جيىندى اشقان شىعىس قازاقستان وبلىستىق قازاقستان حالقى اسسامبلەياسى حاتشىلىعىنىڭ مەڭگەرۋشىسى اسقار نۇرعازيەۆ كونستيتۋتسيالىق رەفورمالار حالىق اراسىندا ءبىر اي بويى قىزۋ تالقىلانعانىن, جۇمىس توبىنا 6 مىڭعا جۋىق ۇسىنىس تۇسكەنىن, جەرگىلىكتى دەڭگەيدە 10 مىڭعا تارتا كەزدەسۋ وتكەنىن, وعان 2 ميلليونعا جۋىق ادامنىڭ قاتىسقانىن تىلگە تيەك ەتىپ, شىن مانىندە بۇكىلحالىقتىق تالقىلاۋ بولعانىن اتاپ ءوتتى.
– بۇگىن ءبىز تاريحي ءساتتىڭ كۋاسى بولىپ وتىرمىز. مەملەكەت باسشىسى حالىقتىڭ, ەلدىڭ بولاشاعى ءۇشىن اسا ماڭىزدى, تاريحي شەشىم قابىلدادى. پرەزيدەنت وزىنە تيەسىلى 35 وكىلەتتىگىن ۇكىمەت پەن پارلامەنتكە بەرۋ جونىندە ۇيعارىم جاسادى. ەرەكشە اتاپ وتەر جايت, دەپۋتاتتار تاراپىنان تۇڭعىش پرەزيدەنت – ەلباسىنىڭ مارتەبەسىن كونستيتۋتسيادا بەكىتۋ تۋرالى ۇسىنىس ايتىلىپ, قولداۋعا يە بولدى.
سەبەبى, تاۋەلسىزدىك پەن ەلباسى – ەگىز ۇعىم. ەكەۋى دە ءبىزدىڭ ايبىندى مەملەكەتىمىزدىڭ ايشىقتى بەدەرى, – دەدى دوڭگەلەك ۇستەلدە ءسوز العان مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى شىعىس قازاقستان وبلىسى بويىنشا دەپارتامەنتىنىڭ باسشىسى باقتيار قامالوۆ. وبلىستىق ىشكى ساياسات باسقارماسى باسشىسىنىڭ ورىنباسارى يرينا سميت كونستيتۋتسياعا ەنگىزىلەتىن وزگەرىستەر مەن تولىقتىرۋلاردى تالقىلاۋعا ءوڭىر جۇرتشىلىعىنىڭ بەلسەندى ات سالىسقانىنا, ايماقتا 3 مىڭعا جۋىق كەزدەسۋ وتكەنىنە, بۇعان 100 مىڭعا تارتا ادامنىڭ قاتىسقانىنا توقتالىپ, بۇل ىسكە ءوز ۇلەستەرىن قوسقان ەتنومادەني بىرلەستىكتەر مەن عالىمدارعا العىسىن ءبىلدىردى.
«ارينە, مۇنىمەن ءبارى ءبىتتى دەۋگە كەلمەيدى. الدا ۇلكەن جۇمىستار كۇتىپ تۇر. ءبىز حالىققا كونستيتۋتسياعا ەنگىزىلگەن وزگەرىستەر مەن تولىقتىرۋلاردى جان-جاقتى ءتۇسىندىرۋ جۇمىستارىن ودان ءارى جالعاستىرۋىمىز كەرەك», دەدى ول. بۇدان كەيىن ءسوز العان وبلىستىق سوتتىڭ قىلمىستىق ىستەر جونىندەگى سوت القاسىنىڭ توراعاسى قايرات چاكپانتاەۆ بۇكىلحالىقتىق تالقىلاۋعا سوت سالاسى وكىلدەرىنىڭ دە بەلسەنە قاتىسقانىن جەتكىزىپ, كونستيتۋتسياعا ەنگىزىلگەن وزگەرىستەر قۇقىق قورعاۋ سالاسىنىڭ جۇمىسىنا تىڭ سەرپىن بەرەتىنىنە سەنىم ءبىلدىردى.
ازامات قاسىم, «ەگەمەن قازاقستان» وسكەمەن
سۋرەتتى تۇسىرگەن عىلىمبەك ءسابيتوۆ
