ورتالىق كوممۋنيكاتسيالار قىزمەتىندە ينتەرنەتتە وتىراتىن بالالاردىڭ قاۋىپسىزدىگىنە ارنالعان بريفينگ ءوتتى.
وعان ادام قۇقىعى جونىندەگى ۇلتتىق ورتالىقتىڭ باسشىسى سەرىك وسپانوۆ, ءبىلىم جانە عىلىم مينيسترلىگى بالالار قۇقىقتارىن قورعاۋ كوميتەتى توراعاسىنىڭ ورىنباسارى ەرجان ەرسايىنوۆ پەن اقپارات جانە كوممۋنيكاتسيالار مينيسترلىگىنىڭ بايلانىس, اقپاراتتاندىرۋ جانە بۇقارالىق اقپارات قۇرالدارى سالاسىنداعى مەملەكەتتىك باقىلاۋ كوميتەتى توراعاسىنىڭ ورىنباسارى ميحايل كوميسساروۆ قاتىستى.
بريفينگتە اۋەلى بالالاردىڭ قاۋىپسىزدىگى تۋرالى سەرىك وسپانوۆ ايتىپ بەردى. ول بىلتىر ومبۋدسمەننىڭ اتىنا بالالاردىڭ قۇقىقتارىنىڭ بۇزىلۋىنا قاتىستى 81 ارىز كەلىپ تۇسكەنىن, ولاردىڭ دەنى زورلىق-زومبىلىق, اليمەنتتەردى ءوندىرۋ, ءتۇرلى جاردەماقىلاردى تولەۋ, مۇگەدەكتىكتى بەلگىلەۋ, بالالاردى ينستيتۋتتىق مەكەمەلەرگە ورنالاستىرۋدىڭ زاڭدىلىعى, ءبىلىم بەرۋ مەكەمەلەرىنىڭ قىزمەت ەتۋى جانە باسقا دا ماسەلەلەرگە قاتىستى بولعانىن, ال بالالاردىڭ وزدەرىنەن 3 ارىزدىڭ عانا تۇسكەنىن ايتتى.
– وسىعان بايلانىستى, – دەدى ول – وتكەن جىلى ومبۋدسمەننىڭ تاپسىرماسى بويىنشا اپپارات قىزمەتكەرلەرى جەتىم جانە اتا-انانىڭ قامقورلىعىنسىز قالعان بالالارعا ارنالعان مەكەمەلەرگە مونيتورينگ جۇرگىزدى. قازىرگى كەزدە ينتەرنەت ادامنىڭ ومىرىنە جامان جاعىمەن دە كەسىرىن تيگىزىپ جاتىر. وسى جاعدايدى ەسكەرىپ, مەملەكەتتىك ورگاندار تاراپىنان بىرقاتار جۇيەلى جۇمىستار جاسالىپ كەلەدى. الايدا بىزگە ءالى قول قۋسىرىپ وتىرۋعا بولمايدى. ەندى ادام ەلىمىزدە ينتەرنەت, تەلەارنا, باسقا دا تەحنولوگيالار ارقىلى بالانىڭ ومىرىنە قاۋىپ تونىدىرەتىن نارسەلەر جاساسا, زاڭ جۇزىندە جاۋاپقا تارتىلادى.
جيىندا ءبىلىم جانە عىلىم مينيسترلىگىنىڭ وكىلى ۆەدومستۆو تاراپىنان اتقارىلىپ جاتقان جۇمىستار تۋرالى ايتتى. ول بالانىڭ قاۋىپسىزدىگى, ونىڭ بوس ۋاقىتىن ءتيىمدى وتكىزۋ ءۇشىن ءتيىستى شارالاردىڭ ىستەلىنىپ جاتقانىن, ءبىلىم بەرۋ ۇيىمدارى پروكۋراتۋرا جانە اتا-انالار قوعامداستىعىمەن بىرىگىپ, بالالاردىڭ ءتارتىبى مەن بوس ۋاقىتىن باقىلاۋدى كۇشەيتۋ بويىنشا ۇنەمى ءتۇسىندىرۋ جۇمىستارىن جۇرگىزىپ وتىراتىنىن جەتكىزدى.
– وسى جۇمىستىڭ ناتيجەسىندە بالانىڭ ومىرىنە كەرى اسەرىن تيگىزەتىن الەۋمەتتىك جەلىنى بەلسەندى پايدالانۋشىلار انىقتالدى. قازىر ءبىز وسى باعىتتا ءتيىستى ورگاندارمەن ناقتىلى جۇمىس ىستەپ جاتىرمىز. ءبىلىم جانە عىلىم مينيسترىلىگىنىڭ باستاماسىمەن 10 – 21 ءساۋىر ارالىعىندا ءبىلىم بەرۋ ۇيىمدارىندا ءداستۇرلى «قاۋىپسىزدىك ينتەرنەت» رەسپۋبليكالىق اقپاراتتىق كامپانياسى وتەدى. بالالاردىڭ قۇقىقتارى مەن زاڭدى مۇددەسىن قورعاۋ ماسەلەلەرى بويىنشا مينيسترلىكتىڭ بالالاردىڭ قۇقىقتارىن قورعاۋ كوميتەتىنىڭ 8 7172 74 25 28 سەنىم تەلەفونىنا حابارلاسۋعا بولادى, – دەدى ول.
ال اقپارات جانە كوممۋنيكاتسيالار مينيسترلىگىنىڭ وكىلى كەلتىرگەن دەرەكتەرگە قاراعاندا, بىلتىر ۋاكىلەتتى ورگانمەن جۇرگىزىلگەن ەسكەرتۋ جۇمىستارىنىڭ نەگىزىندە ينتەرنەت-رەسۋرستار اكىمشىلىكتەرىمەن 110 مىڭنان استام قۇقىققا قارسى ماتەريالدار جويىلعان. 1148 قۇقىققا قارسى ماتەريالدارعا قاتىستى 144 سوت ورگاندارىنىڭ شەشىمدەرى ورىندالدى.
وتكەن جىلى قاتىگەزدىكتى, زورلىق-زومبىلىققا باس ۇرۋدى جانە پورنوگرافيانى ناسيحاتتايتىن 26 081 ماتەريالدارعا قولجەتىمدىلىكتى شەكتەۋ بويىنشا شارالار قولدانىلدى.
جىلدىڭ باسىنان اقپارات جانە كوممۋنيكاتسيالار مينيسترلىگىنىڭ تالاپتارى بويىنشا الەۋمەتتىك جەلىلەردە ورنالاسقان سۋيتسيدتىك مىنەزدەگى 237 قوعامداستىقتار مەن توپتار جابىلعان.
داستان كەنجالين, «ەگەمەن قازاقستان»
