اقپاندا ءۇي باعاسى تۇراقتالدى, ناۋرىزدا باعا تومەندەيدى

قازاقستان رەسپۋبليكاسى ۇلتتىق ەكونوميكا مينيسترلىگىنىڭ ستاتيستيكا كوميتەتى 2017 جىلعى اقپاندا تۇرعىن ءۇي نارىعىنداعى باعانىڭ وزگەرۋى جايلى مالىمەت كەلتىردى.  كوميتەتتىڭ حابارلاۋىنشا, 2017 جىلعى اقپاندا وتكەن ايمەن سالىستىرعاندا جاڭا تۇرعىن ۇيلەردى ساتۋ باعالارى 0,4 پايىزعا تومەندەدى, ال اباتتاندىرىلعان تۇرعىن ۇيلەر باعاسى وزگەرىسسىز قالدى. ال اباتتاندىرىلعان تۇرعىن ءۇيدى جالعا الۋ تولەمى 0,4 پايىزعا جوعارىلاعانى ايتىلادى. ناۋرىز ايىنا كەلەر بولساق, قايتالاما نارىقتاعى باسپانا باعاسى تاعى تومەندەيدى. Homsters.kz تالداۋ ورتالىعىنىڭ ماماندارى وسىنداي بولجام جاساپ وتىر. “تەڭگەنىڭ اقپانداعى نىعايۋى قايتالاما نارىقتا باعانىڭ تومەندەۋىنە اسەر ەتتى, ال جاڭا ۇيلەر نارىعىنداعى شارشى مەتر قۇنى وزگەرگەن جوق. ناۋرىز ايىندا قايتالاما نارىقتاعى باعا تومەندەي بەرەدى”, – دەلىنگەن بولجامدا. مامانداردىڭ مالىمەتىنشە, اقپان ايىندا رەسپۋبليكامىزدىڭ ءىرى قالالارى مەن وڭىرلەرىندەگى قايتالاما نارىقتا باعا ايتارلىقتاي تومەندەي باستاعان. باسپانانىڭ ارزانداۋى, اسىرەسە, ايدىڭ ەكىنشى جارتىسىندا ۇلتتىق ۆاليۋتانىڭ 1 اقش دوللارىنا 312 تەڭگە دەڭگەيىندە نىعايعان كەزىندە بايقالدى. باعانىڭ تومەندەۋى ءار وڭىردە بىركەلكى بولعان جوق. مىسالى, Homsters.kz ساراپشىلارىنىڭ مالىمەتىنشە, قايتالاما نارىقتاعى باسپانانىڭ ءبىر شارشى مەترىنىڭ ورتاشا باعاسى بىلايشا تومەندەدى: •    استانادا – 1,1 پايىز, 333,4 مىڭ تەڭگەگە دەيىن, •    الماتىدا – 2,7 پايىز, 350,3 مىڭ تەڭگەگە دەيىن, •    شىمكەنتتە – 3,8 پايىز, 203 مىڭ تەڭگەگە دەيىن, •    قاراعاندىدا – 1,3 پايىز, 197,7 مىڭ تەڭگەگە دەيىن. مۇنداي ديناميكاعا ۇلتتىق ۆاليۋتانىڭ 4 پايىزعا, ياعني 1 اقش دوللارىنا 326-دان 312 تەڭگەگە دەيىن نىعايۋى نەگىزگى سەبەپ بولدى. بىراق قايتالاما نارىقتاعى باعا تەڭگە باعامى ديناميكاسىمەن سالىستىرعاندا باياۋ تومەندەدى. “ەگەر اقپان ايىنىڭ باسىندا ساتۋشىلار تەڭگەنىڭ نىعايۋ ءۇردىسىنىڭ قالاي بولاتىنىن كۇتسە, ايدىڭ ورتاسىندا ءۇردىستىڭ ساقتالعانىن كورىپ, ءوز نىساندارىنىڭ باعاسىن تۇسىرە باستادى. الايدا ادەتتەگىدەي باعانى تەڭگە باعامىنا قاراعاندا باياۋ تومەندەتتى – ەل بويىنشا ورتاشا باعانىڭ تومەندەۋى 2-2,5 پايىز بولسا, تەڭگەنىڭ نىعايۋى – 4,2 پايىز. بۇل جايت ساتۋشىلارعا ساتىپ الۋشىلاردى ءوز نىساندارىمەن قىزىقتىرا تۇسۋگە جانە سونىمەن بىرگە دوللاردىڭ قۇلدىراۋىنان ۇتىلماۋعا كومەكتەستى, ويتكەنى باسپانا يەلەرىنىڭ كوبى بۇرىنعىسىنشا ءوز نىساندارىنىڭ قۇنىن بەلگىلەۋدە دوللارعا سۇيەنەدى”, – دەپ تۇسىندىرەدى Homsters.kz جىلجىمايتىن م ۇلىك ساتۋ ونلاين-سەرۆيسىنىڭ باسقارۋشى سەرىكتەسى ماريا رەن. اقپاندا جاڭا باسپانالار باعاسى وزگەرگەن جوق, بۇل باستاپقى نارىقتىڭ شەتەل ۆاليۋتاسىنا اسا تاۋەلدى ەمەس ەكەنىن كورسەتەدى. ء“ۇي سالۋشىلاردىڭ كوبى, اسىرەسە, ءىرى كومپانيالار باعانى تەڭگەمەن بەلگىلەۋگە الدەقاشان كوشتى. دوللارعا بايلانعان باعانى ءزاۋلىم ۇيلەر سالۋعا ماماندانعان جانە قۇرىلىس پەن ارلەۋگە قاجەتتى ماتەريالداردى شەتەلدەن تاسيتىن ساناۋلى كاسىپورىن عانا ساقتاپ وتىر”, – دەيدى ماريا رەن. ناۋرىز ايىندا ساراپشىلار جاڭا باسپانالار نارىعىندا تۇراقتىلىق ساقتالىپ, قايتالاما نارىقتا باعا ودان ءارى تومەندەيدى دەپ بولجايدى, بىراق ونىڭ قارقىنى ۆاليۋتا نارىعىنداعى احۋالعا بايلانىستى بولماق. ەگەر تەڭگە ودان ءارى نىعايا بەرسە, ءبىز باعانىڭ ءبىر ايدا 1-2 پايىزعا تومەندەيتىنىن بايقايمىز, ال ۆاليۋتا نارىعىنداعى احۋال تۇراقتى بولسا, باعانىڭ 0,5-0,7 پايىزدان ارتىققا تومەندەۋى ەكىتالاي.