كەزدەسۋ بارىسىندا ساياسي, ساۋدا-ەكونوميكالىق جانە مادەني-گۋمانيتارلىق ىنتىماقتاستىقتىڭ دامۋ احۋالى مەن پەرسپەكتيۆالارى, سونداي-اق كۇن تارتىبىندەگى حالىقارالىق جانە وڭىرلىك وزەكتى ماسەلەلەر تالقىلاندى.
نۇرسۇلتان نازارباەۆ قازاقستان مەن ازەربايجان اراسىندا ەجەلدەن تاريحي جانە مادەني بايلانىستارعا نەگىزدەلگەن ءداستۇرلى دوستىق سيپاتىنداعى ەكىجاقتى قارىم-قاتىناس قالىپتاسقانىن اتاپ ءوتتى.
مەملەكەت باسشىسى الەمدىك ەكونوميكاداعى قازىرگى كەزدەگى جاڭا ۇردىستەر ەكى ەل سەرىكتەستىگىن ودان ءارى دامىتۋعا تىڭ سەرپىن بەرە الاتىنىن ايتتى.
– الەمدەگى داعدارىستىق قۇبىلىستار ۇلتتىق ەكونوميكامىزعا ايتارلىقتاي زالالىن تيگىزىپ جاتقانىن كورىپ وتىرمىز. سونىمەن قاتار, بۇل بىرلەسكەن جاڭا وندىرىستەر اشىپ, جاسىرىن مۇمكىندىكتەرىمىزدى پايدالانۋعا جول اشۋدا. ەكونوميكانى ءارتاراپتاندىرىپ, يننوۆاتسيالىق تەحنولوگيالارعا نازار اۋدارۋ قاجەت, – دەدى قازاقستان پرەزيدەنتى.
نۇرسۇلتان نازارباەۆ ەكىجاقتى ىنتىماقتاستىقتىڭ بارلىق سالاسىندا ءوزارا ءىس-قيمىلدى ۇدەتۋ, سونىڭ ىشىندە قازاقستان مەن ازەربايجاننىڭ كولىك-ترانزيت الەۋەتىن دامىتۋ قاجەتتىگىن اتاپ ءوتتى.
– بۇل كەزدەسۋ ەلدەرىمىزدىڭ ءوزارا ءىس-قيمىلىن ودان ءارى تىعىز دامىتۋعا مۇمكىندىك تۋعىزاتىن جاڭا فورماتتاعى قارىم-قاتىناسىمىزعا تىڭ سەرپىن بەرۋگە ءتيىس, – دەدى مەملەكەت باسشىسى.
سونداي-اق, قازاقستان پرەزيدەنتى ەكى مەملەكەتتىڭ حالىقارالىق سالاداعى ءوزارا تۇسىنىستىگىنە جانە ۇستانىمدارىنىڭ ۇقساستىعىنا نازار اۋداردى. بۇدان بولەك, نۇرسۇلتان نازارباەۆ ي.اليەۆتى 2016 جىلعى رەفەرەندۋمدا ازەربايجان حالقىنىڭ ەل كونستيتۋتسياسىنا ەنگىزىلەتىن, پرەزيدەنتتىڭ وكىلەتتىك مەرزىمىن ۇزارتۋعا باعىتتالعان وزگەرىستەردى قولداعانىمەن قۇتتىقتادى.
ي.اليەۆ ىنتىماقتاستىقتى ودان ءارى نىعايتىپ, ونىڭ اياسىن كەڭەيتۋ جولىندا قازاقستان پرەزيدەنتىنىڭ ساپارى ماڭىزدى ەكەنىن ايتتى.
– بۇگىن قول قويىلعالى وتىرعان قۇجاتتار ەكىجاقتى قارىم-قاتىناستى ءارى قاراي نىعايتۋعا سەپتىگىن تيگىزەتىنىنە سەنىمدىمىن. قازاقستان ءبىز ءۇشىن دوستاس, باۋىرلاس ەل بولىپ سانالادى. ءبىز بۇگىنگى كەزدەسۋگە زور ءمان بەرىپ وتىرمىز, – دەدى ي.اليەۆ.
سونىمەن بىرگە, ازەربايجان پرەزيدەنتى يلحام اليەۆ قازاقستاننىڭ نۇرسۇلتان نازارباەۆتىڭ باسشىلىعىمەن جەتكەن جەتىستىكتەرىن اتاپ ءوتتى.
