قوستاناي وبلىستىق فيلارمونياسىنىڭ بەلدى ءانشىسى, وبلىستىق «مەتسەناتتار كلۋبى» سىيلىعىنىڭ لاۋرەاتى گۇلنار ۇسەنوۆا جەكە كونتسەرتىن بەردى. باعدارلامانىڭ تەك قازاق اندەرىنەن تۇرۋى ءانشى كونتسەرتىنىڭ ەرەكشەلىگى بولدى. ەركەعالي راحماديەۆتىڭ شالىقتاعان «تاڭ سامالى» انىنەن باستاپ, ءشامشى قالداياقوۆتىڭ, ەسكەندىر حاسانعاليەۆتىڭ اندەرىمەن كومكەرگەن ءانشى تىڭدارمانىن حالىق اندەرىمەن دە سۋسىنداتتى. ويناقى ايتىلاتىن «ماۋسىمجان», «اق داريعا», «سەرىپپەلى سەم-سەم» اندەرىن زال جاقسى قابىلدادى. سونىمەن قاتار, بارلىق يىرىمدەرىن كەلتىرە, ناقىشىمەن شىرقاعان اتاقتى «التىن التاي» ءانى گۇلنار انشىلىگىنىڭ شىڭى ىسپەتتەس ەدى.
«گۇلناردىڭ شىرقاۋىنداعى بارلىق ءان ءبىر توبە, «التىن التاي» ءبىر توبە سەكىلدى بولدى ماعان. ونى شىرقاعاندا گۇلناردىڭ درامالىق سوپرانو داۋىسىنىڭ بارلىق بوياۋى ەرەكشە ەستىلەدى», – دەدى كونتسەرتكە كەلگەن تىڭدارمان ءمارزيا ەسقازينا.
گۇلنار كونتسەرتىندە تەك قازاق حالىق اندەرى مەن قازاق كومپوزيتورلارىنىڭ عانا اندەرىن شىرقاعان جوق, قازاق وپەرالارىنان دا اريالار ايتتى. «ەر تارعىن» وپەراسىنان اقجۇنىستىڭ, «ايسۇلۋ» وپەراسىنان ايسۇلۋدىڭ اريالارى گۇلناردىڭ ورىنداۋىندا قازاق ايەلدەرىنىڭ وپەراداعى بەينەسىن اشا تۇسكەندەي بولدى. كونتسەرت سوڭىندا ءسوز العان ە.ومىرزاقوۆ اتىنداعى وبلىستىق فيلارمونياسىنىڭ ديرەكتورى لاريسا سەروۋس گۇلنارعا راقمەت ايتا وتىرىپ, ونىڭ شىعارماشىلىعىنا زور تابىستار تىلەدى.
سونىمەن قاتار, گۇلناردىڭ ءان ونەرىندەگى تىنىمسىز ەڭبەگىن, وزىندىك ەرەكشە داۋىسىن كورەرمەن ءاردايىم كۇتىپ وتىراتىنىن جەتكىزدى.
ءنازيرا جارىمبەتوۆا,
«ەگەمەن قازاقستان»
