تۇراقتىلىق تىرەگى – تاتۋلىق

ءبىز – قازاقستاندىقتارمىز! ەرلىكتىڭ ەرەنى – ەلدىكتىڭ ەرلىگى 3 ءساۋىر كۇنى قازاقستان حالقى سونداي ەرلىك تانىتتى. ەلدىك ەرلىگى الدىمەن سايلاۋ­شى­لاردىڭ 90 پايىزدان استامىنىڭ داۋىس بەرۋگە كەلۋىنەن كورىندى, ودان كەيىن سونشا سايلاۋشىنىڭ 95 پايىزدان استامىنىڭ ءبىر ادامعا – تاۋەلسىز قازاقستان مەملەكەتىن قۇ­رۋشى, ۇلت كوشباسشىسى, ەلباسى نۇرسۇلتان نازارباەۆقا داۋىس بەرۋىنەن كورىندى. بۇگىنگى تاڭدا الەم ساياساتتانۋشىلارى نۇرسۇلتان نازارباەۆتىڭ سايلاۋداعى جار­قىن جەڭىسىنىڭ فەنومەندىك سيپاتىن تالداپ, تارازىلاپ جاتىر. قاتپارى قالىڭ وسىناۋ قازاقستاندىق قۇبىلىستىڭ سەبەپتەرى كوپ. سولاردىڭ اراسىنداعى ەڭ باستىسى – ەگەمەندىكتىڭ ەلەڭ-الاڭىنان بەرى ەلىمىزدە ءدايىم قوعامدىق تۇراقتىلىق ساقتالىپ كەلە جاتقاندىعى. ال تۇراقتىلىقتىڭ باستى تەتىگى – تاتۋلىق. «بىرلىك – ءبىزدىڭ قاسيەتتى تۋىمىز», دەگەن بولاتىن پرەزيدەنت تاۋەل­سىزدىك تۋىن جاڭا تىككەن تۇستا-اق. «قازاق­ستان­داعى ۇلتارالىق جاراستىقتىڭ نەگىزگى ۇيىت­قىسى بولۋ مىندەتىن الدىمەن وسى اتا­مە­كەننىڭ يەسى – قازاق حالقى ءوز موينىنا الۋى كەرەك», دەگەندى دە سول كەزدە ايتىپ, مىندەتتەگەن. حالقىمىز ول مىندەتتىڭ ۇدە­سىنەن شىعا ءبىلدى. تاريح توعىستىرىپ, تاعدىر تابىستىرعان سان ەتنوستىڭ باسىن بىرىكتىرىپ, تۋىستىق تۋىن قولدا بەرىك ۇستاي ءبىلدى. ەلىمىزدى مەكەن ەتكەن الۋان ەتنوستار وكىلدەرى دە مەملەكەتتى اياعىنان تىك تۇرعى­زىپ, ەلدى ەڭسەلەنتكەن, بارا-بارا الەمگە ءاي­گىلى ەتكەن كوشباسشىمىزدىڭ توڭىرەگىنە توپ­تا­سىپ, ازاماتتىڭ التىن باسىن ارداقتاي الدى. ەلباسىمىزدىڭ: «بىرلىگى بەرەكەلى, تىرلىگى مەرەكەلى, ىنتىماعى جاراسقان ەلدىڭ عانا ىرىسى مەن تابىسى مول بولماق», دەگەن ءسوز­دەرىن تاتۋلىقتىڭ تۋى ەتىپ ۇستادى.  ويتكەنى, ءبىزدىڭ ءبارىمىزدىڭ مۇددەمىز ءبىر. پرەزيدەنت بۇل جايىندا دا: «ادام مەن ادامدى, حالىق پەن حالىقتى, ەل مەن ەلدى جاقىنداستىرار ەڭ بەرىك دانەكەر – مۇددە بىرلىگى», دەپ ايشىقتى ايتقان.  ءبىزدىڭ  مۇددەمىز – ورتاق وتانىمىز – تاۋەلسىز قازاقستاننىڭ ءوسۋى, وركەندەۋى, بارشا قازاقستاندىقتاردىڭ باياندى باقىتى. قازاقستان حالقى اسسامبلەياسىنىڭ ءدۇي­سەن­بى كۇنى اشىلاتىن XVII سەسسياسى قار­سا­ڭىندا جاريالانىپ وتىرعان مىنا فوتولار – ءبىزدىڭ ەلىمىزدەگى قوعامدىق جاراسىم مەن ەتنوسارالىق كەلىسىمنىڭ كەلىستى كورىنىستەرى.