كورمە بيلەتى قولجەتىمدى

كوكشەتاۋ قالاسىنداعى «RIO» ساۋدا-ساۋىق ورتالىعىندا ەكسپو-2017 حالىقارالىق مامانداندىرىلعان كورمەسىنە كىرۋ بيلەتتەرىن ساتاتىن كاسسا اشىلدى. ەندى كورەرمەندەر استاناعا سابىلماي, جەرگىلىكتى جەردە بيلەت ساتىپ الا الادى. ارنايى كورمە كاسساسىنىڭ ەسەپشىسى ايگەرىم بەكماعامبەتوۆانىڭ ايتۋىنشا, ۇستىمىزدەگى جىلدىڭ 8 ناۋرىزى مەن 10 قىركۇيەگى ارالىعىندا اتالعان بيلەت ساتۋ ورنى دەمالىسسىز جۇمىس ىستەيتىن بولادى. بۇل رەتتە ۇلى وتان سوعىسىنىڭ ارداگەرلەرى, مۇمكىندىگى شەكتەۋلى جاندار جانە جەتىم بالالار كورمەنى تەگىن تاماشالاۋعا مۇمكىندىك الىپ وتىرعاندىعىن ايتا كەتكەن ءجون. ال مەكتەپ وقۋشىلارىنا ستۋدەنتتەرگە, زەينەتكەرلەر مەن كوپبالالى وتباسىلارعا 50 پايىزدىق جەڭىلدىك قاراستىرىلعان. كوكشەتاۋدا اشىلعان كاسسادان العان بيلەت الۋشىلاردىڭ ءبىرى گۇلجيھان سەيت­قاسىموۆا ءوزىنىڭ اسەرىمەن بولىسە كەلىپ, بىلاي دەدى: «مەن قالامىزدا وسىن­داي تۇرعىندارعا ىڭعايلى ورىندا ەكسپو-2017 كاسساسىنىڭ اشىلۋىنا قۋا­نىشتىمىن. مامانداندىرىلعان كورمە ەلىمىزدىڭ حالىقارالىق ارەنادا تانىمال بولۋىنا جول اشادى. ايتپاقشى, بيلەتتەردى سايت ارقىلى ساتىپ الۋعا بولادى ەكەن. سونداي-اق, بيلەتتەر «مەلومان» دۇكەندەر جەلىسىندە جانە «قازپوشتا» بولىمشەلەرىندە ساتىلۋدا. اسقار تۇراپباي ۇلى, «ەگەمەن قازاقستان» اقمولا وبلىسى