قازاقستاندا 10 جىلدا انا ءولىمى 3,5 ەسەگە ازايدى

قازاقستان رەسپۋبليكاسى دەنساۋلىق ساقتاۋ سالاسىن دامىتۋدىڭ 2016-2019 جىلدارعا ارنالعان «دەنساۋلىق» مەملەكەتتىك باعدارلاماسىن ىسكە اسىرۋ ارقاسىندا قازاقستاندا نەگىزگى مەديتسينالىق-دەموگرافيكالىق كورسەتكىشتەردىڭ وڭ سەرپىنى بايقالعان. بۇل تۋرالى قر پرەمەر-ءمينيسترى باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسى بارىسىندا دەنساۋلىق ساقتاۋ ءمينيسترى ەلجان ءبىرتانوۆ ايتتى, دەپ جازادى primeminister.kz. ءمينيستردىڭ ايتۋىنشا, قازاقستانداعى دەنساۋلىق ساقتاۋدىڭ نەگىزگى كورسەتكىشتەرى وڭ سەرپىنگە يە. سوڭعى ون جىلدا ءومىر ءسۇرۋ ۇزاقتىعى 72 جاسقا دەيىن ۇزاردى. انا ءولىمى 10 جىلدىڭ ىشىندە 3,5 ەسەگە ازايدى, قاتەرلى وسكىندەردەن اۋىرۋ مەن ءولىم كورسەتكىشتەرى 2015 جىلمەن سالىستىرعاندا تومەندەدى. جاراقاتتار مەن ۋلانۋدان ءولىم دەڭگەيى ون جىلدىڭ ىشىندە ەكى ەسەگە تومەندەگەن, دەگەنمەن قازىرگى تاڭدا ول ەىدۇ ەلدەرىمەن سالىستىرعاندا بۇرىنعىسىنشا جوعارى دەڭگەيدە ساقتالۋدا. ەستەرىڭىزگە سالا كەتسەك, دەنساۋلىق ساقتاۋداعى ەىدۇ ستاندارتتارىنا قول جەتكىزۋ ءۇشىن 2016 جىلى قازاقستاندا دەنساۋلىق ساقتاۋ سالاسىن دامىتۋدىڭ 2016-2019 جىلدارعا ارنالعان «دەنساۋلىق» مەملەكەتتىك باعدارلاماسىن ىسكە اسىرۋ جۇمىستارى باستالعان بولاتىن.