وتاندىق جەيدەلەر ەكسپورتقا شىعا باستادى

«بيزنەستىڭ جول كارتاسى – 2020» باعدارلاماسى اياسىندا نەسيە الىپ, وتاندىق كيىم تىگۋدى باستاعان «Dalatex» كومپانياسى بۇگىندە ءوز ءونىمىن شەتەلگە ەكسپورتتاۋدا, دەپ حابارلايدى قازاقپارات «Dalatex» كومپانياسى ەرلەر جەيدەسىن تىگۋدى وسىدان ءبىر جىل بۇرىن قولعا العان. كوپشىلىكتىڭ كوزايىمىنا اينالعان تسەح بۇگىندە ءوز ءونىمىن قازاقستاننىڭ بارلىق ايماقتارىنا, ءتىپتى, رەسەيگە دە ەكسپورتتاپ وتىر. «Dalatex» برەندى كەڭ ۇلگىدە, قىناما بەلدى جانە جارتىلاي ۇزىندىقتاعى ۇلگىمەن ءارتۇرلى ماتالاردان ەرلەر جەيدەلەرىن ۇسىنادى. فابريكانىڭ نەگىزىن قالاۋشى دىلمۇحامەد ابيزوۆ بيزنەس جولىن 20 جىل بۇرىن باستاعان. ول كاسىبىن دامىتۋ ماقساتىندا «بيزنەستىڭ جول كارتاسى – 2020» باعدارلاماسى اياسىندا 14 پايىزبەن 30 ملن تەڭگە نەسيە العان, ونىڭ 10 پايىزدىق ۇستەمەسىن مەملەكەت قايتارىمسىز نەگىزدە سۋبسيديالاۋدا. «مەن ءوز ارمانىمدى جۇزەگە اسىرا العانىما قۋانىشتىمىن. كۇندەلىكتى 200-دەن استام جەيدە تىگۋدەمىز. ال شەبەرلەرىمىز كويلەكتىڭ ءار ءتۇرىن ۇسىنا وتىرىپ, تالعامى جوعارى تۇتىنۋشىلاردىڭ تاپسىرىسىن ورىنداۋدا. ءبىزدىڭ ءونىمدى جەرگىلىكتى حالىق قانا ەمەس, وزگە ءوڭىر تۇرعىندارى دا ۇناتىپ, ساتىپ الۋدا. بۇل – ەڭبەگىمىزدىڭ جەمىسى», – دەيدى كاسىپكەر.