اتالعان شارانى «پاراسات» جۇيەلى زەرتتەۋلەر ينستيتۋتى ازەربايجان رەسپۋبليكاسى پرەزيدەنتىنىڭ جانىنداعى ستراتەگيالىق زەرتتەۋلەر ورتالىعىمەن بىرلەسىپ ۇيىمداستىردى.
وتىرىستى «پاراسات» جۇيەلى زەرتتەۋلەر ينستيتۋتىنىڭ ديرەكتورى نۇرسۇلتان احمەديا اشىپ, ساراپشىلار باسقوسۋىنىڭ مەملەكەت باسشىسىنىڭ ازەربايجانعا ساپارى قارساڭىندا ماڭىزدى ەكەنىن ايتتى.
«قازاقستان مەن ازەربايجان قارىم-قاتىناستارى ءساتتى جانە ديناميكالىق تۇرعىدا دامۋدا. ءبىزدىڭ ەلدەرىمىز حالىقارالىق جانە ايماقتىق ۇيىمدار اياسىندا بەلسەندى ىقپالداستىق ورناتقان. تۇراقتى نەگىزدە ەكى مەملەكەت باسشىلارىنىڭ ءوزارا ءىسساپارلارى ۇيىمداستىرىلىپ, ەكى جاقتى قاتىناستاردىڭ بارلىق سالالارى بويىنشا ىنتىماقتاستىق پەرسپەكتيۆالارى تالقىلانۋدا», دەدى نۇرسۇلتان احمەديا.
ازەربايجان رەسپۋبليكاسى پرەزيدەنتىنىڭ جانىنداعى ستراتەگيالىق زەرتتەۋلەر ورتالىعىنىڭ ديرەكتورى فارحاد مامەدوۆ «ەكى مەملەكەت باسشىلارى اراسىندا جوعارى دەڭگەيدەگى ساياسي سەنىم ورنىققاندىعىن» اتاپ كورسەتتى. سونداي-اق, فارحاد مامەدوۆ قازاقستان مەن ازەربايجان حالىقارالىق كۇن تارتىبىندە تۇرعان ماسەلەلەر بويىنشا ۇستانىمدارىنىڭ ۇقساس ەكەنىنە توقتالدى.
ايتا كەتەيىك, ەكى ەل اراسىندا مادەني بايلانىستار ۇلكەن ماڭىزعا يە. حالىقارالىق تۇركى اكادەمياسىنىڭ ساراپشىسى تيمۋر كوزىرەۆ قازاقستان جانە ازەربايجان تۇركى مەملەكەتتەرى رەتىندە تۇركى حالىقتارىنىڭ ءبىرەگەيلىگىن دامىتۋعا ۇمتىلاتىندىعىن جەتكىزدى.
قازاقستان پرەزيدەنتى جانىنداعى ستراتەگيالىق زەرتتەۋلەر ينستيتۋتىنىڭ عىلىمي قىزمەتكەرى نايليا المۇحامەدوۆا: «سوڭعى 10 جىلدا قازاقستان مەن ازەربايجاننىڭ ساۋدا بايلانىس-
تارى ايتارلىقتاي نىعايدى. 2016 جىلى قازاقستان مەن ازەربايجان اراسىنداعى ساۋدا اينالىمى 136,8 ملن اقش دوللارىن قۇراپ, 2015 جىلمەن سالىستىرعاندا 9 پايىزعا ءوستى», دەدى.
قازاقستان ازەربايجانعا تەمىر جول جانە ترامۆاي لوكوموتيۆىنىڭ جابدىقتارىن, قارا مەتالل, جانار-جاعارماي, قۇرىلىس ماتەريالدارىن ەكسپورتتايدى. يمپورتتىڭ نەگىزگى بولىگىن قانت جانە كونديتەرلىك ونىمدەر, قارا مەتالدان جاسالعان ونىمدەر, كوكونىس پەن داندەر, تەكستيل ونىمدەرى مەن ەلەكتر قۇرال-جابدىقتارى قۇرايدى.
ازەربايجان رەسپۋبليكاسى ميللي مەدجليسىنىڭ دەپۋتاتى راسيم مۇسابەكوۆ ءوز سوزىندە ەكى ەل ءۇشىن وزەكتى ماسەلەلەردى ءسوز ەتتى. ونىڭ ىشىندە الەمدىك قاۋىپسىزدىك, قازاقستان پرەزيدەنتىنىڭ يادروسىز الەم باستاماسى, كاسپي تەڭىزىنىڭ قۇقىقتىق مارتەبەسى, يسلام ءدجيحاديزمى, استانا مەن باكۋدىڭ ۇنقاتىسۋ الاڭى رەتىندەگى ءرولىن ەرەكشە اتادى.
كەزدەسۋ قورىتىندىسىندا قازاقستاندىق جانە ازەربايجاندىق ساراپشىلار 25 جىل ىشىندە ەكى مەملەكەت تىعىز ارىپتەستىك قاتىناستاردى قولدايتىندىعىن جانە ەۋروپا مەن ازيا اراسىنداعى بەلگىلى ءبىر «كوپىر» ەكەندىگىن اتادى.
