شاراعا ەلىمىزدىڭ پارلامەنت سەناتى مەن ءماجىلىسىنىڭ دەپۋتاتتارى, مادەنيەت جانە سپورت مينيسترلىگىنىڭ, مادەنيەت سالاسىنىڭ ۇيىمدارى مەن مەكەمەلەرىنىڭ باسشىلارى, قازاقستان تەاترلارىنىڭ ديرەكتورلارى مەن كوركەمدىك جەتەكشىلەرى قاتىستى.
سەناتتىڭ الەۋمەتتىك-مادەني دامۋ جانە عىلىم كوميتەتىنىڭ ءتورايىمى بىرعانىم ءايتىموۆا كەزدەسۋدى اشا كەلىپ, مەملەكەتىمىزدە مادەنيەتتى دامىتۋ مەن كلاسسيكالىق جانە حالىق ونەرىنىڭ ۇزدىك داستۇرلەرىن ساقتاۋ ءۇشىن بارلىق جاعداي جاسالعانىن اتاپ ءوتتى. الەمدىك مادەني كەڭىستىككە ىقپالداسۋ ءۇشىن بارلىق شارالار قابىلدانۋدا. نورماتيۆتىك- قۇقىقتىق ەرەجەلەردىڭ نەگىزى جاسالدى, مادەنيەت سالاسىنىڭ زاڭدارى مەن زاڭنان كەيىنگى قۇقىقتىق اكتىلەر قابىلداندى, ينفراقۇرىلىم دامىپ كەلەدى, مادەني ساياساتتىڭ تۇجىرىمداماسى مەن وتاندىق مادەنيەتتى دامىتۋعا ىقپال ەتەتىن باسقا باعدارلامالىق قۇجاتتار قابىلداندى.
سەناتوردىڭ ايتۋىنشا, مادەني مۇراعا باي جانە شىعارماشىلىق الەۋەتكە يە قازاقستان حالقىن الەمنىڭ 30 دامىعان ەلىنىڭ قاتارىنا كىرۋ ماقساتىنا قول جەتكىزۋگە شاقىرعان مەملەكەت باسشىسىنىڭ «ماڭگىلىك ەل» ۇلتتىق يدەياسىن, قازاقستان پرەزيدەنتى ن.نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىن, قازاقستان رەسپۋبليكاسىنىڭ مادەنيەت ساياساتىنىڭ تۇجىرىمداماسىن ىسكە اسىرۋ ءۇشىن پارلامەنت دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ازىرلەگەن بولاتىن.
ب.ءايتىموۆا پارلامەنت دەپۋتاتتارىنىڭ باستاماسىمەن ازىرلەنىپ, سەناتقا تۇسكەن زاڭ جوباسىندا وسى ماسەلەلەر كورىنىس تاپقانىنا سەنىم ارتاتىنىن جەتكىزدى. ونىڭ پىكىرىنشە, زاڭ جوباسىنىڭ اياسىندا وسى سالاداعى كوپتەگەن ماڭىزدى ماسەلەلەر شەشىلەتىن بولادى. ماسەلەن, تەاترلاردىڭ الدىنا قويىلعان مىندەتتەردى بەلگىلەۋ, تەاترلاردىڭ ىشكى ماسەلەلەرىن رەتتەۋ, قويىلىمدارعا وزگە شىعارماشىلىق قىزمەتكەرلەردى تارتۋ, تەاتر-
لاردا كوركەمدىك كەڭەستەر مەن قويىلىم توپتارىن قۇرۋ زاڭ جۇزىندە بەلگىلەنەدى.
كەزدەسۋدە نەگىزگى باياندامانى ارىستانبەك مۇحامەدي ۇلى جاسادى. ول مادەنيەت سالاسىن ودان ءارى جاڭعىرتۋدىڭ نەگىزگى ەرەجەلەرى تۋرالى جان-جاقتى حاباردار ەتتى. باستاماشىلار اتىنان پارلامەنت ءماجىلىسىنىڭ دەپۋتاتى م.ايسينا زاڭ جوباسىنداعى نەگىزگى تۇزەتۋلەردى تانىستىردى. ەلىمىزدىڭ «مادەنيەت تۋرالى» زاڭىندا قازاقستان حالقىنىڭ مادەني مۇراسىنا جاتاتىن باسىلىمداردى ساقتاۋ جانە جاريا ەتۋدى جۇزەگە اسىراتىن قازاقستان رەسپۋبليكاسى ۇلتتىق مەملەكەتتىك كىتاپ پالاتاسىنىڭ مارتەبەسى بەلگىلەندى; باسىلىمداردىڭ تەگىن داناسىن ۇلتتىق مەملەكەتتىك كىتاپ پالاتاسىنا, ال ەلەكتروندىق نۇسقادا «ورتالىق» مارتەبەسىنە يە كىتاپحاناعا مىندەتتى تۇردە بەرۋ مىندەتى بەكىتىلدى.
ودان باسقا, زاڭ جوباسىمەن مادەنيەت مەكەمەلەرى مەن تەاترلار قىزمەتىنە قاتىستى ماسەلەلەردى رەتتەۋ, قوعامدىق ماڭىزى بار ادەبيەتتەردى ساتىپ الۋ, باسۋ جانە تاراتۋ, سونداي-اق مادەنيەت سالاسىنىڭ ۋاكىلەتتى ورگاندارىنىڭ قۇزىرەتىن ناقتىلاۋ ۇسىنىلىپ وتىر.
م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ كوركەمدىك جەتەكشىسى ءاسانالى ءاشىموۆ, ق.قۋانىشباەۆ اتىنداعى قازاق مەملەكەتتىك اكادەميالىق مۋزىكالىق-دراما تەاترىنىڭ كوركەمدىك جەتەكشىسى تالعات تەمەنوۆ, م.گوركي اتىنداعى مەملەكەتتىك اكادەميالىق ورىس دراما تەاترىنىڭ ديرەكتورى ءارى كوركەمدىك جەتەكشىسى ەركىن قاسەنوۆ, م.لەرمونتوۆ اتىنداعى مەملەكەتتىك اكادەميالىق ورىس دراما تەاترىنىڭ ديرەكتورى يۋري ياكۋشەۆ, قۋىرشاق تەاترىنىڭ كوركەمدىك جەتەكشىسى قۇرالاي ەشمۇراتوۆا جانە باسقالار تەاتر ونەرىن دامىتۋ تۋرالى ۇسىنىستار ايتىپ, ءسوز سويلەدى.
سەنات دەپۋتاتتارى اقان بيجانوۆ, ءالي بەكتاەۆ, سەرىك بەكتۇرعانوۆ, جابال ەرعاليەۆ, سارسەنباي ەڭسەگەنوۆ جانە سەرگەي ەرشوۆ وتاندىق تەاتردى جانە تەاتر ونەرىن دامىتۋدىڭ كەلەشەگى, جالپى مادەنيەت سالاسىنىڭ ماسەلەلەرى تۋرالى ءوز ويلارىن ورتاعا سالدى.
كەزدەسۋدى قورىتىندىلاي كەلىپ, ب.ءايتىموۆا مادەنيەت سالاسىنداعى مەتسەناتتىق پەن دەمەۋشىلىكتىڭ الۋان تۇرلەرى كەڭىنەن قولدانىلاتىن يزرايل, يتاليا, اقش سەكىلدى ەلدەردەگى ۇزدىك حالىقارالىق تاجىريبەلەردى مىسالعا كەلتىردى. قازاقستاندا دا سونداي قادامداردى ىنتالاندىرۋ قاجەتتىگىن اتاپ ءوتىپ, وتاندىق تەاتر مادەنيەتىن ساقتاۋ مەن اياسىن كەڭەيتۋ قاجەتتىگى جانە ونىڭ جالپى مەملەكەتتىك ماڭىزىنا توقتالدى, سونداي-اق ايتىلعان ماسەلەلەردى شەشۋدە دەپۋتاتتىق كورپۋس پەن مەملەكەتتىك قۇرىلىمداردىڭ كۇش-جىگەرىن بىرىكتىرۋدى ۇسىندى.
نۇرلىبەك دوسىباي,
«ەگەمەن قازاقستان»
