«دالا قاسقىرلارى» جەكە-دارا كوش باستادى

چەمپيوناتتى ءىرى جەڭىسپەن باستاعان «توبىل» ءوز الاڭىندا «اقتوبەنى» قابىلدادى. ستاديون دايىن بولماعاندىقتان ويىن قوستانايدا ەمەس, زاتوبولسك دەگەن قالادا وتكەن ەدى. سىرالعى قارسىلاستار اراسىنداعى ماتچ الما-كەزەك شابۋىلمەن ءوربىدى. العاشقى مينۋتتاردا الاڭ يەلەرىنىڭ شابۋىلشىسى دجوردجە دەسپوتوۆيچ باسپەن ۇرىپ, قاقپاعا قاۋىپ توندىرسە, قوناقتاردىڭ ويىنشىسى يگور زەنكوۆيچ الىستان تەۋىپ, ەسەپ اشا جازدادى. ويىننىڭ ەكىنشى بولىگىندە چەمپيونات سۇرمەرگەنى الەكسەي ششەتكيننىڭ گول سوعاتىن ەكى بىردەي مۇمكىندىگى بولعان. الايدا, شابۋىلشىنىڭ سوققىلارى قاقپادان قيىس كەتىپ جاتتى. ويىننىڭ سوڭىنا تامان قوستانايلىقتار قارسىلاس قاقپانى تورۋىلعا الدى. بىراق, بۇل ويىندا سەنىمدى ونەر كورسەتكەن قاقپاشى سامات وتارباەۆتى قاپى قالدىرۋدىڭ ءساتى تۇسپەدى. ماتچ 0:0 ەسەبىمەن تەڭ اياقتالدى. پرەمەر-ليگاعا قايتا ورال­­عان «قايسار» ءبىرىنشى تۋر­د­ا «وقجەتپەستى» ءىرى ەسەپ­پەن ۇتقان بولاتىن. بۇل جە­ڭىس قانات­تاندىرعان قىزى­لور­­دالىقتار ەكىنشى تۋردا دا شابىت­پەن ويناپ, ءوز الاڭىندا «تا­رازدى» 2:1 ەسەبىمەن تىزە بۇكتىردى. ويىندا ەسەپتى قوناقتاردىڭ شابۋىلشىسى رۋسلان مۇحا­مەتشين اشتى. تابلوداعى ەسەپتى ماتچتىڭ 34-مينۋتىندا ۆلاديمير ارجانوۆ تەڭەستىردى. ال «قايسارعا» جەڭىس اكەلگەن ەكىنشى گولدى كەزدەسۋدىڭ 72-مينۋتىندا سايدي نتيبازونكيزا سوقتى. وسى جەڭىستەن كەيىن «دالا قاس­قىرلارى» تۋرنير كەستەسىندە التى ۇپايمەن جەكە-دارا كوش باستادى. بۇل تۋردا «استانا» پاۆ­لودار بارىپ, جەرگىلىكتى «ەرتىس­پەن» كۇش سىناستى. ويىن باستالعاننان-اق قوناقتاردىڭ باسىمدىعى بايقالدى. ءتىپتى, ولار 14-مينۋتتا ەسەپ اشىپ, العا دا شىقتى. دوپتى الىستان تەۋىپ «توعىزدىققا» تۋرا كىرگىزگەن سەرىكجان مۋجيكوۆ بولاتىن. ءبىر قىزىعى, بۇل گول – «استانانىڭ» بارلىق تۋرنيرلەردە سوققان 500-ءشى گولى ەدى. كوپ ۇزاماي, الاڭ يەلەرى دە ءوز دەگەندەرىنە جەتتى. كەزدەسۋدىڭ 31-مينۋتىندا ەۆگەني تكاچۋك قاقپانى ءدال كوزدەدى. ويىن سوڭىنا دەيىن وسى ەسەپ وزگەرمەي, ماتچ 1:1 ەسەبىمەن تەڭ اياقتالدى. ءبىرىنشى تۋردا اسا اۋىر كەزدەسۋ وتكىزىپ, شارشاڭقىراعان «قايرات» كوكشەتاۋعا بارىپ, «وقجەتپەسپەن» وينادى. كەز­دەسۋدى ەكى كوماندا دا اسا ساق باستاعان بولاتىن. دەگەنمەن, ويىننىڭ 19-مينۋتىندا الاڭ يەلەرى العا شىقتى. لۋكاس حورۆات بەرگەن پاس­تى الەكساندر كوزلوۆ گولعا اينالدىرا ءبىلدى. سوعىلعان گولدىڭ الماتىلىقتاردى قام­شىلاعانى راس. كوپ ۇزاماي يساەلدەن تاماشا پاس العان جاركو ماركوۆيچ قاقپانى ءدال كوزدەدى. ەكىنشى تايمدا الاڭعا ويىنشى الماستىرىپ شىققان اندرەي ارشاۆين كەزدەسۋدىڭ كورىگىن قىزدىرعان ەدى. بىراق, رەسەيلىك شەبەر بىردەن گول سوعاتىن تاماشا مۇمكىندىكتى جىبەرىپ الدى. ماتچتىڭ 53-مي­نۋتىندا ەلدوس احمەتوۆتىڭ الاڭنان قۋىلعانىنا قاراماستان, «قايرات» الاڭ يەلەرىن تىقسى­رىپ-اق باقتى. كەزدەسۋدىڭ 82-مي­نۋ­تىندا اندرەي ارشاۆين كوزدەگەن ماقساتىنا جەتتى. بىراق, الماتىلىقتار جەڭىستى ۋىستا ۇستاپ تۇرا المادى. قوسىمشا ۋا­قىتتا «قايراتتىڭ» قاقپاسىنا بەل­گىلەنگەن پەنالتيدى ءساتتى ورىن­داعان ۆيتالي ۆولكوۆ كو­مان­داسىن جەڭىلىستەن قۇتقارىپ قالدى. بۇل تۋردا «ورداباسى» مەن «اتىراۋ» دا تەڭ وينادى. ەسەپ – 1:1. «اقجايىق» پەن «شاحتەر» اراسىنداعى ماتچ سوعىلعان گول­دار­دىڭ كوپتىگىمەن ەستە قالدى. بۇل ويىندا ەسەپ كەزدەسۋ باستال­ماي جاتىپ اشىلدى: ماتياس رۋبيو قاقپا الدىنداعى قار­بالاس­تى شەبەر پايدالانا ءبىلدى. ەكىنشى گولدى پەنالتيدى ءساتتى ورىنداعان ازۋ يزۋكا سوقتى. كەزدەسۋدىڭ ەكىنشى بولىگىن قاراعاندىلىقتار شيراق باستادى. ويىننىڭ 69-مينۋتىندا وڭ قاناتتان بەرىلگەن دوپتى باسپەن ءدال سوققان داۋرەنبەك تاجىمبەتوۆ ەسەپ ايىرماشىلىعىن قىس­قارتتى. الايدا, ارادا ءۇش مينۋت­تاي وتكەندە تاعى دا ازۋ يزۋكا مەرگەندىك تانىتىپ, ەسەپتى 3:1-گە جەتكىزدى. كەلەسى 3-ءشى تۋر 17-18 ناۋرىزدا وتەدى. «تاراز» بەن «قايرات» جانە «استانا» مەن «اقجايىق» 17 ناۋرىز كۇنى ءوزارا كۇش سىناسسا, 18-ءى كۇنى «اتىراۋ» – «ەرتىس», «اقتوبە» – «ورداباسى», «وقجەت­پەس» – «توبىل» جانە «شاحتەر» – «قايسار» ماتچتارى وينالادى. قايرات ءابىلدينوۆ, «ەگەمەن قازاقستان»