وڭتۇستىك قازاقستاندا «ناۋرىز» اپتالىعى باستالادى

بيىل  «تۇركىستان – تۇركى الەمىنىڭ مادەني استاناسى» جوباسى اياسىندا وڭتۇستىك قازاقستان وبلىسىندا تۇركى مادەنيەتىن الەمگە تانىتۋ ماقساتىندا جىل بويى 40-قا جۋىق ءىس-شارا وتكىزىلەدى.  ءىس-شارا جوسپارىنا سايكەس تۇركى الەمىنىڭ حالىقارالىق اقىندار ايتىسى, ءتۇبى تۇركى تىلدەس حالىقتار تەاترى, وپەرا, تسيرك, بي, ساتيرا, ءداستۇرلى ونەر, ۇلتتىق كينو جانە  انيماتسيالىق فيلمدەردىڭ, قولونەر شەبەرلەرىنىڭ, مۋزىكا فەستيۆالدەرى ۇيىمداستىرىلماق. بۇگىن بۇل تۋرالى وڭىرلىك كوممۋنيكاتسيالار ورتالىعىندا وتكەن ءباسپاسوز ءماسليحاتىندا وبلىس اكىمىنىڭ ورىنباسارى ۇلاسبەك سادىبەكوۆ ءمالىم ەتتى, دەپ حابارلادى وبلىس اكىمدىگى. «21 ناۋرىز كۇنى تۇركىستان قالاسىندا اتالعان جوبانىڭ سالتاناتتى اشىلۋى مەن تۇركسوي ءباسپاسوز سىيلىعىن تاپسىرۋ ءراسىمى وتەتىن بولادى. سونداي-اق, ۇلىستىڭ ۇلى كۇنى – ناۋرىز تويى مەرەكەلەنىپ, ق.ا.ياساۋي اتىنداعى حقتۋ-دىڭ مادەنيەت ورتالىعىندا رەسمي قوناقتاردىڭ قاتىسۋىمەن «تۇركىستان جانە تۇركولوگيا» اتتى حالىقارالىق عىلىمي-تەوريالىق كونفەرەنتسيا وتكىزۋدى جوسپارلاپ وتىرمىز», - دەيدى ۇلاسبەك سادىبەك ۇلى. مادەني ءىس-شارالاردىڭ باسىم كوپشىلىگى تۇركىستان قالاسىندا وتەدى. كەيبىر ءىس-شارالار تۇركىستان قالاسىنان باستاۋ الىپ, شىمكەنت قالاسىندا جالعاسىن تابادى. جىلدىڭ جابىلۋ سالتاناتى 2017 جىلدىڭ قاراشا ايىندا تۇركىستاندا وتەتىن بولىپ بەلگىلەنىپ وتىر.  جوبادا تۇركى الەمىنىڭ 2018 جىلعى مادەني استاناسى انىقتالىپ, ەستافەتاسى تاپسىرىلادى. بۇدان بولەك, وبلىس اكىمى جانسەيىت تۇيمەباەۆ بەكىتكەن ءىس-شارالار جوسپارىنا سايكەس, ۇلتتىق سالت - ءداستۇر مەن ادەپ - عۇرىپتى دارىپتەۋ, ناسيحاتتاۋ ماقساتىندا ناۋرىز مەرەكەسىنىڭ قارساڭىندا وبلىس دەڭگەيىندە «ناۋرىز» اپتالىعىن وتكىزۋ جوسپارلانۋدا. اپتالىق 15 ناۋرىز كۇنى باستالىپ, 21 ناۋرىز كۇنى ءوز مارەسىنە جەتەدى. مەرەكەلىك اپتالىق اياسىندا ءتۇرلى ەتنوس وكىلدەرى اراسىندا ناۋرىز كوجە دايىنداۋدان جارىس, جەرگىلىكتى قولونەرشىلەردىڭ قولىنان شىققان كادەسىيلاردىڭ جارمەڭكەسى, تازالىق اكتسياسى, ۇلتتىق ونىمدەر جارمەڭكەسى, قايىرىمدىلىق شارالارىن وتكىزۋ كوزدەلىپ وتىر.