋمانيتارلىق قارىم-قاتىناس جايىن تالقىلادى.
– ەكونوميكا كەز كەلگەن مەملەكەتتىڭ نەگىزگى تۇعىرى بولىپ سانالادى. ءتۇرلى سالاداعى, ماسەلەن, كولىك-كوممۋنيكاتسيا سالاسىنداعى ۋاعدالاستىقتار ەلدەرىمىز ءۇشىن زور مۇمكىندىكتەرگە جول اشادى, – دەدى قازاقستان پرەزيدەنتى.
مەملەكەت باسشىسى بىرلەسە قابىلدانعان مالىمدەمەدە ەكىجاقتى قارىم-قاتىناستى دامىتۋدىڭ ستراتەگيالىق جولدارى ايقىندالعانىن اتاپ ءوتتى.
– ءبىز كۇن تارتىبىندە تۇرعان بارلىق ماسەلەنى تالقىلادىق. قول قويۋعا دايىندالعان قۇجاتتار قارىم-قاتىناسىمىزدىڭ دامۋىنىڭ جاڭا كەزەڭى بولىپ سانالادى. مەملەكەتتەرىمىز اراسىنداعى تاۋار اينالىمىنىڭ كولەمىن ايتارلىقتاي ارتتىرۋعا ناقتى مۇمكىندىكتەر بار دەپ ەسەپتەيمىن, – دەدى نۇرسۇلتان نازارباەۆ.
قازاقستان پرەزيدەنتى رەسپۋبليكامىزدىڭ باكۋمەن جان-جاقتى ءوزارا ءىس-قيمىل اياسىن كەڭەيتۋگە مۇددەلىلىگىن جانە ول ءۇشىن قاجەتتى الەۋەت بار ەكەنىن ايتتى. بۇل رەتتە ساۋدا-ەكونوميكالىق ىنتىماقتاستىق ەكىجاقتى قارىم-قاتىناستىڭ لوكوموتيۆى بولىپ سانالادى.
– ەلىمىزدە قازاقستان ازاماتى بولىپ سانالاتىن كوپتەگەن ەتنيكالىق ازەربايجاندىقتار تۇرىپ جاتىر. ولار قازاقستاندا كاسىپورىن اشىپ, بيزنەسپەن اينالىسىپ, ەكى مەملەكەت اراسىنداعى ءوزارا دوستىق قارىم-قاتىناستى ودان ءارى نىعايتۋعا سەپتىگىن تيگىزەتىن دانەكەر ىسپەتتى, – دەدى مەملەكەت باسشىسى.
بۇدان بولەك, نۇرسۇلتان نازارباەۆ كەلىسسوز بارىسىندا گۋمانيتارلىق بايلانىستار اياسىن كەڭەيتۋ ماسەلەلەرى قارالعانىنا نازار اۋداردى.
– ستۋدەنتتەر الماسۋ, ەكى ەلدىڭ مادەني كۇندەرىن وتكىزۋ ماسەلەلەرىنە ءتيىستى دەڭگەيدە نازار اۋدارۋ قاجەت. ول مادەني بايلانىستارىمىزدى جاڭا دەڭگەيگە كوتەرۋگە سەپتىگىن تيگىزەتىن بولادى, – دەدى قازاقستان پرەزيدەنتى.
ازەربايجان رەسپۋبليكاسىنىڭ پرەزيدەنتى قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋى ونىڭ الەمدىك ارەناداعى ءرولى مويىندالعانىنىڭ كورسەتكىشى جانە نۇرسۇلتان نازارباەۆتىڭ جەكە بەدەلىنىڭ ارقاسى ەكەنىن اتاپ ءوتتى.
– ءسىزدىڭ وڭىرلىك قانا ەمەس, سونىمەن بىرگە الەمدىك اۋقىمداعى باستامالارىڭىز زور قۇرمەتكە يە بولىپ كەلەدى. ەكىجاقتى قارىم-قاتىناستىڭ دامۋىنا كوڭىلىمىز تولادى. بۇگىنگى سىندارلى پىكىر الماسۋلار تالقىلانعان كوپتەگەن ماسەلەلەر جونىندەگى ۇستانىمدارىمىزدىڭ ۇقساستىعىن كورسەتەدى, – دەدى ي.اليەۆ.
سونداي-اق, ازەربايجان كوشباسشىسى ەكىجاقتى ەكونوميكالىق ىنتىماقتاستىقتىڭ قارقىندى دامىپ كەلە جاتقانىنا نازار اۋداردى.
– ءبىز ەكى مەملەكەتتىڭ ينۆەستيتسيا سالاسىنداعى جۇمىسىنىڭ قورىتىندىسى بويىنشا وڭ ناتيجەلەر بار ەكەنىن كورىپ وتىرمىز. بۇل شاعىن جانە ورتا بيزنەس سالاسىنىڭ دامۋىنا سەپتىگىن تيگىزەتىن بولادى, – دەدى ازەربايجان پرەزيدەنتى.
