ماسەلەن, كەشە وتىرار اۋدانىندا وبلىستىق ماڭىزى بار ءشاۋىلدىر-اقدالا تاسجولىنىڭ 3 شاقىرىمىنداعى دامباعا ۇزىندىعى 150 مەتر جەرگە 3000 دانا قاپ توپىراق سالىنعان بوگەتتەر قويىلدى.
دامبانى نىعايتۋ جۇمىستارىنا اۋداندىق توتەنشە جاعدايلار مەكەمەسى مەن جەرگىلىكتى اتقارۋشى ورگاننىڭ 50 قىزمەتكەرى 4 تەحنيكا جۇمىلدىرىلدى.
توتەنشە جاعدايلار دەپارتامەنتىنىڭ حابارلاۋىنشا, «قازگيدرومەت», «قازسۋشار» رمك, «قازسەلدەنقورعاۋ» مم وقف گيدروبەكەتتەرىنەن سۋ قويمالار مەن وزەندەردەگى سۋ دەڭگەيىنىڭ تولۋى جانە اعىندارى بويىنشا كۇندەلىكتى شۇعىل اقپاراتتار الىنۋدا. ولاردىڭ مالىمدەۋىنشە, قازىرگى تاندا وبلىس اۋماعىنداعى سۋ تاسۋ جاعدايى قاۋىپتى ەمەس, وزەندەردەگى سۋدىڭ دەڭگەيى اۋمالى كۇيدەگى دەڭگەيدەن تومەن, سۋ قويمالارىندا سۋدىڭ دەڭگەيى ورتا ەسەپپەن جوبالىق مولشەرىنىڭ 75% قۇرايدى.
ايتا كەتەيىك, ارىس وزەنىنە سۋدىڭ تاستالۋى كوبەيىپ, اعىن سۋدىڭ قارقىندىلىعىنان ورداباسى اۋدانىنداعى «باتىس ەۋروپا-باتىس قىتاي» تراسساسىنداعى كىشى كوپىردىڭ نەگىزىندەگى تەمىر-بەتون پليتالارى شايىلىپ كەتكەن بولاتىن. وسىعان بايلانىستى ارىس وزەنى سۋ اعىنىنىڭ ءبىر بولىگى قاشىرتقى كانالعا بۇرىلىپ, ناتيجەسىندە سۋدىڭ دەڭگەيى تومەندەدى. حالىقارالىق «باتىس ەۋروپا-باتىس قىتاي» تاس جولىنداعى 2226 شاقىرىمىنداعى كوپىردى قالپىنا كەلتىرۋ جۇمىستارىن جول ماماندارى جۇرگىزۋدە. بۇگىندە جول قوزعالىسى ورداباسى اۋدانى تەمىرلان ەلدى مەكەنىندەگى اينالما جول ارقىلى ۇيىمداستىرىلدى.
قازگيدرومەتتىڭ مالىمەتىنشە, 3 ساۋىردە جاۋىن-شاشىن بولجامىنا سايكەس وڭىردەگى الاسا تاۋلى وزەندەرىندە جاڭبىردىڭ سۋى جينالۋى, بەتكەيلىك اعىننىڭ پايدا بولۋى كۇتىلەدى.
