وقو-دا ەرىكتىلەردىڭ قاتىسۋىمەن جەمقورلىققا قارسى اكتسيا باستالدى

وڭتۇستىك قازاقستان وبلىسىندا سىبايلاس جەمقورلىقتىڭ الدىن الۋ ءۇشىن «ەسىكتەن ەسىككە» اكتسياسى باستالدى. شارانى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ وڭىرلىك دەپارتامەنتى ۇيىمداستىرىپ وتىر. سالا ماماندارىنىڭ سوزىنشە اتالعان اكتسيا حالىق اراسىندا دۇرىس كوزقاراس قالىپتاستىرىپ, جەمقورلىقتىڭ الدىن الۋعا باعىتتالعان. ول ءۇشىن وبلىس اۋماعىندا 38 بيلبورد ءىلىنىپ, تۇرعىندارعا ۇنپاراقتار تاراتىلماق, دەپ جازادى قازاقپارات. ازىرگە بۇل شارالار شىمكەنت قالاسى اۋماعىندا قولعا الىنعان. اتالعان جۇمىستاردى جۇزەگە اسىرۋعا ءبىر توپ ەرىكتىلەر تارتىلىپ وتىر. قوعام دەرتىنە اينالعان جەمقورلىقتىڭ جولىن كەسۋگە بەكىنگەن جاستار بۇگىن جوعارعى وقۋ ورىندارىن ارالاپ, ءوز زامانداستىرىنا ەسكەرتپە قاعازدار تاراتتى. قالانىڭ كورنەكتى جەرلەرىنە «جەمقورلىققا جول بەرمە», «جەمقورلىققا جول جوق» سىندى ماتىندەرى بار پلاكاتتاردى جابىستىردى. ايتا كەتەيىك, اتالعان ۇنپاراقتاردا اقپاراتتار مەن بىرگە جەمقورلىق سيپاتىنداعى ارەكەتكە تاپ بولعان جاعدايدا قايدا حابارلاسۋعا بولاتىنى دا جازىلعان.