بىرلەستىك بەلسەندىسى يرينا تاتيەۆانىڭ باستاماسىمەن ولار «قايىرىمدى پاندا» اتتى ويىن ويلاپ تاپتى. بۇل ينتەرنەت جەلىلەرى ارقىلى جاسوسپىرىمدەردى وزىنە قول جۇمساۋعا يتەرمەلەيتىن, بۇلدىرگى «كوك كيت» ويىنىنا قارسىلىق كورسەتۋ بولىپ تابىلادى ەكەن.
- «كوك كيت» ويىنى جاسوسپىرىمدەردى پسيحولوگيالىق تۇرعىدان ورنى تولماس وكىنىشتەرگە اپارعانى بەلگىلى. ال ءبىزدىڭ قارابالىقتىق جاستار ويلاپ تاپقان «قايىرىمدى پاندا» ويىنى بالالاردى, جاستاردى تەك قانا جاقسىلىققا جەتەلەيدى. وندا ويىنشىلارعا 30 تاپسىرما بەرىلەدى. جاستار اۋەلدە وسى تاپسىرمالاردىڭ بارلىعىن دا اۋدان كولەمىندە ۆولونتەرلەردىڭ وزدەرىنىڭ قاتىسۋىمەن ورىنداپ كورۋدى ويلاستىرادى. ال شىندىعىندا وعان استانادان, رەسەيدىڭ چەليابى وبلىسىنان جاستار قوسىلا باستادى, - دەيدى اۋدانداعى جاستار رەسۋرسى ورتالىعىنىڭ ديرەكتورى يرينا التىننيكوۆا.
ويىندى جاساعان ۆولونتەرلەردىڭ ايتۋىنشا, تاپسىرما قاراپايىم تۇرمىستاعى تىرلىكتەن اسپايدى. مىسالى, ءوزى تانىمايتىن بىرەۋگە حات جازادى, ودان زەينەتكەرگە كومەك بەرۋىن وتىنەدى نەمەسە تۇنگى ۇيقىعا جاتقاندا كيىپ جاتاتىن كيىمىمەن دۇكەنگە بارىپ, تۇز ساتىپ الۋدى تاپسىرادى.
- مۇنداي تاپسىرمالار دا كەرەك, ويتكەنى ول جاستاردى وزىنە سەنىمدىلىككە تاربيەلەيدى, - دەيدى يرينا تاتيەۆا.
قازىر جەلىدەگى ويىنعا جۇزدەن اسا ويىنشىلار قوسىلىپتى.
ءنازيرا جارىمبەتوۆا,
«ەگەمەن قازاقستان»
