قازاقستان ساياحاتتاۋعا ۇسىنىلعان توپ-17 ەلدىڭ قاتارىنا ەندى

امەريكانىڭ The Huffington Post  تانىمال باسىلىمى  ساياحاتشىلارعا قازاقستانعا بارۋدى ۇسىندى, دەپ حابارلادى قازاقپارات.  باسىلىم 2017 جىلى ساياحاتتاۋ ءۇشىن 17 ورىندى ۇسىنىپ وتىر جانە تەك تۋريست بولىپ قويماي, زەرتتەۋشىگە اينالۋعا كەڭەس بەردى. قازاقستان رەيتينگتىڭ ءۇشىنشى ورنىندا ورنالاسقان. ساياحاتتاۋشىلارعا قازاقستاندى تانۋدى الماتىدان, استانا مەن اقتاۋدان باستاۋعا كەڭەس بەرىلۋدە. «الەمدە كولەمى جونىنەن 9-ورىندا. ارحيتەكتۋرا مەن قالا بويىنشا ەكسكۋرسيانى ۇناتاتىندار جەردىڭ از زەرتتەلگەن بۇل بۇرىشىندا وزدەرىن ۇيدەگىدەي سەزىنەتىن بولادى. ەلدىڭ ۇلكەن قالاسى - الماتىدان باستاڭىز, مۇندا جاقسى كيىم-كەشەك بازارلارى, جوعارى دارەجەلى مەيراحانالار بار», - دەپ اتاپ وتكەن باسىلىم. سونىمەن قاتار تۋريستەرگە تاۋعا, ورمانعا, ۇلكەن الماتى كولىنە بارۋعا كەڭەس بەرىلگەن. باسىلىمنىڭ ايتۋىنشا, 20 جىل بۇرىن عانا جەر بەتىندە بولماعانى ءۇشىن «الەمنىڭ اقىلعا قونبايتىن استاناسى» اتالىپ كەتكەن استانا قالاسى ءوزىنىڭ فۋتۋريستىك ساۋلەتىمەن تارتاتىن بولادى. ال كاسپي تەڭىزىنە شومىلىپ قايتۋ ءۇشىن باسىلىم مۇناي ونەركاسىبىنىڭ ورتالىعى - اقتاۋ قالاسىنا بارۋدى ۇسىندى. The Huffington Post-ءتىڭ رەيتينگىنە سونداي-اق, وڭتۇستىك كورەيا, ماۆريكي, كيپر, لاتۆيا, ەكۆادور, ساموا, ۋرۋگۆاي, ناميبيا, گۆاتەمالا, پاپۋا-جاڭا گۆينەيا, نيۋفاۋندلەند, رۋمىنيا, لاوس, ازەربايجان, سلوۆەنيا جانە سەيشەل ەندى.