پارلامەنتتىڭ جاۋاپكەرشىلىگى ارتادى

6 ناۋرىز كۇنى پارلامەنتتىڭ قوس پالاتاسى «قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قابىلداعان بولاتىن. ەندى مەملەكەت باسشىسى اتالعان زاڭعا قول قويدى. ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا پارلامەنت سەناتىنىڭ دەپۋتاتى, اگرارلىق ماسەلەلەر, تا­بيعاتتى پايدالانۋ جانە اۋىلدىق اۋ­ماقتاردى دامىتۋ كوميتەتىنىڭ مۇشەسى مۇ­رات باقتيار ۇلى كونستيتۋتسياعا ەنگىزىلگەن وزگەرىستەر مەن تولىقتىرۋلاردىڭ ماڭىزى مەن ماقساتتارى جونىندە اڭگىمەلەدى. ونىڭ ايتۋىنشا, جالپى, كونستيتۋتسياعا ەنگىزىلگەن وزگەرىستەر مەن تولىقتىرۋلاردىڭ ماڭىزى وتە جوعارى, سەبەبى, مەملەكەت باسشىسىنىڭ ءوز وكىلەتتىكتەرىن باسقا بيلىك تارماقتارى اراسىندا ءبولۋىنىڭ ءوزى – سيرەك كەزدەسەتىن قۇبىلىس. سەنات دەپۋتاتى زاڭ جوباسىنا سايكەس, پارلامەنتكە جۇكتەلگەن جاڭا مىندەتتەر تۋرالى ايتىپ ءوتتى. «بۇعان دەيىن پارلامەنت قازاقستان رەسپۋبليكاسىنىڭ زاڭ شىعارۋ قىزمەتىن اتقاراتىن ەڭ جوعارى وكىلدى ورگان بولسا, ەندى ول زاڭ شىعارۋ بيلىگىن ءجۇ­زەگە اسىرادى, – دەدى م.باقتيار ۇلى. – سون­داي-اق, كونستيتۋتسيانىڭ 57-بابىنىڭ 6-تار­ماقشاسىنا ەنگىزىلگەن تولىقتىرۋعا بايلانىستى پارلامەنت دەپۋتاتتارىنىڭ جالپى سانىنىڭ كەم دەگەندە ۇشتەن ءبىرىنىڭ باس­تاماسى بويىنشا ۇكىمەت مۇشەلەرىنىڭ ءوز قىز­مەتتەرى جايلى ەسەبىن تىڭداۋعا قۇقىلى. ەسەپتى تىڭداۋ بارىسىندا دەپۋتتاردىڭ ۇشتەن ەكىسىنىڭ, ياعني كوپشىلىگىنىڭ باسىم داۋىسىمەن رەسپۋبليكانىڭ زاڭدىلىقتارى ورىندالماعان جاعدايدا ۇكىمەت مۇشەلەرىن ورىندارىنان بوساتۋدى قازاقستان رەسپۋبليكاسىنىڭ پرەزيدەنتىنەن سۇراي الادى. مۇنداي جاعدايدا پرەزيدەنت ۇكىمەت مۇشەلەرىن ورنىنان بوساتادى دەگەن وزگەرىستەر ەنگىزىلدى». دەپۋتاتتىڭ ايتۋىنشا, كونستيتۋتسيالىق وزگەرىستەرگە سايكەس, ەندى ۇكىمەت ءوز قىزمەتى ءۇشىن تەك پرەزيدەنتتىڭ الدىندا ەمەس, سونىمەن قاتار, پارلامەنت ءماجىلىسىنىڭ الدىندا دا جاۋاپتى بولادى. «بۇل پارلامەنتتىڭ قۇزىرەتى مەن جاۋاپكەرشىلىگىن ارتتىرۋمەن قاتار, پارتيالىق جۇيەنىڭ دامۋىنا كەڭ جول اشادى», دەدى ول. ايدار ورىسباەۆ, «ەگەمەن قازاقستان»