وسىمەن التىنشى مارتە ۇيىمداستىرىلىپ وتىرعان بۇل تۋرنير ءداستۇرلى تۇردە ايگىلى شاڭعىشىلاردىڭ وتانى سانالاتىن ريددەردە عانا وتەدى.
بيىل ءدۇبىرلى دوداعا 250-گە جۋىق سپورتشى قاتىستى. شاڭعىشىلار 14 توپقا ءبولىنىپ, جاس ەرەكشەلىكتەرىنە قاراي سايىسقا ءتۇستى. قار ۇستىندەگى قان قىزدىرار باسەكەنى اتاقتى شاڭعىشى الەكسەي ءپولتورانيننىڭ ءوزى دە تاماشالادى.
-بۋرابايدا ۆلاديمير سميرنوۆتىڭ جۇلدەسى ءۇشىن وتەتىن ءتۋرنيردى بۇرىن ءبىز دە اسىعا كۇتەتىن ەدىك. سول سايىسقا قاتىسىپ, جۇلدەگەر بولدىق, جەڭىمپاز اتاندىق. ءبىزدىڭ قۇرمەتىمىزگە ۇيىمداستىرىلىپ جاتقان بۇل شارا ەلىمىزدەگى شاڭعى سپورتىنىڭ دامۋىنا تىڭ سەرپىن بەرەدى دەپ ويلايمىن, - دەيدى شاڭعىشى.
سايىس سوڭىندا جەڭىمپازداردى الەم چەمپيوندارى الەكسەي پولتورانين مەن سەرگەي چەرەپانوۆ ماراپاتتادى. جوعارىدا ايتىپ وتكەنىمىزدەي, 800 مەتردە ءبىرىنشى كەلگەن الەكسەي ءپولتورانيننىڭ ۇلى ەۆگەني ءپولتورانيننىڭ جاسى نەبارى سەگىزدە. ايتپاقشى, بۇل جارىسقا ەڭ جاسى كىشى شاڭعىشى رەتىندە الەكسەيدىڭ قىزى كريستينا دا قاتىستى.
ازامات قاسىم,
«ەگەمەن قازاقستان»
شىعىس قازاقستان وبلىسى
