پسيحياتر دارىگەردى ءولتىردى دەگەن كۇدىكتىگە ىزدەۋ جاريالاندى

قوستاناي وبلىستىق ىشكى ىستەر دەپارتامەنتى  اسا اۋىر قىلمىس جاسادى—ادام ءولتىردى دەگەن كۇدىكتى 1977 جىلى قوستاناي قالاسىندا تۋعان عافاروۆ رۋسلان راميلەۆيچكە ىزدەۋ جاريالادى. ول وبلىستىق پسيحياتريالىق اۋرۋحانانىڭ بۇرىنعى باس دارىگەرى, وبلىسقا بەلگىلى جوعارى ساناتتى پسيحياتر دارىگەر ءراشيدا ساندىباەۆانى ءولتىردى دەگەن كۇدىك بار. ونىڭ ەرەكشە نازار اۋداراتىن بەلگىلەرى,: تولىقشا, بويى 175-180 سم, شاشى قىسقا, قارا, ماڭدايىنىڭ شاشى تاز سياقتى سيرەك. ءوزىن تانىتپاۋ ءۇشىن مۇرت, ساقال قويىپ الۋى دا مۇمكىن. وبلىستىق ىشكى ىستەر باسقارماسى كۇدىكتىنى بايقاعان جاعدايدا 8-7142) 526111, 526112 تەلەفوندارى  نەمەسە ۇيالى تەلەفون ارقىلى «102» تەلەفونىنا حابارلاۋدى وتىنەدى. ەستەرىڭىزگە سالا كەتسەك, اقپان ايىنىڭ 20-سى كۇنى وبلىستىق پسيحياتريالىق اۋرۋحانانىڭ بۇرىنعى باس دارىگەرى, جوعارى ساناتتى پسيحياتر دارىگەر, وبلىستاعى سوت-پسيحياتريالىق ساراپتاۋ ورتالىعىنىڭ باسشىسى ءراشيدا ساندىباەۆا ءوز پاتەرىندە  اسا قاتىگەزدىكپەن ولتىرىلگەن بولاتىن. ونىڭ دەنەسىنە 30 جەردەن پىشاق ۇرعان. ونى ولتىرگەن قىلمىستىق توپقا قاتىسى بار ءۇش ادام جانە ولتىرۋگە سۇرانىس جاساعان دەگەن كۇدىكپەن  ارىپتەسى, وبلىستىق پسيحياتريالىق اۋرۋحانانىڭ  بولىم مەڭگەرۋشىسى زاۋرەش ءىزالدينا ۇستالدى. ءنازيرا جارىمبەتوۆا, «ەگەمەن قازاقستان»