الەمگە ايگىلى ساۋلەت ەسكەرتكىشى
نە بوپ بارامىز ءوزى؟ كەيدە ءوز ويىڭنان ءوزىڭ شوشيسىڭ. وسىدان ەكى كۇن بۇرىن ۇيگە كىرگەنىم سول ەدى, تابالدىرىقتان اتتاي بەرە جولداسىمنىڭ: «ساگرادا فاميليانى ەستىدىڭ بە؟», دەگەنى. «قويشى؟!», دەپپىن بىردەن. «ءورت شىعىپتى, ءسوندىرىپتى, تەلەديداردان كورسەتتى». «ءوز ويىڭنان ءوزىڭ شوشيسىڭ» دەگەنىم, شىنىن ايتقاندا, اۋەلدە لاڭكەستەر سوبوردى جارىپ جىبەرگەن بە دەپ قالىپ ەدىم. وسىنداي زامان بولىپ تۇر عوي.
ساگرادا فاميليا – بارسەلوناداعى اتاقتى سوبور. 20 ءساۋىر كۇنى سول جەردە سوبور ىشىندە تەمەكى تارتقان بىرەۋدىڭ كەسىرىنەن ءورت تۇتانىپ, باس-اياعى 45 ءمينوتتىڭ ىشىندە بۇكىل بازيليكا وتقا ورانىپتى, 1700 ادام تەز ارادا سىرتقا شىعارىلىپتى. ينتەرنەت سايتتارى جىلىنا 2 ميلليوننان استام تۋريست كەلەتىن بىرەگەي عيماراتقا قاتتى نۇقسان كەلگەن دەپ جازىپ جاتىر. ايتقانداي, جولداسىمنىڭ بارسەلوناداعى سوبورعا الاڭداپ جۇرگەنىنىڭ جايى بىلاي. وسىدان بەس جىل بۇرىن استاناداعى وقۋشىلار سارايىنىڭ «بوتالار» حورى يسپانياداعى كونكۋرسقا قاتىسىپ, گران-پري جۇلدەسىن جەڭىپ الىپ قايتقان. بالالارمەن بىرگە بارعان بىرنەشە اتا-انانىڭ اراسىندا جولداسىم دا بولىپ ەدى. ساپاردان العان اسەرىن ىلە-شالا شاعىن ماقالا ەتىپ «كازاحستانسكايا پراۆداعا» جازعانى دا بار.
سارسەنبىدەگى سول جايسىز وقيعانىڭ ويعا قوزعاۋ سالعانى. الدىمەن وسىدان ءۇش جىلداي بۇرىنعى جۋرناليستىك ساپاردا كورگەندەرىمىز كوز الدىمىزعا كولبەڭدەپ كەلە بەردى. 2008 جىلدىڭ قاراشاسىندا يسپانيانىڭ ۆالەنسيا قالاسىندا ناتو-نىڭ پارلامەنتتىك اسسامبلەياسىنىڭ سەسسياسى وتكەن, وعان قازاقستان رەسپۋبليكاسىنىڭ مەملەكەتتىك حاتشىسى قانات ساۋداباەۆ قاتىسىپ, ءسوز سويلەگەن. سەسسيا جايىندا ءبىز گازەتتىڭ 18-19 قاراشا كۇندەردەگى نومىرلەرىندە جازعانبىز. مەملەكەتتىك حاتشى ساپارىنىڭ سوڭعى كۇنىندە باعدارلامالىق ءىس-شارالار ونشا كوپ ەمەستىگىن, قانات بەكمىرزا ۇلى نەگىزىنەن بەيرەسمي سيپاتتا كەزدەسۋلەر وتكىزەتىنىن بىلگەننەن كەيىن-اق كوڭىلىمىز بارسەلوناعا بارىپ قايتۋعا اۋا بەردى. وسىدان تۇپ-تۋرا جيىرما ەكى جىل بۇرىن, 1989 جىلدىڭ ەرتە كوكتەمىندە يسپانياعا العاش رەت جولىمىز تۇسكەن – سول مەملەكەتتەگى سوۆەت مادەنيەتى كۇندەرىنە قاتىسقان قازاق سسر دەلەگاتسياسىنىڭ قۇرامىندا ەلدىڭ سەگىز قالاسىن ارالاپ قايتقانبىز. كۇنى كەشە ارامىزدان كەتكەن قادىر مىرزاليەۆپەن بىرگە ءجۇرىپ, بىرگە تۇرىپ, ابدەن اڭگىمەلەسكەنبىز. سول ۆالەنسياعا بارعانىمىزدا قادەكەڭنىڭ: «ويپىرماي, يسپانيادا جارتى اي ءجۇرىپ, تۇبىنە كەلىپ تۇرىپ بارسەلونانى كورمەي قايتاتىنىمىز ۇيات بولدى-اۋ. شىركىن, دون كيحوتتىڭ سانچو پانسا ەكەۋى بارسەلوناعا باراتىن جولىن ءبىر كورسەك قوي», دەگەنى ەسىمدە قالىپتى. قىسقاسى, ءتۇن ورتاسىندا تۇرىپ الىپ, ۆالەنسيا ۆوكزالىنا بارىپ, بارسەلونا قايداسىڭ دەپ تارتتىق تا كەتتىك. تاڭ جاڭا اتقاندا جەتكەن قالانى تۇنگە دەيىن ارالاپ, پويىزبەن تۇندەلەتىپ ۆالەنسياعا ورالدىق. ەندى, مىنە, سول ساپاردا كورگەندەرىمىزدى, سەزگەندەرىمىزدى, ويعا تۇيگەندەرىمىزدى ەكشەپ, يسپانيا, بارسەلونا, ساگرادا فاميليا, انتونيو گاۋدي جونىندە قولدا بار كىتاپتاردى, البومداردى قايتا اقتارىپ, ينتەرنەتتەن تابىلعان ماتەريالداردى قوسا وقىپ, الەمگە ايگىلى عيمارات جايىندا جازۋعا بەكىنىپ وتىرمىز. اۋەلدە قالانى تۇتاس قامتي اڭگىمەلەسەك پە دەگەن دە وي بولىپ ەدى. سالقىن سابىرعا سالىپ قاراساق, بارسەلونانىڭ تاريحى, بولەكشە كاتالوندىق رۋحى, باسكىلىك ءبىتىمى, اتاقتى پورتى, گراسيا اۋدانى, كاتالونيا الاڭى, مونجۋيك قىرقاسى, گۋەل پاركى, پەدرالبەس ءموناستىرى, وليمپيالىق دەرەۆنياسى (ايتقانداي, حح عاسىرداعى ەڭ تاماشا وليمپيادا بارسەلونادا وتكەن دەپ سانالادى), «بارسەلونا» فۋتبول كلۋبىنىڭ ستاديونى, پيكاسسونىڭ, ءداليدىڭ مۋزەي-ۇيلەرى, ساردانا ءبيى سياقتى كوزدەن دە, كوڭىلدەن دە كەتپەيتىن سۇلۋ سۋرەتتەرىن ءبىر ماقالادا قوسا قامتۋ قيىن ەكەنىن كورەمىز. ونى ايتاسىز, ءبىز بۇل جولى ۇلى ساۋلەتشى انتونيو گاۋديدىڭ سول بارسەلوناداعى بىرەگەي عيماراتتارىن دا تۇگەل اڭگىمە ەتپەك ەمەسپىز. ونىڭ ۇستىنە تاس تىلىمەن جىر جازعان ۇلى شەبەردىڭ ۆيسەنس ءۇيى, «ناز» ءۇيى, گۋەل سارايى, ەپيسكوپ سارايى, كالۆەت ءۇيى, گۋەل پاركى, باتلو ءۇيى سياقتى عاجايىپ عيماراتتارىنىڭ ءبىرىن كورىپ, ءبىرىن كورىپ ۇلگەرمەي قايتقانىمىز دا بار. ال مىنا ماقالادا ءسوز بولاتىن سوبوردا جارتى كۇن بويى ءجۇرىپ, اياق تالعانشا ارالاعانبىز.
ساۋىتبەك ابدراحمانوۆ.
قالا بوپ اتالعانىنىڭ وزىنە ەكى جارىم مىڭ جىلعا جۋىقتاعان بارسەلونانىڭ تاريحىنا تەرەڭ بويلاماعانمەن, ءبىز ءسوز ەتەتىن عيمارات, ونىڭ ساۋلەتشىسى جايىندا ءبىرشاما تۇسىنىك قالىپتاستىرۋ ءۇشىن قالانىڭ كەيىنگى عاسىرلارداعى شەجىرەسىن شولا كەتكەن ارتىقتىق ەتپەس. يسپانيانىڭ جۇزدەگەن جىلدار بويى حريستياندىق جانە مۇسىلماندىق مادەنيەتتىڭ ايقاسقان الاڭىنا اينالعانى, گارراف تاۋى ەكى ءدىننىڭ وزىندىك ءبىر شەكاراسى بولعانى, دىندەستەرىمىزدىڭ اندالۋزيادا, كوردوۆادا ساۋلەت ونەرىنىڭ ۇلى ەسكەرتكىشتەرىن تۇرعىزعانى (ولاردىڭ ءبىرى – الگامبرا ءجونىندە جاقىندا, 19 قاڭتاردا ءبىزدىڭ گازەتتە سەيفوللا شايىنعازى جازدى), ارابتاردىڭ 716 جىلى وسى بارسەلونانى دا باسىپ الىپ, بۇل جەردەن 801 جىلى كەتكەنى بەلگىلى. زەرتتەۋشىلەر, اسىرەسە, انتونيو گاۋدي شىعارماشىلىعىنا «گاۋدي – تورەادور يسكۋسستۆا» اتتى تاماشا كىتاپ (م., «ەكسمو-پرەسس», 2002) ارناعان گيز ۆان حەنسبەرگەن ساۋلەتشى ونەرىنە ماۆريتانيالىق ارحيتەكتۋرانىڭ وزىندىك ىقپالىن تەرىستەمەيدى. ايتسە دە شىن ۇلىلارعا, ناعىز دانىشپاندارعا سىرتقى اسەردىڭ ءرولى, تەگىندە, ونشا ۇلكەن بولا بەرمەيتىنىن دە ەسكەرگەن ءجون.
كاتالونياعا باسى ءبۇتىن بەرىلىپ, تۋعان جەرىن ەسى كەتە سۇيگەن گاۋدي 74 جىل جاساعان ومىرىندە اتىمەن سىرتقا شىقپاعان دەۋگە دە كەلەدى, ءتىپتى 1910 جىلى ءوزىنىڭ پاريجدەگى كورمەسىنە دە قاتىسپاعان, ونىڭ سىرتقا جاساعان جالعىز ساپارى – ماروككو مەن اندالۋزياعا بارۋى. گاۋدي ورنەگىنە گوتيكا, نەوگوتيكا, ماۆريتانيالىق ستيل, مودەرن قاتار اسەر ەتتى دەگەننىڭ وزىندە, بۇل ارنالاردىڭ ءبارى ونىڭ قيال قازانىندا قورىتىلىپ بارىپ, ەشكىمگە ۇقسامايتىن, قايران قالدىرارلىق كونسترۋكتسيالار قۇراعانىن ايتپاۋ تاعى ءجونسىز. تەگىندە, گاۋديدىڭ ءىزاشارى دا, ءىزباسارى دا جوق دەۋگە بولادى. ءتىپتى ونى باسقا ءبىر ساۋلەتشىلەرمەن سالىستىرا سويلەگەن ءسوز ساپتاۋىن دا سيرەك كەزدەستىرەسىز ارناۋلى ادەبيەتتەن. ارحيتەكتۋرادا گاۋدي مەكتەبى قالىپتاسپاعانى راس, ونىڭ باستى سەبەبى ۇلى شەبەرگە ەلىكتەۋدىڭ ءوزى وڭاي ەمەستىگىندە, بىراق ساۋلەت ونەرىندە شابىت كوزىن جاندى تابيعاتتىڭ وزىنەن كورەتىن جول, ناقتى ايتقاندا – كەڭىستىكتەگى گەومەتريا قۇرالدارى ارقىلى ساۋلەتشىلىكتە ءتول ءتىلىن تابۋعا تىرىساتىندار ءۇشىن گاۋدي ۇيرەنەرلىك ۇزدىك ۇلگى ەكەندىگى تالاس تۋدىرمايدى.
1852 جىلى دۇنيەگە كەلگەن انتونيو گاۋدي-ي-كورنەت – كاتالونيانىڭ ءتول تۋماسى. ءبىز ءسوز ەتكەلى وتىرعان ساگرادا فاميليا (La Sagrada Familia – كيەلى وتباسى) سوبورىنا كىرىسەردەن بۇرىن-اق ول كەڭ تانىلعان, كاسىبي ورتادا ابدەن مويىندالعان ساۋلەتشى ەدى. بارسەلوناعا بارعان تۋريست اتاۋلى ءبىر سوقپاي كەتپەيتىن كەرەمەت ۇيلەردىڭ ءبىرى – كاسا ۆيسەنس ءۇيى سول كەزدە تۇرعىزىلعان. كيەلى وتباسى قۇرمەتىنە سوبور تۇرعىزۋ يدەياسى اۋەلدە بارسەلونالىق كىتاپ ساتۋشى جوزەپ ماريا بوكابەليدىڭ ويىنا كەلەدى. كيەلى وتباسى حرامىن تۇرعىزۋ سول كەزدەگى كاتالونيانىڭ الەۋمەتتىك, ساياسي, مادەني بولمىسىنان تۋىنداعان رۋحاني سۇرانىس ەدى. كاتالون قاۋىمى الەمدەگى وزگەرىستەردى زەر سالا قاداعالاي ءجۇرىپ, وزدەرىنىڭ حالىقتىق بىرەگەيلىگىن قالپىنا كەلتىرۋ قادامدارىنا كىرىسىپ جاتقان كەز بولاتىن. وسىنداي تۇستا حالىق ءۇشىن سالىنىپ, حالىقتىڭ ءوزى سالعان سوبور قۇرىلىسى باستالعان. كيەلى وتباسى سوبورى اۋەلدەن جۇرتشىلىقتىڭ ساداقا اقشاسىنا تۇرعىزىلعان, ءالى كۇنگە دەيىنگى جۇمىسىنىڭ ءبارى ساداقانىڭ ارقاسىندا اتقارىلىپ كەلەدى. سونىمەن, سوبور يدەياسىنىڭ يەسى ءبىر كۇنى ءتۇس كورەدى. تۇسىندە بولاشاق حرامدى تۇرعىزۋ كوكپەڭبەك كوزدى, بويى ورتاشادان الاسا جىگىتكە تاپسىرىلعان ەكەن. ەرتەڭىندە قالا قۇرىلىسى ماسەلەلەرىمەن اينالىساتىن كەڭسەگە بارسا, الدىنان ءدال تۇندە تۇسىندە كورگەن ادام شىعا كەلەدى. ول – 31 جاستاعى ارحيتەكتور انتونيو گاۋدي بولاتىن.
ساگرادا فاميليا – گاۋدي ونەرىنىڭ شىڭى. بۇلاي دەپ ايتۋ دا ازدىق ەتەدى. ساگرادا فاميليا – گاۋدي ءومىرىنىڭ بار ءمانى. گەتە «فاۋستى» قالاي جازسا, گاۋدي دە ءوز سوبورىن سولاي تۇرعىزعان دەي الامىز. وسىناۋ ۇلى تۋىندىسىنا ول ءومىرىنىڭ قىرىق جىلدان استام ۋاقىتىن ارناعان, سونىڭ ىشىندە كەيىنگى 12 جىلدا (1914-1926) باسقا تاپسىرىس, ۇسىنىس اتاۋلىنىڭ ءبارىن جيىپ قويىپ جۇمىس ىستەگەن, ءتىپتى كەيىنگى كەزدە سالىنىپ جاتقان عيماراتتىڭ ىشىنە كوشىپ كىرىپ الىپتى. گاۋدي – وتباسىن قۇرماي, پەرزەنتسىز وتكەن, وزگەلەرگە ارناپ قانشا ءۇي سالسا دا وزىنە جەكە باسپانا بۇيىرماعان ادام. بۇدان گاۋدي كەدەيلىكپەن وتكەن كىسى دەگەن ۇعىم تۋمايدى. ول ءوزىنىڭ جەر بەتىندەگى مەسسياسىن باسقاشا ۇعىنعان. ساگرادا فاميليا قۇرىلىسى بىتپەي قالعانى بەلگىلى. ءوزىنىڭ كوزى تىرىسىندە بىتپەيتىنىن گاۋديدىڭ ءوزى دە بىلگەن ەكەن. «بۇل عيماراتتىڭ قوجايىنى اسىقپايدى», دەگەن ءسوزدى ايتقاندا گاۋدي جاراتقاننىڭ تاپسىرماسىن ورىنداپ, اماناتىن اقتاپ جۇرگەنىن اڭعارتقانى انىق. ءبىز جوعارىدا اتاپ وتكەن «گاۋدي – تورەادور يسكۋسستۆا» كىتابىندا گاۋدي جونىندە ءتىپتى «رابوتاەت ۆ ديالوگە س بوگوم...» (387-بەت) دەگەن ءسوز دە بار. وسى ارادا مىنا جايدى دا ەسكەرتە كەتۋگە بولار ەدى. گاۋدي – بۇكىل يسپانيانى بىلمەدىك, بارسەلونا ءۇشىن ەڭ قاسيەتتى تۇلعا. بارىمىز دا, نارىمىز دا گاۋدي, دەپ سويلەيدى كاتالوندىقتار. 1998 جىلدان بەرى ۇلى يسپان ارحيتەكتورىن اۋليەلەر قاتارىنا (ليك سۆياتىح) قوسۋعا دايىندىق جۇمىستارى ءجۇرىپ جاتىر. سودان بەرى شەشىلمەيتىن ول نە قىلعان ماسەلە دەپ قالماڭىز. ءتارتىپ سولاي. ادامدى اۋليە كىسى دەپ تانۋ باتىس الەمىندە ونداعان جىلدار بويى قارالا بەرەدى. اسىعاتىن ەشتەڭە جوق. كەتەر ادام كەتتى. ەندى كۇماندى شەشىم قابىلداپ قويۋعا بولمايدى. اۋليە اتانۋعا قارالاتىن ادامنىڭ ءومىرى سول ونداعان جىلدار بويى ەگجەي-تەگجەيلى تەكسەرىلە بەرەدى, تەكسەرىلە بەرەدى, بارلىق دەرەكتەر جينالادى, بارلىق دەرەكتەر تەكسەرىلەدى. ءبىر جەردە بولماسا ءبىر جەردە پەندەگە ءتان كەمشىلىككە جول بەرگەن بولسا ول ادام اۋليە اتانا المايدى. بۇرىنعىسىنداي قۇرمەتتەلە بەرۋى مۇمكىن.
كاتوليك ءدىنىن ۇستاناتىندار ءۇشىن بيىكتىك – بولەكشە كاتەگوريا. 69 مەترلىك نوتر-دام, 110 مەترلىك قاسيەتتى پاۆەل سوبورى, 137 مەترلىك قاسيەتتى پەتر بازيليكاسى, 157 مەترلىك كەلن سوبورى سياقتى عيماراتتار جاراتقانعا جاقىنداۋدىڭ جولىن ىزدەۋدەن تۇرعىزىلعان. گاۋدي جوباسى بويىنشا كيەلى وتباسى سوبورى الىپ اۋقىمىمەن دە (ۇزىندىعى – 94 مەتر, ەنى – 60 مەتر), اسقاق تۇرقىمەن دە (بيىكتىگى – 170 مەتر) ءبىر كورگەن جانعا قۇداي قۇدىرەتىن سەزىندىرىپ تۇرۋعا ءتيىس ەدى. عيماراتتىڭ قالانىڭ كەز كەلگەن جەرىنەن كورىنۋىن بىلاي قويعاندا, تەڭىز ايدىنىندا ءجۇزىپ كەلە جاتقان كەمەلەرگە بەينە ءبىر شامشىراق سياقتى اسەر ەتۋى دە ويلاستىرىلعان بولاتىن. دەگەنمەن, گاۋدي تۇرعىزعان حرامدى يدەال, ياعني مۇرات تۇتارلىق, اڭسارعا اينالدىرارلىق حرام ساناتقىزاتىن قىمبات قاسيەت ونىڭ اۋقىمى دا, بيىكتىگى دە ەمەس. انتونيو گاۋدي حرام ءانسامبلىنىڭ ەڭ باستى ماقساتقا – ليتۋرگيا راسىمدەرىن وتكىزۋگە ءمىنسىز قىزمەت ەتۋىن الدىمەن قامداعان. بۇل ءۇشىن ول ءوزى ويلاپ تاپقان ەڭ جاڭا ارحيتەكتۋرالىق جانە كوركەمدىك شەشىمدەردىڭ ءدىني عيبادات تاجىريبەسىمەن ۇيلەسىمدى شىعۋىنا قاتتى كۇش سالعان.
كيەلى وتباسى سوبورىنىڭ ساۋلەت ونەرىنىڭ جاۋھار تۋىندىسى رەتىندە تالاسسىز تانىلاتىنىن ايتۋدىڭ ءوزى ارتىق. ماسكەۋدىڭ «ۆەچە» باسپاسى شىعارعان «100 ۆەليكيح چۋدەس سۆەتا» كىتابىنان دا ساگرادا فاميلياعا ارنالعان بىرنەشە بەتتى تاباسىز. «سامىە كراسيۆىە ي زنامەنيتىە حرامى, موناستىري» كىتابى (م., «اۆانتا», 2005) بۇل عيماراتتى «ساموە زناچيتەلنوە ي نەۆەروياتنوە سوورۋجەنيە حح ۆەكا» دەپ باعالايدى.
مۇنىڭ سىرى, بىزدىڭشە, گاۋدي عيماراتىنىڭ ونەر تۋىندىسى اۋقىمىنان اسىپ, ءومىردىڭ وزىنە اينالعان وزگەشە قاسيەتىندە. گاۋدي سوبوردى جاڭا وسيەتتىڭ ارحيتەكتۋرالىق بايانى, تاستاعى ۋاعىز رەتىندە ءورىپ شىققان. كوپتەگەن كىتاپتاردا گاۋدي تۋىندىسىنىڭ ميستيكالىق سيپاتى اتاپ ايتىلادى. شىنىندا دا, بارسەلونا سوبورى قولدان تۇرعىزىلماعانداي, وسى كۇيىندە جەردى جارىپ, الدە ءبىر جانارتاۋلىق سىلكىنىستەن اتىلعان كۇيىندە تاس بولىپ قاتىپ قالعانداي اسەر ەتەدى. ونداي ويعا ساگرادا فاميليانىڭ قۇمىرسقانىڭ يلەۋىندەي نەمەسە بالانىڭ تەڭىز جاعاسىندا ويناپ ءجۇرىپ, دىمقىل قۇمدى سۋىن سورعالاتىپ ۇيە سالعانىنداي كورىنەتىن سىرت سۋرەتى دە بەيىمدەي بەرەدى. ساگرادا فاميليا جاڭا بوي كوتەرە باستاعاندا قالا جۇرتى: «ويباي, مىناۋ نە پالە؟! وسىنداي شىركەۋ بولا ما ەكەن؟ قۇمىرسقانىڭ يلەۋى مە, تاس سۇڭگى مە, نەمەنە؟» دەپ شۋلاسىپ كەتكەن ەكەن.
بۇكىل سوبور ارحيتەكتور انتونيو گاۋديدىڭ ءوزىن كادىمگى كەيىنگى كەزدىڭ نۇق پايعامبارىنداي كوزگە ەلەستەتەدى. نۇق پايعامبار توپان سۋدان قۇتقاراتىن كەمەگە كەۋدەسىندە جانى بار جانۋار, اڭ-قۇس پەن جاندىكتەردىڭ ءبارىن جۇپ-جۇبىمەن مىنگىزدى دەلىنسە, گاۋدي سوبورىندا جان-جانۋارعا قوسا وسىمدىكتىڭ تۇرلەرى دە ورىن تاپقان. ساگرادا فاميليانىڭ قاسبەتىندەگى (فاساد) تاسقا ءورىلىپ جىبەرىلگەن ماق ۇلىق پەن وسىمدىكتىڭ اراسىندا نە جوق دەيسىز. جىلانىڭىز دا, كەسىرتكەڭىز دە, ءيتىڭىز دە, قارلىعاشىڭىز دا, تاسباقاڭىز دا, قۇرباقاڭىز دا, ۇلۋىڭىز دا, تاۋىعىڭىز دا, قويىڭىز دا, ءبارى تاسقا جابىسىپ الىپ, ءورىپ ءجۇر, تاستان پىر ەتىپ ۇشقالى تۇر, باقباق, قامىس, قىرىققۇلاق, راۋشان, ءزايتۇن, انار, وشاعان, جۇگەرى, بيداي, ءجۇزىم, الما دەيسىز بە, ءبارى ءوسىپ, ءبارى ءپىسىپ تۇر. سوبور مۇنارالارىنىڭ بيداي ساباعى كۇيىندە جاسالعانىنىڭ اسەرى سونداي, جاڭبىر جاقسىلاپ جاۋىپ بەرسە, ساگرادا فاميليا كوكتەپ, ءوسىپ-ءونىپ, بيىكتەپ كەتەتىندەي اسەر قالدىرادى. گاۋديدىڭ مەن شەبەرحانامنىڭ جانىندا ءوسىپ تۇرعان اعاشتان ۇيرەنەمىن دەگەن ءسوزى بار ەكەن. ءساۋلەتشى حرام كۇمبەزدەرىن كادىمگى پالما جاپىراقتارىنا اينالدىرىپ جىبەرگەن.
روجدەستۆو قاسبەتىنىڭ بىرنەشە ءدىڭماڭدايشاسى (پورتيك) بار. ءبىز بارسەلونادان الا قايتقان بەينەديسكىدەن قايتالاي كورگەنىمىزدە ءۇمىت, سەنىم, مەيىرىم ءدىڭماڭدايشالارىنداعى مۇسىندىك كومپوزيتسيالاردىڭ اسەرى ەرەكشە ەكەنىنە تاعى كوزىمىز جەتە ءتۇستى. وسىنىڭ ءبارى ادام قولىمەن جاسالعان, ءبىر وقىس قيمىل جاساساڭىز قايتادان قالپىنا كەلمەيتىن ماتەريالعا – تاسقا قاشالعان دەگەنگە سەنۋ قيىن. گاۋديدىڭ تاپسىرىسىمەن جاسالعان سكۋلپتۋرالىق بەينەلەردىڭ پسيحولوگيالىق نانىمدىلىعى قايران قالدىرادى. ولاردىڭ ءبارى دە ناتۋرادان كوشىرىلگەن. يرود پاتشانىڭ امىرىمەن ولتىرىلگەن نارەستەلەردىڭ ازابىن ءدال بەينەلەۋ ءۇشىن گاۋدي اۋرۋحانادا جاڭا عانا جان تاپسىرعان سابيلەردىڭ بەت ءجۇزىنەن گيپس ماسكالار جاساۋعا دەيىن بارعان ەكەن.
ارينە, گاۋدي جاۋھارىنىڭ ەڭ كەرەمەتى – روجدەستۆو قاسبەتى. ونداعى ءۇمىت, سەنىم, مەيىرىم بەتشە بوساعالارىنىڭ (پورتالدار) ارقايسىسىندا حريستوس ءومىرىنىڭ اسا ماڭىزدى ساتتەرى بەينەلەنگەن. مۇنداعى كەز كەلگەن دەتال حريستوس ۇلىلىعىن دارىپتەۋگە قىزمەت ەتىپ تۇر. مىنا كريپتوگرامماعا ءبىر ءسات كوز سالىڭىزشى.
| 1 | 14 | 14 | 4 |
| 11 | 7 | 6 | 9 |
| 8 | 10 | 10 | 5 |
| 13 | 2 | 3 | 15 |
