ماڭعىستاۋ وبلىسىنىڭ اكىمى اۋىستى

ەرالى توعجانوۆ ماڭعىستاۋ وبلىسىنىڭ اكىمى بولىپ تاعايىندالدى, دەپ حابارلايدى pm.kz. پرەمەر-مينيستر باقىتجان ساعىنتاەۆ پەن پرەزيدەنت اكىمشىلىگى جەتەكشىسىنىڭ ءبىرىنشى ورىنباسارى مارات ءتاجين جۇمىس ساپارىمەن اقتاۋعا كەلىپ, وبلىستىق ءماسليحاتتىڭ كەزەكتەن تىس سەسسياسىنا قاتىستى. وتىرىس بارىسىندا باقىتجان ساعىنتاەۆ مەملەكەت باسشىسىنىڭ ءماسليحات دەپۋتاتتارىنا ارنالعان حاتىن وقىدى. بۇل حاتتا وبلىس اكىمى قىزمەتىنە ەرالى توعجانوۆتىڭ كانديداتۋراسى ۇسىنىلعان. دەپۋتاتتار پرەزيدەنتتىڭ ۇسىنىسىن ءبىر اۋىزدان قولدادى. وسى قىزمەتتى 2013 جىلدان بەرى اليك ايدارباەۆ اتقارعان بولاتىن. ەرالى توعجانوۆ بۇعان دەيىن قازاقستان حالقى اسسامبلەياسى توراعاسىنىڭ ورىنباسارى قىزمەتىندە بولدى. ول - ساياساتتانۋ عىلىمدارىنىڭ دوكتورى. 1963 جىلى 13 مامىردا باتىس قازاقستان وبلىسىندا دۇنيەگە كەلدى. جوعارى ءبىلىمدى: ە.ا. بۋكەتوۆ اتىنداعى قاراعاندى مەملەكەتتىك ۋنيۆەرسيتەتىندە (1983-1988 جج.), قۇقىقتانۋ. قر عىلىم اكادەمياسىنىڭ مەملەكەت جانە قۇقىق ينستيتۋتى (1991-1994جج.), زاڭگەر. كەڭەس وداعىنىڭ اسكەر قاتارىندا قىزمەت ەتتى. 1991 جىلدان 1998 جىلعا دەيىن ە.ا. بۋكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ مەملەكەت جانە قۇقىق تەورياسى مەن تاريحى كافەدراسىندا وقىتۋشى. 1994-1996 جج. قر عىلىم اكادەمياسىنىڭ مەملەكەت جانە قۇقىق ينستيتۋتىندا عىلىمي قىزمەتكەر. 1996 جىلدان باستاپ قازاق گۋمانيتارلىق زاڭ ۋنيۆەرسيتەتىنىڭ مەملەكەتتىك قىزمەت جانە حالىقارالىق قۇقىق فاكۋلتەتىنىڭ اعا وقىتۋشىسى, دەكان ورىنباسارى قىزمەتىن اتقاردى. 1994 جىلدان باستاپ اتالعان ۋنيۆەرسيتەتتىڭ حالىقارالىق قۇقىق فاكۋلتەتىنىڭ دەكانى بولدى. 1999 جىلى فيليال دەكانى, 2001 جىلى استانا قالاسىنىڭ قازاق گۋمانيتارلىق زاڭ ۋنيۆەرسيتەتىنىڭ قۇقىق جانە مەملەكەتتىك قىزمەت ينستيتۋتىنىڭ ديرەكتورى بولىپ تاعايىندالدى. 2001-2006 جج. قاراعاندى وبلىسى اكىمىنىڭ ورىنباسارى. 2006-2008 جج. قازاقستان رەسپۋبليكاسى ادىلەت مينيسترلىگى ءدىن ىستەر كوميتەتىنىڭ توراعاسى بولىپ جۇمىس ىستەدى. 2008 جىلدىڭ قاڭتارىندا قازاقستان رەسپۋبليكاسى پرەزيدەنتى وكىمىمەن قازاقستان رەسپۋبليكاسى پرەزيدەنت اكىمشىلىگىنىڭ قازاقستان حالقى اسسامبلەياسى حاتشىلىعىنىڭ مەڭگەرۋشىسى بولىپ تاعايىندالدى. مەملەكەتتىك ماراپاتتارى جانە قۇرمەتتى اتاقتارى بار. 2 دەڭگەيلى "دوستىق" وردەنى جانە "ەرەن ەڭبەگى ءۇشىن" مەدالىمەن ماراپاتتالعان.