«راحات» برەندى رەسەيدە ۇزدىك اتاندى
جۋىردا ماسكەۋدە ءوتكەن حالىقارالىق, بەدەلدى بايقاۋدا «راحات» كونديتەرلىك فابريكاسى ءونىم ساپاسىنىڭ جوعارىلىعى ءۇشىن باس ءجۇلدە مەن توعىز التىن مەدالدى جەڭىپ الدى. قازاقستاندىقتارعا كەڭىنەن تانىمال شوكولادتار مەن كامپيتتەردى بەدەلدى ساراپشىلار عانا ەمەس, رەسەيلىك قاراپايىم تۇتىنۋشىلار دا جوعارى باعالادى. قازىردىڭ ءوزىندە شىعارىلاتىن ءونىمنىڭ 5 پايىزدان استامىن اكتسيونەرلىك قوعام كورشى رەسەيگە جىبەرەدى.
«راحات» كونديتەرلەرى ءۇشىن كەدەندىك وداققا كىرۋ توسىن جايت بولا قويعان جوق. ولار رەسەيدىڭ كوتەرمە ساۋدامەن اينالىساتىن ساتىپ الۋشىلارىمەن بۇرىننان بايلانىس ورناتقان بولاتىن جانە شەكارادان ءوتۋ قيىندىقتارىنا قاراماستان, ءوز ءونىمدەرىن ەلىمىزگە تاياۋ جاتقان رەسەي ايماقتارىنا جەتكىزەتىن. ەندى كەدەندىك راسىمدەر جەڭىلدەتىلىپ, اكىمشىلىك كەدەرگىلەر جويىلعان كەزدە مۇمكىندىكتەر اۋقىمى كەڭەيدى. رەسەي جەرى ۇلان-عايىر دەسەك تە, لوگيستيكانىڭ كەڭ كومەيى ءونىم قۇنىن ارتتىراتىندىقتان, كونديتەرلەر شەكاراعا جاقىن ايماقتاردى تاڭدادى. مىنە, ەندى رەسەيدىڭ 4 ءىرى قالاسى – ومبى, نوۆوسيبيرسك, چەليابينسك, بارناۋل مەن ولار ورنالاسقان وبلىستاردىڭ تۇرعىندارى قازاقستاننىڭ ءتاتتى ءونىمدەرىن ساتىپ الۋ مۇمكىندىگىنە يە.
– ارينە, بۇعان بۇقارالىق اقپارات قۇرالدارىندا بىرنەشە ساتىدا, بەلسەندى تۇردە وتكىزىلگەن جارناما ناۋقانى, كونفەرەنتسيالار مەن كورمەلەرگە قاتىسۋ, ءونىمدى سەرتيفيكاتتاۋ بويىنشا اتقارىلعان, ونى كورشىلەس ەل جاعدايىنا بەيىمدەۋگە بايلانىستى جۇرگىزىلگەن جۇمىستار ءىزاشار بولدى, – دەيدى «راحات» اق ماركەتينگ جونىندەگى ديرەكتورى ولگا گورديەنكو. – ءبىزدىڭ ءونىمىمىزدىڭ تارالۋىنا بۇل وڭىردەگى تىعىز دوستىق, وتباسىلىق بايلانىستار, سونداي-اق كەڭەس وداعى كەزىنەن ساقتالعان, ءداستۇرلى قارىم-قاتىناستار كوپ سەپتىگىن تيگىزدى.
جارنامالىق قىزمەتتى قارقىندى جۇرگىزۋگە ءمۇمكىندىك بەرەتىن, شىعىنداردى ءىشىنارا وتەۋ جولىمەن سىرتقى رىنوكقا شىعۋدا مەملەكەتتىڭ ايتارلىقتاي قولداۋ كورسەتىپ وتىرعانىن اكتسيونەرلىك قوعام ريزاشىلىقپەن جەتكىزدى. جاڭا ايماقتارعا ەنۋدە مۇنداي ماركەتينگتىك ساياساتتى قولدانۋ ءوز جەمىسىن بەرىپ تە ۇلگەردى. ەگەر كەدەندىك وداققا دەيىن رەسەيگە جەتكىزىلەتىن تاۋار كولەمى وندىرىلەتىن بارلىق تاۋار كولەمىنىڭ 0,47 پايىزىن قۇراسا, قازىر بۇل كورسەتكىش 5,2 پايىزدى قۇرايدى.
«راحات» برەندى تانىمال, سوعان وراي سىبىرلىكتەر دە تەك اتاۋى تانىس كامپيتتەردىڭ ساپاسىن باعالاپ قويماي, «قىزىل تاڭ», «ايگەرىم», «بالاپان», «ايتىس», «گاۋھار» دەپ اتالاتىن كامپيتتەرگە دە جوعارى باعا بەردى.
حالىقارالىق ساراپشىلار دا كومپانيانىڭ ءونىم ساپاسىن جانە شىعارماشىلىق ىزدەنىسىن اتاپ كورسەتتى. ناۋرىزدىڭ سوڭىندا ءماسكەۋدەگى حالىقارالىق ءونەركاسىپ اكادەمياسىندا «راحات» اق دەلەگاتسياسى قاتىسقان, «ءححى عاسىردىڭ كونديتەرلىك ونىمدەرى» سەگىزىنشى حالىقارالىق كونفەرەنتسيا ءوتتى. رەسەيدىڭ, بەلارۋستىڭ, قازاقستاننىڭ, ۋكراينانىڭ 27 وڭىرىنەن, الىس شەت ەلدەردەن كەلگەن 240 مامان كونديتەرلىك ءوندىرىس سالاسىنداعى نەگىزگى اعىم, جاڭا تەحنولوگيالاردى پايدالانۋ ماسەلەلەرىن, شيكىزات پەن قوسپالاردىڭ ءار ءتۇرىن قولدانۋ مۇمكىندىكتەرىن تالقىلاۋعا قاتىستى.
كونفەرەنتسيا شەڭبەرىندە حالىقارالىق ساپا بايقاۋى وتكىزىلدى. وندا قاتىسۋشى-كاسىپورىنداردىڭ 130-عا جۋىق ءونىم ۇلگىسى قويىلدى. «راحات» اق-نىڭ تەحنولوگتارى مەن ءوندىرۋشىلەرى ساپالىق تۇرعىدان باعالاۋعا كونديتەرلىك ونىمدەردىڭ قىمبات كادەسىيلىق تۇرلەرىن ۇسىنباي, كۇندەلىكتى تۇتىناتىن 9 ءتۇرىن كورسەتتى. ساپانى باعالاۋ كەشەندى تۇردە ءجۇرگىزىلدى. قويىلعان ونىمدەردى اشىق تۇردە كورسەتىپ, قالاعانداردىڭ بارلىعىنا ءدام تاتقىزۋ ارقىلى تۇتىنۋشىلار پىكىرى تىڭدالدى. بۇعان قوسا وسى سالانىڭ, رف اۋىلشارۋاشىلىعى مينيسترلىگى, كونديتەرلىك ونەركاسىپ معم عزي, حالىقارالىق ونەركاسىپ اكادەمياسى, «اسكوند» كونديتەرلەر اسسوتسياتسيالارىنىڭ ماماندارى ساپانى باعالاۋدىڭ قاتاڭ كاسىبي قاعيدالارى – سىرتقى كورسەتكىشتەر, پايدالانىلعان كومپونەنتتەردىڭ سايكەستىگى, قاپتامادا بەرىلگەن ءمالىمەتتەردىڭ تولىقتىعى مەن باسقا دا ماڭىزدى كورسەتكىشتەر بويىنشا جابىق تۇردە دامگە ساراپتاما جاسادى.
«راحات» ونىمدەرىنىڭ 9 اتاۋى دا «جوعارى ءونىم ساپاسى ءۇشىن» التىن مەدالىمەن ماراپاتتالدى. ولاردىڭ قاتارىندا «راحات 65%», «راحات 75%», «راحات 80%» شوكولادتارى, «راحات», «تريۋفەلنىە», «ماگيا», «ماسكا», «ەلەگيا» كامپيتتەرى, «راحات» كارامەلى بار. جۇلدەلى شىڭداردى وسىنشالىقتى تابىسپەن, باتىل تۇردە باعىندىرۋ مۇنداي بەدەلدى كاسىبي فورۋم ءۇشىن ايتۋلى وقيعا بولدى. بايقاۋ ناتيجەلەرى مەن كونديتەرلىك ونىمدەردىڭ تۇتىنۋ دەڭگەيىن جاقسارتۋ سالاسىنداعى ۇنەمى ىزدەنىسى, ەرەن ەڭبەگى ءۇشىن «راحات» اكتسيونەرلىك قوعامى «جوعارى ءونىم ساپاسى ءۇشىن» باس جۇلدەسىن جەڭىپ الدى.
ۆەنەرا تۇگەلباي.
