ەۋرازيالىق ەكونوميكالىق وداقتا (ەاەو) ازىرشە وداقتا شىعارىلمايتىن اۋىل شارۋاشىلىعى تەحنيكاسىنا ارنالعان جيىنتىقتاۋشى بۇيىمدار ءوندىرىسىن ۇيىمداستىرۋ ءۇشىن جاعدايلار جاسالادى, دەپ حابارلادى ەۋرازيالىق ەكونوميكالىق كوميسسيانىڭ ءباسپاسوز قىزمەتى.
«بۇل شەشىم اۋىل شارۋاشىلىعى قاجەتتىلىكتەرى ءۇشىن تەحنيكا يمپورتىن ۇلعايتۋ جاعدايلارىندا اسىرەسە وزەكتى. 2015 جىلمەن سالىستىرعاندا اۋىل شارۋاشىلىعى يمپورتى 18% وسكەن. بۇل جەردە ەلەكتروندىق كومپونەنتتەر, قوزعالتقىشتار مەن ترانسميسسيالار تۋرالى ءسوز قوزعالادى. كولەمنىڭ تورتتەن ءبىر بولىگىنە جۋىعىن جيىنتىقتاۋشى بۇيىمدار قۇرايدى», - دەپ ءتۇسىندىرىلدى ەۋرازيالىق ەكونوميكالىق كوميسسيادا.
ءوسىم اۋىل شارۋاشىلىعى تەحنيكاسىنىڭ نەگىزگى تۇرلەرى ءوندىرىسىنىڭ تۇراقتاۋىمەن بايلانىستى. رەسەيلىك ءوندىرىس ءونىمى العاش رەت اۋىل شارۋاشىلىعى ماشينالارى نارىعىندا باسىم بولا باستاپ, 2016 جىلى ەاەو نارىعىنىڭ جالپى كولەمىنەن 54% قۇرادى.
قىمبات باعالى بۇيىمدار يمپورتىن قىسقارتۋ اۋىل شارۋاشىلىعى تەحنيكاسى ءوندىرىسىنىڭ قۇنىن تومەندەتەدى, بۇل دايىن ءونىم باعاسىنىڭ تومەندەۋىنە اكەلەدى. بولاشاقتا وسى شارا جالپى اۋىل شارۋاشىلىعىن دامىتۋعا وڭ اسەر ەتىپ, وداق مەملەكەتتەرىنىڭ تەحنيكالىق دەڭگەيىن ارتتىرۋعا جانە جاڭا تەحنولوگيالاردى يگەرۋگە ىنتالاندىرۋعا ىقپال ەتەدى.
سالانى دامىتۋ ءۇشىن ينۆەستيتسيالار تارتۋ, ەاەو اۋماعىندا ۇقساس ونىمدەر ءوندىرىسىن ۇيىمداستىرۋ جونىندەگى بىرلەسكەن باعدارلامالار مەن جوبالاردى ىسكە اسىرۋ, شەتەلدىك وندىرۋشىلەردىڭ قاتىسۋىمەن مۇنداي وندىرىستەردى ۇيىمداستىرۋعا جاردەمدەسۋ سياقتى مەحانيزمدەر پايدالانىلاتىن بولادى.
وسىلايشا, ەاەو كاسىپورىندارىندا يننوۆاتسيالىق كاسىپورىندار قۇرۋ جونىندەگى بىرلەسكەن باعدارلامالار مەن جوبالاردى قارجىلاي قولداۋعا باعىتتالعان شارالاردى قولدانۋ, جيىنتىقتاۋشى بۇيىمداردى ءوندىرۋ ءۇشىن قاجەتتى جابدىقتى جەڭىلدىكتى شارتتاردا ليزينگكە الۋ, مۇشە مەملەكەتتەردىڭ اۋماعىندا شىعارىلاتىن جيىنتىقتاۋشى ۇقساس ونىمدەردىڭ سايكەستىگىن راستاۋ مۇمكىندىگى بولادى.
