بوكسشى فيرۋزا ءشارىپوۆانىڭ ايقاسى جاراقاتىنا بايلانىستى كەيىنگە شەگەرىلدى

قازاقستاندىق كاسىپقوي بوكسشى فيرۋزا ءشارىپوۆانىڭ كەلەسى جەكپە-جەگى جاراقاتىنا بايلانىستى كەيىنگە شەگەرىلدى. بۇل تۋرالى ونىڭ مەنەدجەرى سەرگەي زاۆيلەيسكي مالىمدەدى, دەپ حابارلادى allfight.ru. «وزدەرىڭىز بىلەتىندەي, فيرۋزانىڭ كەلەسى ايقاسىن 1 ساۋىرگە جوسپارلاعان ەدىك. بىراق وتكەن كەزدەسۋىنىڭ الدىندا الىپ قالعان جاراقاتىنىڭ سالدارىنان بۇل جوسپارىمىزدى جۇزەگە اسىرا المايىن دەپ تۇرمىز. ءشارىپوۆانىڭ ەمدەلۋىنە ءبىراز ۋاقىت قاجەت ەكەن. يۋليا چەرنوبورودوۆاعا قارسى كەزدەسۋىنەن كەيىن مەديتسينالىق تەكسەرىستەن ءوتتى. قازىرگى ۋاقىتتا دەنساۋلىعىنا قاۋىپ كەلەرلىكتەي ەشنارسە جوق, وتا جاسالمايتىن بولدى. بىراق اقحالاتتىلار بىزگە 21 كۇن بويى جۇدىرىقتاسپاۋدى, ياعني سپاررينگ وتكىزبەۋدى كەڭەس ەتتى. ال مۇنداي جاعدايدا جەكپە-جەككە تولىقتاي دايىن بولۋ مۇمكىن ەمەس. سوندىقتان فيرۋزا شارشى الاڭعا 22 ساۋىردەن كەيىن ورالادى. ناقتى كۇنىن ءالى دە تالقىلاۋىمىز قاجەت», – دەدى سەرگەي زاۆيلەيسكي. «قازىرگى ۋاقىتتا ەم قابىلداپ ءجۇرىپ, دەڭگەيىن ساقتاۋ ءۇشىن جاتتىعۋ جۇمىستارىن دا وتكىزىپ جاتىر. ال سپاررينگكە تولىق جازىلعاننان كەيىن بارىپ ورالامىز. كەلەسى رەتتە ءشارىپوۆانى بۇدان دا جاقسى كۇيدە كورەمىز دەپ سەنەمىن», – دەدى مەنەدجەرى. ايتا كەتەيىك, 4 ناۋرىز كۇنى بالاشيحا جەرىندە فيرۋزا ءشارىپوۆا رەسەيلىك يۋليا چەرنوبورودوۆامەن كۇش سىناسىپ, تورەشىلەردىڭ ءبىراۋىز شەشىمىمەن جەڭىسكە جەتكەن بولاتىن. بۇل ايقاسىنىڭ الدىندا ول سپاررينگ جاتتىعۋ كەزىندە قارسىلاسىمەن سوقتىعىسىپ قالىپ, مۇرنىن جاراقاتتاعان كۇيى شىققان. قازاقستاندىق بوكسشىنىڭ كومانداسى ەندىگى تيتۋلدى جەكپە-جەك وتكىزۋدى جوسپارلاپ وتىر.