قاتاڭ سىنعا الىندى

قازاقستان دەلەگاتسياسى نيۋ-يورك قالاسىنداعى بۇۇ شتاب-پاتەرىندە كورەي حالىق-دەموكراتيالىق رەسپۋبليكاسىنىڭ (كحدر) ۇستىمىزدەگى جىلدىڭ 6 ناۋرىزدا 4 بالليستيكالىق زىمىران ۇشىرۋىنا بايلانىستى وتكەن بۇۇ قاۋىپسىزدىك كەڭەسىنىڭ توتەنشە وتىرىسىنا قاتىستى, دەپ حابارلادى سىرتقى ىستەر مينيسترلىگىنىڭ ءباسپاسوز قىزمەتى. وتىرىسقا قاتىسۋشىلار كحدر بي­لىگىنىڭ بۇۇ قاۋىپسىزدىك كەڭەسىنىڭ ءتيىس­تى قارارلارىن كەزەكتى تۇردە بۇزۋ ارە­كەتتەرىن ءبىراۋىزدان قاتاڭ سىنعا الدى. قازاقستان رەسپۋبليكاسىنىڭ بۇۇ جانىنداعى تۇراقتى وكىلى قايرات وما­روۆ ءوز سوزىندە سولتۇستىك كورەيانىڭ زى­مىران ۇشىرۋ جانە بۇۇ قاۋىپسىزدىك كەڭە­سىنىڭ قارارلارىن قايتادان ورەس­كەل تۇردە بۇزۋ ارەكەتتەرىنە زور الاڭ­داۋشىلىعىن ءبىلدىرىپ, ولاردىڭ اي­ماقتىق جانە جاھاندىق قاۋىپسىزدىكتى نىعايتۋ باعىتىنداعى ورتاق حالىق­ارا­لىق كۇش-جىگەرلەردى جوققا شى­عا­رىپ وتىرعانىن ەسكەرتتى. جيىندا قازاقستان تاراپى كورەي تۇبەگىن يادرولىق قارۋدان ازات ەتۋ قا­جەت­تىگىنە قاعيداتتى تۇردە قولداۋ تا­نىتا وتىرىپ, سولتۇستىك كورەيا ماسە­لەسىن تەك بەيبىت ساياسي-ديپلوما­تيالىق كەلىسسوزدەر مەن سەنىم شارا­لارىن قالىپتاستىرۋ, الدىن الا شارت­تار­سىز اشىق تۇردەگى ديالوگ قۇرۋ ار­قى­لى شەشۋ كەرەكتىگىن اتاپ ءوتتى. وسى ورايدا ق. وماروۆ بەيبىت جول­مەن شەشۋ مۇمكىندىكتەرى بۇۇ قاۋىپ­سىزدىك كەڭەسىنىڭ بارلىق قارارلارى­نىڭ ەڭ ماڭىزدى ءتۇيىنى ەكەندىگىن قاتى­سۋشىلاردىڭ ەسىنە سالدى. قازاقستان وكىلى ايماقتاعى شيەلەنىستى باسەڭدەتۋدى جانە قالىپتاسقان قاۋىرت احۋالدى شەشۋدى ىلگەرىلەتۋگە جەتەلەيتىن ناقتى شارالاردى ويلاستىرۋعا شاقىردى. وتىرىس سوڭىندا قاۋىپسىزدىك كەڭە­سىنىڭ مۇشەلەرى كحدر-عا قاتىستى سانك­تسيالاردى ورىنداۋدا كۇش-جىگەر­لەرىن ەسەلەي تۇسۋگە كەلىسىپ, سونىمەن قاتار, كورەي تۇبەگىندەگى جانە تۇتاس­تاي سول­تۇستىك-شىعىس ازياداعى بەي­بىت­شىلىك پەن تۇراقتىلىقتى ساقتاۋ ماڭىز­دىلىعىن قۇپتادى. بۇعان دەيىن بۇۇ قاۋىپسىزدىك كەڭەسى وسى ماسەلە جونىندە ارنايى مالىمدەمە قابىلداپ, وندا بالليستيكالىق زىمى­ران ۇشىرۋدى قاتاڭ سىنعا الىپ, بار­لىق مەملەكەتتەردى كحدر-عا قاتىستى سانكتسيالاردى ورىنداۋ بويىنشا ءتيىستى شارالاردى قابىلداۋعا شاقىرعان بولاتىن.