«بارىستىڭ» ءىرى ەسەپپەن جەڭىلۋىنە نە سەبەپ بولدى؟

حوككەيدەن قازاقستاننىڭ مەملەكەتتىك جاتتىقتىرۋشىسى ۆلاديمير پاشكوۆسكي «بارىستىڭ» «مەتاللۋرگكە» قارسى ماتچتا ناتيجەلى ويىن كورسەتە الماۋىنا نە سەبەپ بولعانىن مالىمدەدى. بۇل تۋرالى vesti.kz حابارلادى. «مەتاللۋرگ» – ءسوزسىز مىقتى كوماندا. ۇجىم بىلىكتى ويىنشىلارمەن تولىققان. ارينە, ءبىزدىڭ كوماندا دا وسال ەمەس. «شىعىس» كونفەرەنتسياسىن بەسىنشى ورىنمەن اياقتاپ, پلەي-وفف كەزەڭىنە شىقتى», – دەدى پاشكوۆسكي. ونىڭ ايتۋىنشا, استانالىقتار ءۇش كەزەڭدە دە تەڭ دارەجەدە قارسىلاسا بىلگەن. بىراق ءبىر ەرەكشەلىگى – ايدىن يەلەرى ءوز مۇمكىندىكتەرىن ءتيىمدى پايدالانعان. «كومانداعا ازداپ سەنىمدىلىك جەتىسپەدى. شابۋىلعا شىققاندا جىگىتتەردىڭ كوزدەرى جالىن اتىپ تۇرۋى قاجەت. بىراق «بارىستان» ول بايقالمادى. سالدارىنان «مەتاللۋرگ» باسىمدىعىن كورسەتتى. استانالىقتاردىڭ ويىندارىنا تالداۋ جاساۋ قيىن, تۇراقتىلىق جوق. ماسەلەن, «تراكتورمەن» وتكەندە ويىنداردا سىرت ايدىندا جەڭىسكە جەتسە, ءوز جانكۇيەرلەرىنىڭ الدىندا كۇتپەگەن جەردەن ەسە جىبەرىپ جاتتى. مۇنىڭ سىرى نەدە؟ بۇعان تەك قانا باپكەرلەرى عانا ءجوندى جاۋاپ بەرە الادى دەپ ويلايمىن», – دەدى مەملەكەتتىك جاتتىقتىرۋشى. ايتا كەتەيىك, «بارىس» گاگارين كۋبوگىنىڭ جارتىلاي فينالىنىڭ سەريالى كەزدەسۋىندە ماگنيتوگورسكىدە «مەتاللۋرگ» ۇجىمىنان 0:4 ەسەبىمەن جەڭىلگەن بولاتىن.