الۆارەس جەكپە-جەككە شىققىسى كەلسە, ماعان حابارلاسسىن – گولوۆكين

ورتا سالماقتا WBA (Super), IBO, WBC جانە IBF تۇجىرىمدارى بويىنشا الەم چەمپيونى قازاقستاندىق گەننادي گولوۆكين بىرەر كۇن بۇرىن Golden Boy Promotions كومپانياسىنىڭ ۆيتسە-پرەزيدەنتى ەريك گومەستىڭ سوزدەرىنە قاتىستى پىكىر ءبىلدىردى. ول گولوۆكين وسى جازدا بيللي دجو سوندرەسپەن جەكپە-جەك وتكىزسە, قىركۇيەكتە ۇيىمداستىرىلۋى ءتيىس الۆارەسپەن ايقاسىنا كەدەرگى كەلتىرەتىنىن مالىمدەگەن بولاتىن. «گولوۆكين سوندەرسپەن بوكس كەشىن ۇيىمداستىرار بولسا, «كانەلومەن» وتەتىن كەزدەسۋىنە كەدەرگى كەلتىرۋى مۇمكىن. سەبەبى, گولوۆكين-الۆارەس جەكپە-جەگىن ۇيىمداستىرۋ ءبىراز ۋاقىتتى قاجەت ەتەدى. باق وكىلدەرىمەن, تاعى دا بىرنەشە تاراپپەن كەلىسىمگە كەلۋ كەرەك», – دەدى الۆارەسپەن تىعىز جۇمىس ىستەيتىن پروموۋتەرلىك كومپانيانىڭ ۆيتسە-پرەزيدەنتى. «كانەلو» مەنىمەن كۇش سىناسقىسى كەلسە, حابارلاسسىن. كەز كەلگەن ۋاقىتتا دايىنمىن. ماعان كەلىسىمشارتىن ۇسىنسىن, ءدال سول كۇننىڭ ەرتەڭىندە قول قويىپ بەرەمىن. بوكس كەشى مامىردا ما, ماۋسىمدا ما, شىلدەدە وتە مە, ماڭىزى جوق. ەكەۋىمىزدىڭ جەكپە-جەگىمىزدى بۇكىل الەم كۇتىپ وتىر», – دەدى گولوۆكين Los Angeles Times تىلشىسىمەن بولعان سۇحباتتا. ايتا كەتەيىك, گەننادي گولوۆكين 18 ناۋرىزدا امەريكالىق دەننيەل دجەيكوبسقا قارسى ايقاسىن وتكىزەدى. بۇل كەشتى ەلىمىزدە 19 ناۋرىزدا 08:00-دە «قازاقستان» جانە «KazSport» تەلەارنالارى تىكەلەي ەفيردە كورسەتەدى. ال ساۋل الۆارەس 6 مامىردا وتانداسى كىشى حۋليو سەزار چاۆەسپەن قولعاپ تۇيىستىرەدى.