قىزىلوردا وبلىسى بويىنشا كەدەندىك باقىلاۋ دەپارتامەنتى 2011 جىلدىڭ 3 ايىن قورىتىندىلادى. سىر بويىنداعى كەدەنشىلەر ءۇش ايدا ەل قازىناسىنا 3 ميلليارد 970 ميلليون 284 مىڭ تەڭگە قارجى قوستى. راسىمدەلگەن تاۋارلار ءۇشىن الىناتىن تولەمدەرمەن قاتار, سوڭعى جىلدارى كەدەن قىزمەتىنىڭ باسىم باعىتى – پوست كەدەندىك باقىلاۋ بويىنشا وبلىستىڭ سىرتقى ەكونوميكالىق قىزمەتپەن اينالىساتىن تۇلعالارعا قايتا باقىلاۋ جاساۋى دا تيىمدىلىگىن كورسەتىپ وتىر. ءى توقساندا جۇرگىزىلگەن تەكسەرۋلەر ناتيجەسىندە 1 ميلليارد 218 ميلليون 489 مىڭ تەڭگە بيۋدجەتكە وندىرىلگەن. وسى ءۇش اي ىشىندە دەپارتامەنت 3 قىلمىستىق, 281 اكىمشىلىك ءىس قوزعاعان. سونىڭ ارقاسىندا مەملەكەتكە كەلتىرىلگەن 332 ميلليون 563 مىڭ تەڭگە كولەمىندەگى زالال قالپىنا كەلتىرىلگەن. سونىمەن قاتار, 15 ميلليون 914 مىڭ تەڭگە ايىپپۇل سالىنىپ, جەرگىلىكتى بيۋدجەتكە قۇيىلعان.
ەرجان بايتىلەس. قىزىلوردا.
* * *
3 706 000 000 وبلىستىق ءماسليحاتتىڭ كەزەكتەن تىس سەسسياسىندا 2010-2013 جىلدارعا ارنالعان وبلىستىق بيۋدجەتكە تولىقتىرۋلار مەن وزگەرىستەر ەنگىزىلدى. وسىعان بايلانىستى ارتىلعان قارجى كولەمى 3 ميلليارد 706 ميلليون تەڭگەنى قۇرادى. وسى قارجىنىڭ باسىم بولىگى, ياعني 741,4 ملن. تەڭگەسى وبلىستىڭ ءبىلىم سالاسىنا ءبولىندى. ىرعىز اۋدانىنا گاز بەن سۋ قۇبىرىن تارتۋدىڭ جوبالىق-سمەتالىق قۇجاتتارىن دايىنداۋعا 89 ملن. تەڭگە, قوبدا اۋدانىنىڭ ەلدى مەكەندەرىن قالپىنا كەلتىرۋگە 12,3 ملن. تەڭگە قارالدى. وبلىس بويىنشا سالىناتىن 13 مەديتسينالىق پۋنكت پەن قايتا جاراقتاندىرىلاتىن 9 نىساننىڭ قۇرىلىسىنا تيىسىنشە 185 ملن. جانە 540,6 ملن. تەڭگە باعىتتالدى. ارتىلعان قارجىنىڭ قالعان بولىگى جەرگىلىكتى جولداردى جوندەۋگە, مادەنيەت, دەنە شىنىقتىرۋ مەن سپورت سالاسىنا, وبلىستىق اكىمدىك اپپاراتىنا, ىشكى ىستەر دەپارتامەنتىنە, قالا قۇرىلىسى مەن تابيعاتتى قورعاۋ شارالارىنا ءبولىندى.
ساتىبالدى ءساۋىرباي. اقتوبە وبلىسى.
* * *
2 600 000 000 بيىلعى جىلدىڭ 1 ناۋرىزىنداعى جاعداي بويىنشا جەرگىلىكتى بيۋدجەتتىڭ كىرىسى وسىنشاما تەڭگەگە ارتقان. وبلىستىق ءماسليحاتتىڭ كەزەكتەن تىس سەسسياسىنىڭ كۇن تارتىبىندە وڭىردەگى 2011-2013 جىلدارعا ارنالعان وبلىس بيۋدجەتىنە وزگەرىستەر مەن تولىقتىرۋلار ەنگىزۋ جونىندە ماسەلە قارالدى. سونىمەن قاتار, دەنساۋلىق ساقتاۋ مەكەمەلەرىندە اتقارىلعان شارالار جايى دا اڭگىمەگە ارقاۋ بولدى. بەكىتىلگەن كىرىس كولەمىن 2 ملرد. تەڭگەگە ارتتىرۋعا وراي بيۋدجەت شىعىستارىنا دا وزگەرتۋ ەنگىزىلدى. ماسەلەن, 16 قاناتقاقتى اۋىلدىق وكرۋگتەردى ينتەرنەت-رەسۋرستارمەن قامتاماسىز ەتۋگە, جوندەۋ جۇمىستارىنا جانە قورعانىس, ءبىلىم بەرۋ, دەنساۋلىق ساقتاۋ, الەۋمەتتىك قامسىزداندىرۋ, مادەنيەت, تاعى باسقا سالالارعا باعىتتالعان قاراجات مولشەرى ايقىندالدى. ءسويتىپ, بيىلعى جىلدىڭ 1 ناۋرىزىنداعى جاعداي بويىنشا جەرگىلىكتى بيۋدجەتتىڭ كىرىس مولشەرى 2,6 ملرد. تەڭگەگە ارتقانى انىقتالدى.
كۇمىسجان بايجان. الماتى وبلىسى.
