ەلدەگى ءار ءۇش بانكتىڭ ەكەۋى حالىقتىڭ سالىمىنان ايىرىلىپ جاتىر

33 بانكتىڭ تەك 11-ىنە عانا حالىقتىڭ دەپوزيتتىك سالىمى كوبەيگەن, دەپ جازادى rating.kz. بولشەك سالىم نارىعىندا سوڭعى 20 ايدا العاش رەت تومەندەۋ بايقالدى. 2017 جىلدىڭ قاڭتار ايى قورىتىندىسى بويىنشا, قازاقستانداعى ەدب-دەگى (ەكىنشى دەڭگەيلى بانكتەر) جەكە تۇلعالاردىڭ سالىمى 2,6 پايىزعا (208,2 ملرد تەڭگە) ازايىپ, 7,7 ترلن تەڭگەنى قۇرادى. 33 بانكتىڭ تەك 11-ءى عانا "پليۋستە". سالىستىرۋ ءۇشىن ايتا كەتەيىك, وتكەن جىلدىڭ قاڭتارىندا حالىقتىڭ سالىمى 308,8 ملرد تەڭگەگە (4,5%) كوبەيىپ, 7,2 ترلن تەڭگەگە جەتكەن ەدى. ول كەزدە 33 بانكتىڭ 28-ىندە ءوسىم بايقالعان. جالپى, 2016 جىلى جەكە تۇلعالاردىڭ جيناقتارىنىڭ كولەمى 1,0 ترلن تەڭگەگە ارتتى. جەكە تۇلعالاردىڭ سالىم كولەمى جاعىنان AsiaCredit بانكى كوشباسشى. ونداعى سالىم كولەمى ءبىر ايدا 8,3 ملرد تەڭگەگە (15,6%) ۇلعايىپ, 61,5 ملرد تەڭگەگە جەتتى. ال جالپى كولەمى بويىنشا بۇل بانك 16-ورىننان 15-كە كوتەرىلدى. ونىڭ ارتىنشا تۇرعىن ءۇي قۇرىلىس جيناق بانكىندە 6,3 ملرد تەڭگە (1,5%) كوبەيۋ بار. ونداعى جالپى سالىم كولەمى 416,8 ملرد تەڭگە. بۇل بانك جالپى كولەمى جاعىنان 7-ورىندا. ۇزدىك ۇشتىكتى Kaspi bank قورىتىندىلايدى. ونداعى سالىم كولەمى 5,9 ملرد تەڭگەگە (0,8%) ۇلعايىپ, 744,4 ملرد تەڭگەگە جەتتى. جالپى تىزىمدە ول 3-ورىندا.