گولوۆكين كەلەسى جەكپە-جەگىن قازاقستاندا وتكىزەتىنىن ايتتى

ورتا سالماقتا WBA (Super), IBO, WBC جانە IBF بەلبەۋلەرىنىڭ يەگەرى گەننادي گولوۆكين (36-0, 33 كو) كەلەسى جەكپە-جەگىن قازاقستاندا وتكىزەتىنىن مالىمدەدى. «راسىمەن, ەندىگى ايقاسىمدى ءوز ەلىمدە وتكىزسەم دەيمىن. سەبەبى, ول جاقتا دا كاسىپقوي بوكستى كوز الدارىندا كورگىسى كەلەدى. اقش-تا بۇل جوعارى كلاسس بولىپ ەسەپتەلسە, قازاقستان دا وسىعان قوسىلۋعا نيەتتى. بوكستى كورگىسى كەلەتىندەر كوپ», – دەدى گولوۆكين سوڭعى ءباسپاسوز جيىنىندا. وسىعان دەيىن GGG-ءدىڭ EXPO-2017 كورمەسى كەزىندە ۇيىمداستىرىلاتىن بوكس كەشىندە شارشى الاڭعا شىعاتىنى حابارلانعان. كەيبىر اقپارات كوزدەرى ءتىپتى, ونىڭ 10 ماۋسىمدا وتەتىنىن, ال ونىڭ قارسىلاسى ورتا سالماقتاعى WBO بەلبەۋىنىڭ يەگەرى بيللي دجو سوندەرس (24-0, 12 كو) بولاتىنىن جازعان. بريتان بوكسشىسى گولوۆكيننىڭ وسى سەنبىدە بولار جەكپە-جەگىنە ارنايى قاتىسادى دەپ كۇتىلۋدە. قوس بوكسشىنىڭ استاناداعى كورمەدە جەكپە-جەككە شىعۋ جونىندە كەلىسسوزدەر جۇرگىزگەنمەن, ناقتى شەشىمگە كەلمەگەنى حابارلانعان. سونىمەن قاتار, سوندەرس ءوزىنىڭ مىندەتتى قارسىلاسى گرۋزيالىق اۆتانديلا حۋرتسيدزەمەن (32-2-2, 21 كو) جۇدىرىقتاسپاۋ جونىندە ورتاق ىمىراعا كەلگەن بولاتىن. ايتا كەتەيىك, گولوۆكين 18 ناۋرىزدا نيۋ-يوركتەگى Madison Square Garden ارەناسىندا WBA (Regular) بەلبەۋىنىڭ يەگەرى امەريكالىق دەنيەل دجەيكوبسپەن كۇش سىناسادى. بۇل كەشتى ەلىمىزدە «قازاقستان» جانە «KazSport» تەلەارنالارى 19 ناۋرىزدا 08:00-دە تىكەلەي ەفيردە كورسەتەدى.